Հայաստան եւ Թուրքիա համաձայնեցան երրորդ երկիրներու քաղաքացիներու համար ցամաքային սահմանի հատման կարելիութիւն ապահովել
Ուրբաթ, 1 յուլիսին Վիեննայի մէջ տեղի ունեցաւ Հայաստանի եւ Թուրքիոյ միջեւ յարաբերութիւններու կարգաւորման գործընթացի յատուկ ներկայացուցիչներ Ռուբէն Ռուբինեանի եւ Սերտար Քըլըճի չորրորդ հանդիպումը:
Երեւան եւ Անգարա պայմանաւորուեցան կարելի ամէնէն սեղմ ժամանակաշրջանին Հայաստան-Թուրքիա ցամաքային սահմանը հատելու կարելիութիւն ապահովել` համապատասխանաբար Հայաստան եւ Թուրքիա այցելող երրորդ երկիրներու քաղաքացիներու համար, եւ որոշեցին այդ գծով անհրաժեշտ գործընթացներու սկսիլ:
Ըստ Հայաստանի արտաքին գործոց նախարարութեան` կողմերը պայմանաւորուեցան նաեւ կարելի ամէնէն սեղմ ժամկէտներու ընթացքին սկսիլ Հայաստան-Թուրքիա ուղիղ օդային բեռնափոխադրութիւններու իրականացումին եւ որոշեցին այդ ուղղութեամբ եւս սկսիլ անհրաժեշտ գործընթացներու:
Բացի ատկէ, քննարկուեցան այլ քայլեր, որոնց կարելի է ձեռնարկել` երկու երկիրներուն միջեւ հարցի լիարժէք լուծման վերջնական նպատակին հասնելու համար, ինչպէս նաեւ` յատուկ ներկայացուցիչները կրկին ընդգծեցին իրենց պայմանաւորուածութիւնը` շարունակելու լուծման գործընթացը առանց նախապայմաններու:
Թրքական կողմը հանդիպման մասին նոյն բովանդակութեամբ հաղորդագրութիւն հրապարակեց:
Շնորհակալութիւն յօդուածը ընթերցելուն համար։ Եթէ կը փափաքիս թարմ լուրեր ստանալ կը հրաւիրենք բաժանորդագրուիլ մեր լրաթերթին` սեղմելով այստեղ
