Մաքրոն. «Սահմանազատման եւ սահմանագծման բացակայութիւնը չ՛արդարացներ այլ պետութեան տարածք ներխուժումը»
«Հայաստանի եւ Ազրպէյճանի միջեւ երկխօսութիւնը պէտք է վերականգնուի», յայտարարած է Ֆրանսայի նախագահ Էմանուել Մաքրոն` երէկ Փարիզի մէջ ընդունելով Հայաստանի վարչապետ Նիկոլ Փաշինեանը:
«Բանակցութիւնները պէտք է վերսկսին», ըսած է Մաքրոն` աւելցնելով, որ յառաջիկայ ժամերուն կը պատրաստուի հեռաձայնային հաղորդակցութիւն ունենալ նաեւ Ազրպէյճանի նախագահ Իլհամ Ալիեւի հետ:
«Ֆրանսան պիտի ընէ ամէն կարելին, որպէսզի Հարաւային Կովկասը ըլլայ կայուն, յուսալի եւ բարգաւաճ շրջան», յայտարարած է Ֆրանսայի նախագահը:
Մաքրոնի համաձայն, Ազրպէյճանի նախագահը եւս «մտադրութիւն յայտնած է վերջ դնելու անկայունութեան եւ աջակցելու որոշումներու կայացման»:
Էմանուել Մաքրոն նշած է, որ 14 սեպտեմբերէն Ֆրանսան Ազրպէյճանէն կը պահանջէ դուրս բերել զօրքերը Հայաստանի տարածքէն:
«Սահմանազատման եւ սահմանագծման բացակայութիւնը չ՛արդարացներ այլ պետութեան տարածք ներխուժումը», ընդգծած է Մաքրոն:
Աղբիւրը` Ազդակ
Շնորհակալութիւն յօդուածը ընթերցելուն համար։ Եթէ կը փափաքիս թարմ լուրեր ստանալ կը հրաւիրենք բաժանորդագրուիլ մեր լրաթերթին` սեղմելով այստեղ
