Papa: sot si dje jemi para kërcënimit bërthamor, të mësojmë nga historia

R.SH. - Vatikan

Tё mësojmё nga historia e të zgjedhim udhën e paqes. Kёtё këshilloi të bëhet Papa Françesku, gjatë lutjes mariane tё Engjёllit Tёnzot, duke iu referuar asaj që ndodhi gjashtëdhjetë vjet më parë, gjatë Koncilit të Dytë të Vatikanit, kur kriza e raketave kubane arriti kulmin e saj, ndёrmjet Shteteve të Bashkuara dhe Bashkimit Sovjetik:

“Nuk mund të harrojmë rrezikun e luftës bërthamore që kërcënonte botën pikërisht në atë kohë. Pse të mos mësojmë nga historia? Edhe në atë moment pati konflikte dhe tensione të mëdha, por u zgjodh rruga paqësore. Në Bibël shkruan: "Kështu thotë Zoti: ""Kështu thotë Zoti: "Qëndroni në udhë dhe shikoni, pyetni pёr shtigjet e vjetra, cila udhë  është e mirë, asaj ecni e kështu paqe do të gjeni për jetën tuaj" (Jer 6,16).

E Lumtura Maria Costanza na ndihmoftë të jemi mikpritës

Nё vazhdim tё lutjes sё Engjёllit Tёnzot  Papa Françesku përshëndet të gjithë besimtarët dhe pjesëmarrësit në ritin e shenjtërimit të të Lumturve Giovanni Battista Scalabrini dhe Artemide Zatti. Një falënderim tё veçantë ishte për delegacionet zyrtare. Ati i Shenjtë Bergoglio pёrmendi edhe lumturimin që kremtohet sot në Fabriano të Maria Costanza Panas, një murgeshë e varfër klarise kapuçine, e cila jetoi në Manastirin e Fabrianos nga viti 1917 deri në vitin 1963. Papa Françesku e vlerësoi karizmin e murgeshës duke e lidhur atë me Koncilit II tё Vatikanit:

“Ajo i mirëpriti tё gjithё ata që trokitën në manastir, duke u transmetuar të gjithëve qetësinë dhe besimin. Vitet e fundit, e sëmurë rëndë, ajo i ofroi vuajtjet e saj për Koncilin e Dytë të Vatikanit, 60-vjetori i të cilit bie pasnesër. E Lumtura Maria Costanza na ndihmoftë që të kemi gjithmonë besim në Zotin dhe tё jemi mikpritës ndaj tё afërmit tonë”.

Akti i “çmendur” i dhunës në Tajlandë

Së fundi, mendimi dhe lutja e Papës ishte për viktimat e sulmit të armatosur në një shkollë në Tajlandë që shkaktoi 35 viktima, duke përfshirë 24 fëmijë:

“Siguroj lutjet e mia për viktimat e aktit të çmendur të dhunës që ndodhi dy-tre ditë më parë në Tajlandë. Me ngashërim ia besoj Atit të jetës, në veçanti fëmijët e vegjël dhe familjet e tyre. Dhe tani t’i drejtohemi Virgjërës Mari, për të na ndihmojё të jemi dëshmitarë të Ungjillit, të gjallëruar nga shembulli i shenjtorëve”.