Вялікдзень за зачыненымі дзвярыма: выпрабаванне для Сірыі
Аляксандр Амяльчэня - Vatican News
У перыяд велікодных свят у Сірыі будуць прыняты надзвычайныя меры бяспекі. Як паведамляе турэцкі партал "Yeni Safak", сірыйскае Міністэрства ўнутраных спраў накіравала дадатковыя сілы паліцыі да касцёлаў у гарадах з вялікай колькасцю хрысціянскага насельніцтва. Такія крокі сталі рэакцыяй на нядаўнія жорсткія напады, якія выклікалі хвалю трывогі сярод вернікаў і грамадскасці.
Голас надзеі ў Дамаску: патрыярхі за роўнасць і бяспеку
Напружанасць сітуацыі пацвярджаецца супольнай заявай рэлігійных лідараў краіны. Сірыйска-праваслаўны Патрыярх Ігнацій Яфрэм II, антыяхійскі-праваслаўны Патрыярх Ян X і каталіцкі Патрыярх Антыёхіі мелькіцкага абраду Юсэф Абсі выступілі з рашучым заклікам спыніць насілле.
Падчас крызіснай сустрэчы ў Дамаску іерархі выказалі глыбокую заклапочанасць лёсам хрысціянскай супольнасці і падкрэслілі, што міжрэлігійны спакой знаходзіцца пад сур’ёзнай пагрозай. Яны звярнуліся да палітыкаў з патрабаваннем спыніць некантраляваны абарот зброі і забяспечыць годнасць кожнага чалавека.
З прычыны рызыкі правакацый было вырашана, што сёлетнія велікодныя набажэнствы пройдуць выключна ўнутры храмаў. Ад традыцыйных публічных працэсій і масавых урачыстасцей на вуліцах прыйшлося адмовіцца дзеля захавання жыцця людзей.
Трывога ў Алепа: малітва мацнейшая за страх
Трагічным фонам для гэтых рашэнняў сталі падзеі мінулай пятніцы ў горадзе Сукайлабія. Узброеныя злачынцы ўрываліся ў дамы і крамы хрысціян, чынячы самасуд і запалохваючы мірных жыхароў, асабліва жанчын.
Езуіт Гэры Баўмгартнер, які шмат гадоў служыць у Алепа, у каментары для Папскіх місійных ініцыятыў "Missio" адзначыў, што сярод вернікаў пануе неспакой. Тым не менш, нягледзячы на "глыбока сумную сітуацыю", хрысціяне Алепа працягваюць маліцца і рыхтавацца да свята, імкнучыся зрабіць усё магчымае, каб годна сустрэць Уваскрасенне Збаўцы.
