Кардынал Маркс: Леў XIV – незалежны голас усяго чалавецтва
Аляксандр Амяльчэня - Vatican News
Падчас нядзельнай святой Імшы ў мюнхенскай катэдры арцыбіскуп звярнуў увагу на ўнікальную ролю Пантыфіка ў сучасным свеце. Іерарх падкрэсліў, што над Святым Айцом няма ніякага кіраўніка дзяржавы, што робіць яго цалкам свабодным ад нацыянальных і эканамічных інтарэсаў.
Нямецкі кардынал прызнаў, што гісторыя папства заўсёды мела свае ўзлёты і падзенні, а таксама цёмныя старонкі. Аднак, на яго думку, сёння варта глядзець на пазітыўныя аспекты гэтага служэння. Калі асоба сапраўды прымае на сябе такі цяжар і добра выконвае свае абавязкі, гэта прыносіць свету непараўнальную карысць, за якую вернікі павінны быць глыбока ўдзячныя.
Дзякуючы глабальнай медыйнай прасторы постаць Пантыфіка стала бачнай як ніколі раней у гісторыі Касцёла. Гэта дазваляе яго голасу гучаць на ўвесь свет, дасягаючы сэрцаў людзей на ўсіх кантынентах.
Ён адзначыў, што для Льва XIV і ўсіх католікаў вельмі важна не забываць дванаццацігадовае сведчанне Папы Францішка. Як выдатны прыклад іерарх згадаў яго першую энцыкліку "Evangelii gaudium", назваўшы яе вызваляючым і цудоўным дакументам.
Кардынал выказаў радасць з нагоды таго, што Папа Леў XIV плануе вярнуцца да гэтага тэксту падчас чэрвеньскага кансісторыя і прааналізаваць яго разам з кардыналамі, каб працягнуць справу евангелізацыі. На думку нямецкага іерарха, смерць Папы Францішка не спыніла яго місію – яго вучэнне застаецца жывым і актуальным для Касцёла.
Імша ў архікатэдры Мюнхена ў межах "Папскай нядзелі", якую штогод прымяркоўваюць да даты абрання Пантыфіка – у выпадку Льва XIV гэта 8 мая 2025 года.
