Папа накіраваў дапамогу пацярпелым ад тайфуна на Тайвані
Аляксандр Амяльчэня - Vatican News
Святы Айцец быў праінфармаваны пра ахвяры і разбурэнні, якія спрычыніў тайфун “Данас”, што ў апошнія дні з вялікай сілай абрынуўся на астраўныя тэрыторыі.
"Папа моліцца за ўсіх, хто пацярпеў і папрасіў Дыкастэрыю па міласэрным служэнні перадаць канкрэтную дапамогу насельніцтву", - паведаміў журналістам кіраўнік Залы Друку Матэа Бруні.
Трапічны цыклон, які абрынуўся на тайваньскае ўзбярэжжа, пакінуў пасля сябе след разбурэнняў. На дадзены момант пацверджана смерць дзвюх асоб, а колькасць параненых перавысіла 500 чалавек.
Многія з пацярпелых былі параненыя абломкамі, пацярпелі ў выніку абвальвання канструкцый або сталі ўдзельнікамі дарожна-транспартных здарэнняў, выкліканых праходжаннем цыклона.
Паводле папярэдніх даных, больш за 3 тысячы чалавек былі эвакуіраваныя з небяспечных зон. Мясцовыя ўлады працягваюць ацэньваць маштабы разбурэнняў і арганізоўваць дапамогу пацярпелым.
