Леў XIV благаславіў удзельнікаў Кангрэса экзарцыстаў
Аляксандр Амяльчэня - Vatican News
З 15 па 20 верасня 2025 года ў духоўным цэнтры "Fraterna Domus" у Сакрафана каля Рыма адбыўся XV Кангрэс Міжнароднай асацыяцыі экзарцыстаў (МАЭ). Мерапрыемства, якое праводзіцца кожныя два гады, чаргуючыся з нацыянальнымі кангрэсамі, сабрала каля 300 удзельнікаў – святароў-экзарцыстаў з усіх кантынентаў і іх памочнікаў.
На адкрыцці кангрэса айцец Франчэска Бамонтэ, віцэ-старшыня Міжнароднай асацыяцыі экзарцыстаў і мадэратар сустрэчы, зачытаў віншавальнае пасланне з апостальскім благаслаўленнем, адрасаванае Папам Львом XIV арганізатарам, дакладчыкам і ўсім удзельнікам.
Святы Айцец выказаў удзячнасць святарам, якія прысвячаюць сябе "далікатнаму і вельмі неабходнаму служэнню экзарцыста" і заахвоціў іх "ажыццяўляць яго як служэнне вызвалення і суцяшэння, суправаджаючы вернікаў, апанаваных злым духам, малітвай і заклікам дзейснай прысутнасці Хрыста, каб праз сакраментальны экзарцызм Пан даў перамогу над сатаной".
Падчас пяцідзённага Кангрэса былі праведзены шматлікія пленарныя пасяджэнні і семінары. Асаблівую ўвагу ўдзельнікі надалі абмеркаванню новых выклікаў, з якімі сутыкаюцца экзарцысты ў сучасным свеце, метадам распазнавання апанаванасці злым духам і адрозненню яе ад псіхічных захворванняў.
