Папа пажадаў афрыканскім біскупам плённага сінадальнага шляху

Марыя Валодзіна - Vatican News

Святы Айцец даслаў ліст з нагоды XIV пленарнай сесіі Міжрэгіянальнай асамблеі Біскупаў паўднёвай Афрыкі (IMBISA) і 50-годдзя заснавання гэтай арганізацыі. Яго падпісаў арцыбіскуп Эдгар Пэнья Пара, субстытут Дзяржсакратарыята па агульных справах, а зачытаў падчас урачыстага пленарнага пасяджэння апостальскі нунцый у Эсваціні Генрык Мечыслаў Ягадзінскі.

У сваім пасланні Пантыфік выказаў сардэчную падзяку за каштоўнае служэнне, якое асамблея аказала хрысціянскім супольнасцям рэгіёну на працягу апошніх пяцідзесяці гадоў. Ён упэўнены, што праца гэтай міжрэгіянальнай установы будзе спрыяць актыўнаму ўдзелу народа Божага ў евангелізацыйнай місіі Касцёла. Папа моліцца, каб сінадальны шлях Касцёлаў паўднёвай Афрыкі атрымліваў пастаянную падтрымку міласэрнага Сэрца Езуса.

Леў XIV даслаў сваё апостальскае благаслаўленне як знак міру і любові ў Пане ўсім біскупам, святарам, кансэкраваным асобам і вернікам рэгіёна, а таксама ўсім прысутным на святкаванні юбілейнай асамблеі ў Эсваціні.