Святы Айцец атрымаў у падарунак ровар, зроблены вязнямі
Vatican News
Над роварам працавалі 24 зняволеныя з рамонтнай майстэрні турмы ў Бальцана. Двое з іх атрымалі дазвол прысутнічаць на агульнай аўдыенцыі на Плошчы Святога Пятра і асабіста ўручыць Пантыфіку ровар і яго партрэт. Зняволеныя выказалі спадзяванне, што гэты досвед стане выразным пасланнем надзеі і салідарнасці для ўсіх вязняў, якія з намаганнем крочаць шляхам рэабілітацыі.
Таксама на агульнай аўдыенцыі ў Ватыкане прысутнічаў былы аператар ватыканскага тэлевізійнага цэнтра (CTV) Ларэта Дзі Чэзара, які пераехаў у ЗША. Ён прадставіў Льву XIV стужку “How Kids Roll. Дзеці Газы на хвалях свабоды” рэжысёра Лорыса Лая, якая асвятляе шматвекавы ізраільска-палесцінскі канфлікт праз прызму малаверагоднага сяброўства двух хлопчыкаў — палесцінца Махмуда і ізраільцяніна Алона, якіх аб'яднала захапленне сёрфінгам. 25 верасня 2025 года фільм будзе паказаны ў Ватыканскай фільматэцы.
