Святы Айцец: малітва за Мексіку і будаўнікоў міру
Аляксандр Амяльчэня - Vatican News
Пасля малітвы “Анёл Панскі” 26 кастрычніка 2025 года Леў XIV звярнуўся да вернікаў, сабраных на Плошчы Святога Пятра. Ён запэўніў у сваёй братэрскай блізкасці і любові жыхароў усходняй Мексікі, якія ў апошнія дні пацярпелі ад моцнай паводкі. Пантыфік моліцца за сем’і і ўсіх, хто пакутуе ад наступстваў стыхійнага бедства, даручаючы душы памерлых заступніцтву Найсвяцейшай Панны Марыі.
Малітва сэрца нараджае канкрэтныя жэсты міласэрнасці
Святы Айцец падкрэсліў, што няспынна працягваецца малітва аб міры, асабліва праз супольнае адмаўленне святога Ружанца. Гэта не проста традыцыя, а глыбокі духоўны жэст.
Сузіраючы таямніцы Хрыста разам з Дзевай Марыяй, як адзначыў Леў XIV, мы падзяляем пакуты і надзею дзяцей, маці, бацькоў і пажылых людзей, якія сталі ахвярамі вайны. Такая малітва, паводле яго слоў, перамяняе сэрцы і дазваляе глыбей адчуць боль іншых, нараджаючы канкрэтныя жэсты міласэрнасці і салідарнасці.
Ружанец – школа спагады і надзеі
Пантыфік адзначыў, што з гэтага “заступніцтва сэрца нараджаюцца шматлікія жэсты евангельскай міласэрнасці, канкрэтнай блізкасці і салідарнасці”. Малітва становіцца крыніцай дзейснай любові, якая праяўляецца ў рэальнай дапамозе бліжнім.
Звяртаючыся да ўсіх, хто штодня з даверлівай настойлівасцю працягвае свае намаганні на карысць міру, Папа паўтарыў словы з Евангелля: “Шчаслівыя міратворцы”. Гэтымі словамі ён падбадзёрыў усіх людзей добрай волі не спыняцца на шляху будавання згоды і братэрства.
На заканчэнне Леў XIV прывітаў усіх рымлян і пілігрымаў, якія прыбылі з Італіі і розных куткоў свету. Ён падзякаваў прысутным за ўвагу і пажадаў усім добрай нядзелі.
