Папа – пілігрымам з Эстоніі: будзьце сведкамі адзінства і міру
Аляксандр Панчанка - Vatican News
Аўдыенцыя адбылася раніцай 24 кастрычніка 2025 года ў Апостальскім палацы Ватыкана. Папа асаблівым чынам прывітаў двух нядаўна пасвячаных святароў, падкрэсліўшы, што іх згода служыць Богу і Касцёлу з’яўляецца знакам надзеі для хрысціянскай супольнасці іх краіны. “Няхай ваш адказ на пакліканне натхняе многіх ісці за вашым прыкладам!”, - сказаў ён.
Іншым знакам надзеі для Касцёла ў Эстоніі Святы Айцец назваў узвышэнне Апостальскай адміністратуры Эстоніі да рангу дыяцэзіі, якое адбылося ў 2024 годзе. Ён заклікаў эстонскіх католікаў маліцца адзін за аднаго і за свайго біскупа, каб іх адзінства як супольнасці веры заўсёды сілкавалася Панам і прыцягвала новых вернікаў. Папа выказаў надзею, што пілігрымка ў Рым умацуе сувязі Касцёла ў Эстоніі з Наступнікам святога Пятра.
Пантыфік прывітаў таксама некатолікаў, якія ўдзельнічалі ў пілігрымцы: лютэран, прадстаўнікоў іншых канфесій і групу людзей, што дапамагалі ў арганізацыі беатыфікацыі арцыбіскупа Эдуарда Профітліха, якая нядаўна адбылася ў Таліне.
“Ваша экуменічнае сведчанне, якое ўзрастае праз супольнае пілігрымаванне, з’яўляецца каштоўным адлюстраваннем сведчання благаслаўлёнага Эдуарда і поўнай процілегласцю нянавісці, якая так трагічна праявілася падчас пераследу Касцёла савецкім рэжымам. І сёння, як вам вядома, мы ўсё яшчэ бачым, што ў Еўропе працягвае дзейнічаць логіка вайны. Заклікаю вас горача маліцца за мір, асабліва падчас вашага знаходжання ў Рыме”, - сказаў Святы Айцец.
На заканчэнне аўдыенцыі Леў XIV запэўніў сваіх гасцей у малітве і даручыў іх апецы Марыі, Маці Касцёла.
