Папа і Патрыярх у Нікеі: Credo – падмурак будучыні хрысціянства
Аляксандр Амяльчэня - Vatican News
У другой палове дня 28 лістапада 2025 года цэнтр падзей апостальскага падарожжа перамясціўся са Стамбула ў Ізнік – горад, вядомы ў гісторыі Касцёла як Нікея. Менавіта тут адбыліся два Саборы (у 325 і 787 гадах), якія сфарміравалі фундаментальныя дагматы хрысціянства.
Святы Айцец прыбыў сюды на верталёце, дзе яго сустрэў Патрыярх Канстантынопальскі Барталамей I.
Сімволіка святла над водамі
Кульмінацыяй візіту стала экуменічная сустрэча на беразе возера, ля руін старажытнай базілікі святога Неафіта. Гэты храм, узведзены ў гонар юнага мучаніка часоў Дыяклетыяна, быў разбураны землятрусам у 740 годзе і паглынуты водамі, каб зноў быць адкрытым толькі ў 2014 годзе.
Папа і Патрыярх у працэсіі прайшлі да спецыяльнай платформы ля археалагічных раскопак. У атмасферы малітоўнай засяроджанасці, пасля прывітальных слоў Патрыярха Барталамея і чытання Евангелля, прагучала прамова Льва XIV.
Хрыстус – не супергерой, а Уцелаўлёны Бог
У сваёй прамове Папа засяродзіўся на пытанні: "Хто такі Езус Хрыстус сёння?". Ён перасцярог ад небяспекі звядзення Хрыста да ролі "харызматычнага лідара ці супергероя", што вядзе толькі да смутку і разгубленасці.
Пантыфік нагадаў, што ерась Арыя, асуджаная менавіта ў Нікеі, адмаўляла боскасць Хрыста, ператвараючы Яго ў звычайнага пасрэдніка. "Але калі Бог не стаў чалавекам, як смяротныя стварэнні могуць удзельнічаць у Яго несмяротным жыцці?" – рытарычна спытаў Пантыфік, падкрэсліваючы важнасць веры ва Уцелаўленне.
“Credo” як повязь адзінства
Леў XIV адзначыў, што вызнанне веры ў "Адзінасутнага Айца" з'яўляецца фундаментальнай повяззю, якая ўжо аб'ядноўвае ўсіх хрысціян, нават тых, хто не выкарыстоўвае Нікейска-Канстантынопальскі сімвал у літургіі.
Цытуючы святога Аўгустына, ён сказаў: "Хоць нас, хрысціян, многа, у адным Хрысце мы адно". Папа заклікаў вернікаў пераадолець "скандал падзелаў", бо чым больш прыміранымі будуць хрысціяне, тым больш праўдзівым стане іх сведчанне Евангелля для свету, які пакутуе ад насілля.
Універсальнае братэрства і адмова ад фундаменталізму
Звяртаючыся да тэмы міру, Святы Айцец падкрэсліў, што немагчыма называць Бога "Айцом", адмаўляючыся прызнаваць братамі іншых людзей. Ён рашуча асудзіў выкарыстанне рэлігіі для апраўдання вайны і фундаменталізму. "Рэлігіі павінны заахвочваць людзей да братэрскай сустрэчы, дыялогу і супрацоўніцтва", - заявіў Папа.
На заканчэнне ён падзякаваў Патрыярху Барталамею І за мудрасць у арганізацыі гэтага святкавання менавіта ў Нікеі, выказваючы надзею на тое, што юбілей прынясе плён згоды і міру.
Супольнае вызнанне веры
На месцы, дзе фарміраваліся асновы хрысціянскай дагматыкі, рэлігійныя лідары разам прамовілі Нікейска-Канстантынопальскі сімвал веры. Гэтае супольнае "Credo" стала магутным знакам братэрства і агульных каранёў.
Сустрэча завяршылася благаслаўленнем і сумесным вяртаннем Папы і Патрыярха, што сімвалізуе гатоўнасць ісці адным шляхам у будучыню.
Увечары Святы Айцец вернецца ў Стамбул, дзе ў апостальскай дэлегатуры правядзе прыватную сустрэчу і вячэру з каталіцкімі біскупамі Турцыі, якія прадстаўляюць розныя абрады і традыцыі мясцовага Касцёла: лацінскі, армянскі, халдзейскі і сірыйскі.
