Леў XIV: Блізкі Усход патрабуе адмовы ад логікі помсты

Аляксандр Амяльчэня - Vatican News

На заканчэнне Імшы на набярэжнай Бейрута Леў XIV, які прыбыў у Ліван як “пілігрым надзеі” ў Юбілейны год, скіраваў пранізлівае пасланне да хрысціян Усходу і ўсёй міжнароднай супольнасці.

Папа падкрэсліў, што прыехаў маліць Бога аб дары міру для гэтай зямлі, якая ўжо вельмі доўга пакутуе ад нестабільнасці і войнаў. Ён заахвоціў вернікаў не губляць надзеі нават тады, калі плён намаганняў прымушае сябе чакаць, і няспынна кіраваць позірк на Пана.

Новыя падыходы замест помсты

Пантыфік адзначыў жыццёвую неабходнасць змены ментальнасці ў рэгіёне. Блізкі Усход, паводле яго слоў, патрабуе новых падыходаў, якія дазволяць пераадолець палітычныя, грамадскія і рэлігійныя падзелы.

“Шлях узаемнай варожасці і разбурэння ў жаху вайны трываў занадта доўга”, - канстатаваў Леў XIV, заклікаючы адкрыць новыя раздзелы ў імя прымірэння і “выхаваць сэрцы для міру”, адкінуўшы менталітэт помсты.

Святы Айцец запэўніў у сваёй малітве за ўсе народы, якія пакутуюць ад вайны. Біскуп Рыма таксама скіраваў думкі да сітуацыі ў Гвінеі-Бісаў, выказаўшы спадзяванне на мірнае вырашэнне палітычных спрэчак, і ўспомніў ахвяр пажару ў Ганконгу, выказваючы спачуванне іх сем’ям.

Крык народаў аб міры

Асаблівая ўвага ў звароце была нададзена самому Лівану. Леў XIV звярнуўся да міжнароднай супольнасці з просьбай не шкадаваць намаганняў для прасоўвання дыялогу.

Папа скіраваў шчыры заклік да палітычных лідараў: “паслухайце крык вашых народаў, якія просяць аб міры!”. Ён нагадаў, што ўлада павінна служыць жыццю, агульнаму дабру і інтэгральнаму развіццю чалавека.

Напрыканцы сустрэчы Наступнік Пятра яшчэ раз падбадзёрыў мясцовых хрысціян, назваўшы іх паўнапраўнымі грамадзянамі гэтых зямель. Ён запэўніў, што ўвесь Касцёл глядзіць на іх з любоўю і захапленнем, і даверыў іх апецы Найсвяцейшай Панны Марыі.