Афрыканскае развітанне: Леў XIV завяршае візіт

Аляксандр Амяльчэня - Vatican News

Апошні дзень знаходжання Пантыфіка на афрыканскім кантыненце пачаўся з падрыхтоўкі да галоўнай малітоўнай падзеі ў Экватарыяльнай Гвінеі. Леў XIV пакінуў сваю рэзідэнцыю ў Малаба каля 9.00 па мясцовым часе. Яго шлях ляжыць непасрэдна да гарадскога стадыёна, дзе вернікі ўжо збіраюцца, каб пачуць заключнае слова свайго пастыра.

Эўхарыстыя як кульмінацыя візіту

Перад пачаткам літургіі прадугледжаны традыцыйны аб’езд стадыёна на папамабілі. Гэта дазволіць Святому Айцу асабіста прывітаць шматлікіх пілігрымаў, якія запоўнілі трыбуны і поле.

У 11.00 па мясцовым часе Папа ўзначаліць святую Імшу, якая стане не толькі цэнтральнай духоўнай падзеяй гэтага дня, але і яго апошнім публічным выступленнем на зямлі Экватарыяльнай Гвінеі.

Адразу пасля набажэнства Леў XIV накіруецца ў міжнародны аэрапорт Малаба. Праграма прадугледжвае афіцыйную цырымонію развітання, пасля якой, каля 12.45, самалёт італьянскай авіякампаніі "ITA Airways" паднімецца ў паветра. Разам з Папам на борце будзе знаходзіцца яго бліжэйшае акружэнне і прадстаўнікі сусветных сродкаў масавай інфармацыі.

Шлях над кантынентам і вяртанне ў Ватыкан

Пералёт у Рым працягласцю 4590 кіламетраў зойме каля 6 гадзін. Маршрут папскага самалёта пройдзе над тэрыторыямі Камеруна, Нігерыі, Нігера, Алжыра і Туніса. Чакаецца, што пасля перасячэння Міжземнага мора самалёт прызямліцца ў рымскім аэрапорце Ф’юмічына прыкладна ў 20.00 па італьянскім часе, што паставіць кропку ў гэтым інтэнсіўным і знакавым афрыканскім падарожжы.