Прэзентацыя "Ferrari Luce" ў Кастэль-Гандольфа
Аляксандр Амяльчэня - Vatican News
У летняй рэзідэнцыі ў Кастэль-Гандольфа 26 мая 2026 года адбылася знакавая сустрэча: Леў XIV прыняў дэлегацыю італьянскай кампаніі "Ferrari". На чале групы былі старшыня праўлення Джон Элкан і генеральны дырэктар Бэнэдэта Вінья, якіх суправаджалі вядучыя тэхнічныя спецыялісты.
Гэтая аўдыенцыя выйшла за межы звычайнага пратакола, ператварыўшыся ў глыбокую размову пра інавацыі, адказнасць і маральную візію будучыні.
Галоўнай падзеяй стала афіцыйная прэзентацыя новай мадэлі – "Ferrari Luce". Сама назва аўтамабіля, якая ў перакладзе азначае "святло", адсылае да ідэй інавацыйнасці, лёгкасці і празрыстасці. Прэзентацыя мадэлі Пантыфіку мела глыбокае сімвалічнае значэнне: гэта было не проста прадстаўленне індустрыяльнай навінкі, але жэст, які звязвае традыцыі сусветна вядомага брэнда з пошукам больш свядомага і адказнага шляху развіцця.
Каб замацаваць значнасць гэтага моманту, Джон Элкан перадаў у дар Папу руль ад новай мадэлі. Гэты падарунак стаў выказам пашаны і прызнання ролі Святога Пасада ў дыялогу з сучасным светам навукі і тэхнікі.
Пасля завяршэння аўдыенцыі Джон Элкан падзяліўся сваімі ўражаннямі ад размовы з Папам. "Гэта былі вялікія эмоцыі і велізарны гонар – сустрэцца з Яго Святасцю разам з маімі калегамі па “Ferrari”. Гэты момант надзвычайнай чалавечай і сімвалічнай каштоўнасці натхняе ўсіх супрацоўнікаў нашай кампаніі працягваць свой шлях з запалам, адказнасцю і даверам да будучыні. Падзея назаўжды застанецца ў нашай памяці і ў гісторыі “Ferrari", - адзначыў ён.
Візіт кіраўніцтва кампаніі ў Кастэль-Гандольфа адбыўся ў час, калі пытанні экалогіі і сацыяльнай адказнасці бізнесу становяцца цэнтральнымі ў глабальным парадку дня.
