Леў XIV – моладзі: дазвольце прыкладу святых натхніць і захапіць вас
Аляксандр Панчанка – Vatican News
Пантыфік назваў знакам надзеі прысутнасць на Плошчы Святога Пятра вялікай колькасці моладзевых груп, якія вырашылі прысвяціць некалькі дзён сваіх канікул фармацыйным мерапрыемствам і сяброўскім сустрэчам. Ён падкрэсліў, што меў радасць асабіста сустрэцца з такой моладдзю падчас сваёй нядаўняй паездкі ў Асізі.
“Усім вам, хлопцы і дзяўчаты, якія мяне слухаеце, хачу нагадаць, што ў гэтыя дні літургічны каляндар прапануе нам некалькі цудоўных постацяў святых мужчын і жанчын, якіх я заахвочваю вас лепш пазнаць: учора – вялікага святога Дамініка, заснавальніка Ордэна Братоў Прапаведнікаў; сёння – святую Тэрэзу Бэнэдыкту ад Крыжа, Эдыту Штайн, кармелітанку, забітую ў Аўшвіцы і сузаступніцу Еўропы; заўтра – святога Лаўрэнція, дыякана Рымскага Касцёла; паслязаўтра – святую Клару з Асізі, якая пакінула забяспечанае жыццё, каб пайсці за бедным і пакорным Езусам, паводле прыкладу свайго земляка святога Францішка. Дарагая моладзь, дазвольце гэтым узорным сведкам Евангелля натхніць і захапіць вас!”, - сказаў Папа.
