Сірыя: хрысціяне пад пагрозай, Касцёлы б’юць трывогу
Аляксандр Амяльчэня - Vatican News
На фоне росту нападаў на хрысціян і іншыя меншасці ў Сірыі ўзмацняюцца асцярогі за іх бяспеку пры новым пераходным урадзе. У хвалі выкраданняў і забойстваў вінавацяць ісламісцкія групоўкі.
“Касцёл у Сірыі памірае”, - папярэдзіў архіепіскап сіра-каталіцкай архідыяцэзіі Хомса Жак Мурад, адзначаючы, што ўсё больш хрысціян пакідаюць краіну, асцерагаючыся насілля. Ён падкрэсліў, што толькі стабільнасць і бяспека могуць спыніць масавы зыход.
Эксперты паведамляюць пра мэтанакіраваныя напады ў “Даліне хрысціян”, дзе злачынцы атакавалі святароў і рабавалі дамы.
Паводле ацэнак Папскага фонду “Дапамога Касцёлу ў патрэбе”, колькасць хрысціян у Сірыі скарацілася з 2,1 мільёна да вайны да 540 тысяч сёння.
Міжнародныя назіральнікі абвінавачваюць урад у адсутнасці належнай абароны меншасцей і іх выключэнні з працэсу палітычнага аднаўлення. Будучыня краіны залежыць ад гатоўнасці ўлад рэальна абараняць рэлігійную разнастайнасць.
