Саудаўская Аравія: Касцёл просіць не караць мігрантаў смерцю
Аляксандр Амяльчэня - Vatican News
Лёс дзвюх соцень эфіопскіх мігрантаў у Саудаўскай Аравіі апынуўся ў цэнтры міжнароднай увагі пасля трывожных звестак праваабарончай арганізацыі "Human Rights Watch".
Сярод асуджаных – людзі, якія шукалі паратунку ад жахаў вайны ў рэгіёне Тыграй, але сутыкнуліся з жорсткасцю судовай сістэмы каралеўства. Каталіцкі Касцёл у Эфіопіі не змог застацца ў баку ад гэтай гуманітарнай катастрофы, заклікаўшы сусветную супольнасць да неадкладных дзеянняў.
Біскуп Тэсфаселасіе Медхін, пастыр каталіцкай дыяцэзіі Адыграта, звярнуўся з пранікнёным заклікам да міжнародных гуманітарных агенцтваў. Яго зварот, апублікаваны ватыканскім місійным агенцтвам "Fides", прасякнуты глыбокім перакананнем у святасці кожнага чалавечага жыцця.
На думку біскупа Медхіна, прытрымліванне законнасці не павінна выключаць чалавечнасці: справядлівасць становіцца сапраўднай толькі тады, калі яна прасякнута літасцю. Масавае пакаранне смерцю стала б непапраўнай стратай і трагедыяй для тысяч сваякоў у Эфіопіі, якія і без таго жывуць у нястачы і галечы. Іерарх заклікаў міжнародныя арганізацыі да тэрміновых перамоў з уладамі каралеўства, каб прыпыніць выкананне прысудаў.
Сведчанні затрыманых малююць змрочную карціну правасуддзя: групавыя працэсы праходзілі без удзелу перакладчыкаў і адвакатаў. Людзі падпісвалі дакументы на арабскай мове, не разумеючы іх зместу, а ў некаторых выпадках станавіліся ахвярамі фізічнага гвалту з боку сіл бяспекі.
Сітуацыя выглядае асабліва крытычнай на фоне статыстыкі. За апошнія два гады Саудаўская Аравія зафіксавала рэкордную колькасць смяротных прысудаў: 345 у 2024 годзе і 356 у 2025 годзе. Значная частка пакараных – замежнікі, асуджаныя за негвалтоўныя злачынствы, звязаныя з наркотыкамі.
