Святы Пасад: правы чалавека – аснова справядлівага грамадства
Аляксандр Панчанка - Vatican News
“Сучасны свет стаіць перад значнымі выклікамі: канфліктамі і гвалтам, беднасцю і голадам, абмежаваннем правоў і сацыяльнай фрагментацыяй”, - сказаў пастаянны назіральнік Святога Пасада пры ААН. Ён заўважыў, што эфектыўнасць арганізацыі часта стрымліваецца палітычнай палярызацыяй і фінансавымі цяжкасцямі. У гэтым кантэксце, на думку іерарха, неабходныя “ўважлівыя разважанні, інавацыйнае мысленне і смелыя рашэнні”.
Папскі дыпламат нагадаў, што “стварэнне ААН стала вынікам скаардынаваных намаганняў міжнароднай супольнасці для ліквідацыі глыбокіх сацыяльных, культурных, эканамічных, маральных і духоўных ран, нанесеных Другой сусветнай вайной”. Ён падкрэсліў, што арганізацыя была заснавана на агульных каштоўнасцях і прынцыпах шматбаковага супрацоўніцтва, а адной з такіх каштоўнасцяў стала павага да правоў чалавека, як аснова чалавечага дабрабыту.
Рэформа ААН патрабуе вяртання да гэтых фундаментальных прынцыпаў і адбору элементаў, якія па-ранейшаму важныя, умацавання таго, што патрабуе падтрымкі, і адкідання непатрэбнага, - сказаў прадстаўнік Святога Пасада.
Арцыбіскуп Кача падкрэсліў, што цэнтральным прынцыпам ААН з’яўляецца абарона правоў чалавека. Іх прызнанне і ўкараненне спрыяе роўнасці, павазе да розных груп, барацьбе з дыскрымінацыяй і абароне ўразлівых людзей, што ўмацоўвае справядлівае і гарманічнае грамадства, - сцвердзіў ватыканскі дыпламат.
Прадстаўнік Папы заўважыў, што сёння інтэрпрэтацыя правоў чалавека часам выходзіць за межы закону і кансэнсусу, што можа прыводзіць да непрадбачаных наступстваў і служыць інструментам ідэалагічнай каланізацыі. Гэта праяўляецца ў навязванні чужых культурных мадэляў, ігнараванні традыцый і рэлігійных сувязей народаў, а таксама ў канцэнтрацыі ўвагі толькі на правах асоб без уліку абавязкаў перад найбольш слабымі і ўразлівымі: беднымі, мігрантамі, пажылымі, хворымі і нованароджанымі.
Арцыбіскуп Кача таксама падкрэсліў важнасць рэлігійнай свабоды. Ён адзначыў, што Святы Пасад абараняе яе цэнтральную ролю “не таму, што ігнаруе іншыя свабоды, а таму, што яна з’яўляецца лакмусавай паперай павагі ўсіх іншых правоў чалавека і асноўных свабод”.
