Ватыкан умацоўвае экалагічную мабільнасць
Аляксандр Амяльчэня - Vatican News
Пачатак новага этапу экалагічнай мабільнасці ў Ватыкане звязаны з супрацоўніцтвам паміж Дзяржавай Ватыкан і італьянскай кампаніяй “Exelentia”, якая спецыялізуецца на тэхналогіях з нулявымі выкідамі. Новая ініцыятыва, што закранае ўсе асноўныя службы Касцёла, мае на мэце зменшыць узровень забруджвання і павысіць эфектыўнасць транспарту ў цэнтры Каталіцкага Касцёла.
Новыя аўтамабілі для Папы і службаў
Пасля перадачы двух электрамабіляў для асабістага карыстання Папы Льва XIV, кампанія паставіла шырокі асартымент эксплуатацыйных транспартных сродкаў для розных устаноў Дзяржавы Ватыкан: жандармерыі, пажарнай аховы, службаў дарожнага абслугоўвання і тэхнічнага кантролю. Мадэлі падзелены на дзве асноўныя катэгорыі – легкавыя і транспартныя аўтамабілі.
Ратавальныя і пажарныя падраздзяленні
Кампактныя і манеўраныя мадэлі прызначаны для аператыўных патрэб падраздзяленняў бяспекі і ратавання. Версіі для пажарнай аховы, афарбаваныя ў чырвоны колер, абсталяваныя для перавозкі сродкаў першай дапамогі, у той час як белыя аўтамабілі жандармерыі дапамагаюць у патруляванні і кантролі парадку на тэрыторыі Ватыкана.
Энергазберагальныя транспартныя сродкі
Для лагістычных патрэб укаранілі розныя віды транспартных машын сярэдняга і вялікага памеру – фургоны, самазвалы і платформавыя аўтамабілі. Яны прыстасаваныя для працы ў садах, пры падрыхтоўцы літургічных мерапрыемстваў і тэхнічным забеспячэнні ўрачыстасцяў.
Частка аўтамабіляў мае здымныя бакавыя панэлі і спецыяльныя сістэмы для беражлівага перавозу раслін і далікатных прадметаў.
Мабільнасць дзеля агульнага дабра
Флатылію таксама дапаўняюць шасці- і васьмімясцовыя электрычныя аўтобусы, што выкарыстоўваюцца для перавозкі наведвальнікаў у Ватыканскіх садах і Папскіх вілах.
Паводле прадстаўнікоў Ватыкана, праект пацвярджае імкненне Святога Пасада да ўмацавання культуры адказнага карыстання прыроднымі рэсурсамі.
