Кардынал Паралін: патрэбна больш галасоў за мір
Марыя Валодзіна - Vatican News
"Утопія – думаць, што мір гарантуецца зброяй ці раўнавагай, якую ўсталёўваюць наймацнейшыя, а не міжнароднымі пагадненнямі”, – заявіў кардынал Паралін, асудзіўшы гонку пераўзбраення. "Мы цвёрда верым у тое, што арсеналы, пачынаючы з ядзерных, павінны быць спустошаныя", - сказаў ён, асудзіўшы невыкананне пагадненняў аб паэтапным скарачэнні ядзернай зброі. Іерарх адзначыў, што гэта яшчэ больш “вызваліла рукі для стварэння смертаносных прылад смерці, здольных знішчыць жыццё на Зямлі”. "Неабходна больш галасоў за мір, больш галасоў супраць вар'яцтва гонкі пераўзбраення, больш галасоў на карысць самых бедных братоў, больш галасоў і больш прапаноў – я думаю, напрыклад, пра каталіцкія ўніверсітэты – аб стварэнні новых эканамічных мадэляў, арыентаваных на справядлівасць і клопат пра слабых, а не на ідалапаклонства грошам", - перакананы Дзяржсакратар.
Рана вайны ва Украіне
Кардынал Паралін назваў вайну ва Украіне “ранай” ў сэрцы хрысціянскай Еўропы. Ён адзначыў, што замест вольнага і справядлівага свету гісторыя "пайшла ў іншым кірунку”. Свет стаў больш нестабільным, без якіх-небудзь эфектыўных сродкаў прававой абароны ад велізарнай несправядлівасці, у якой мільёны людзей пакутуюць ад голаду, смагі, адсутнасці медыцынскай дапамогі і годных умоў працы". "У мяне такое ўражанне, што спусташэнне, якое гэтая вайна нанесла Украіне, усведамляецца недастаткова”, - падкрэсліў Дзяржсакратар, нагадваючы пра велізарныя чалавечыя страты, разбурэнне гарадоў і інфраструктуры ва Украіне.
Іерарх таксама звярнуў увагу на двайныя стандарты міжнароднай супольнасці, калі многія ўрады абураліся нападамі на ўкраінскіх мірных грамадзян, уводзячы санкцыі супраць агрэсараў, але менш рэагавалі на трагедыю разбурэння Газы. У аснове ляжыць крызіс дыпламатыі, няздольнай прапанаваць альтэрнатыву “логіцы наймацнейшага”. Неабходна адрадзіць у еўрапейскіх народах пачуццё прыналежнасці да Еўропы і ўсведамленне лідарамі неабходнасці сумесных дзеянняў, заснаваных на прынцыпах, якія ляжаць у аснове Еўрапейскага Саюза.
ААН і “Рада міру”
Што тычыцца ААН, Святы Пасад працягвае лічыць яе ключавым інструментам стрымлівання логікі наймацнейшага, а ўдзел у “Радзе міру” (Board of Peace) разглядаецца як магчымасць спрыяць міру і аднаўленню ў цесным супрацоўніцтве з Каталіцкім Касцёлам у Святой Зямлі". "Я лічу неабходным удзел міжнародных арганізацый і саміх палесцінцаў, таму што немагчыма вырашыць будучыню Сектара Газа, ігнаруючы яго законных жыхароў", - сказаў кардынал Паралін, папярэджваючы аб тым, што анэксія “супярэчыць рэзалюцыям ААН і асноўным прынцыпам права”.
Падтрымка голасу Папы
Дзяржсакратар нагадаў пра неабходнасць падтрымаць заклік Папы аб міры, інакш ён застанецца голасам крыку ў пустыні. Што тычыцца заяў адміністрацыі Трампа пра рэлігійныя каштоўнасці, іерарх падкрэсліў, што хрысціянская вера – гэта не тое, што можна выбіраць як тавар: нельга сцвярджаць, што любіш і абараняеш жыццё, клапоцячыся толькі пра ненароджаных дзяцей, і адначасова ігнараваць жыццё мігрантаў, якія гінуць у моры. Што тычыцца Венесуэлы, кардынал Паралін пацвердзіў, што Святы Пасад у мінулым імкнуўся знайсці рашэнне, якое дазволіла б пазбегнуць кровапраліцця, і зараз працягвае падтрымліваць мірнае рашэнне, патрабуючы павагі права на самавызначэнне венесуэльскага народа.
Міжнародныя сцэнарыі
Пакуль урад Даніі і аўтаномны ўрад Грэнландыі шукаюць шляхі ўзаемаразумення з ЗША, пагроза анексіі вострава з боку Трампа "прывяла грэнландскі народ да абноўленага ўсведамлення сваёй ідэнтычнасці”. У сітуацыі з Іранам неабходна паважаць правы чалавека і прыслухоўвацца да патрэб насельніцтва, "цярпліва культывуючы дыялог і мір". Дыялог з Кітаем працягваецца, нягледзячы на цяжкасці. Іерарх растлумачыў, што папярэдняе пагадненне 2018 года не з'яўляецца палітыка-дыпламатычным пагадненнем або канкардатам, але адносіцца толькі да працэдуры прызначэння біскупаў. “Той факт, што сёння ў Кітаі ўсе біскупы знаходзяцца ў еднасці з Папам, мае вырашальнае значэнне", - падкрэсліў Дзяржсакратар. Што тычыцца Ганконга, Касцёл працягвае весці дыялог з уладамі і забяспечваць свабоду веравызнання".
