Ֆրանչիսկոս Պապ թիկունք կը կանգնի Վատիկանի բազմազաւակ ընտանիքներուն

Ռոպէր Աթթարեան - Վատիկան

Ֆրանչիսկոս Սրբազան Քահանայապետի որոշումով 2025ի Յունուար ամիսէն սկսեալ, երեք կամ երեքէն աւելի զաւակներով Վատիկանի Պետութեան աշխատաւորներուն ընտանիքները պիտի ստանան ամսական 300 եւրոյի գումար։ Սոյն գումարը պիտի երաշխաւորուի մինչեւ 18 տարեկան եւ կամ մինչեւ համալսարանական դասընթացքի աւարտը` բայց ոչ 24 տարեկանէն վեր։

Այս մէկը ինչպէս նշեցինք Ֆրանչիսկոս Պապին անձնական նախաձեռնութիւնն է, որ ինք փոխանցեց Վատիկանի Պետութեան Կառավարութեան նախագահին և գլխաւոր քարտուղարին, կարդինալ Ֆերնանտօ Վերկես Ալծակային և քոյր Ռաֆֆայելլա Փեթրինիին, անոնց 19 դեկտեմբերին շնորհած ունկնդրութեան ժամանակ։

Այս առիթով հրատարակուած հաղորդագրութեան մէջ նշուած է նաեւ թէ Ծնողական արձակուրդը եւս կը փոխուի եւ ներկայի երեքէն կը դառնայ հինգ օր։ Փաստօրէն, երեխայի ծննդեան կապակցութեամբ վճարովի արձակուրդի եռօրեայ ժամկէտը, որ կը վերաբերի նաև որդեգրող կամ խնամատար հօր, կ՛երկարաձգուի մինչև հինգ։