Թրամփ. «Երեքշաբթի օր Փութինի հետ պիտի խօսիմ, եւ կրնամ Ուքրանիոյ եւ Ռուսիոյ միջեւ բանակցութիւններուն մասին բան մը յայտարարել»

Միացեալ Նահանգներու նախագահ Տանըլտ Թրամփ յայտարարեց. «Երեքշաբթի օր Ռուսիոյ նախագահ Վլատիմիր Փութինին հետ պիտի խօսիմ, եւ կրնամ նաեւ մինչեւ երեքշաբթի Ուքրանիոյ եւ Ռուսիոյ միջեւ բանակցութիւններուն վերաբերեալ բան մը յայտարարել»:

«Ռուս-ուքրանական համաձայնութեան շուրջ բանակցութիւններու առանցքը հողերն ու ուժանիւթի կայարաններն են, եւ իրողապէս կը խօսինք կարգ մը գործօններու Ռուսիոյ եւ Ուքրանիոյ միջեւ բաժնելու շուրջ», նշեց Թրամփ:

Ան Ֆլորիտայէն Ուաշինկթըն վերադառնալու ժամանակ նախագահական օդանաւին մէջ գտնուող լրագրողներուն յայտնեց. «Մենք կ՛ուզենք տեսնել, թէ արդեօք կրնանք վերջ տալ այդ պատերազմին: Թերեւս կրնա՞նք, թերեւս չենք կրնար, սակայն ես կը կարծեմ, որ մենք շատ լաւ կարելիութիւններ ունինք»:

Յիշեցնենք, որ անցեալ շաբաթ Միացեալ Նահանգներու նախագահի յատուկ բանագնաց Սթիվըն Ուիթքոֆ Մոսկուայի մէջ հանդիպում ունեցած էր Փութինի հետ:

«Ես հանդիպեցայ նախագահ Փութինի հետ, հանդիպումը տեւեց շուրջ երեք-չորս ժամ: Անիկա դրական էր: Ատիկա քննարկում էր, որ հիմնուած էր տագնապի լուծումներու վրայ: Ես այդպէս կը բնութագրէի զայն», «Սի.Էն.Էն.»-ի հետ հարցազրոյցի ընթացքին ըսած էր Ուիթքոֆ:

Քրեմլին իր կարգին երէկ հաղորդեց, որ այսօր Փութին-Թրամփ հեռաձայնային հաղորդագրութեան համար պատրաստութիւններ տեղի կ՛ունենան:

Ռուսիոյ արտաքին գործոց փոխնախարար Ալեքսանտր Կրուշքօ «Իզվեսթիա» օրաթերթին հետ հարցազրոյցի ընթացքին յայտնեց, որ Ռուսիան Ուքրանիոյ տագնապի լուծման ծիրին մէջ պիտի պահանջէ, որ ապագայ խաղաղութեան համաձայնագիրին մաս կազմեն անվտանգութեան «երկաթ-շաղախէ» երաշխիքները, ներառեալ Ուքրանիոյ չէզոք կարգավիճակը եւ ՕԹԱՆ-ի երկիրներու հրաժարումը Քիեւը դաշինք ընդունելէ:

«Եթէ խօսինք Ուքրանիոյ տագնապի խաղաղ լուծման մասին, ապա, ի հարկէ, անիկա պիտի ունենայ արտաքին ուրուագիծ, մենք պիտի պահանջենք, որ անվտանգութեան «երկաթ-շաղախէ» երաշխիքները դառնան այս համաձայնագիրի մաս: Որովհետեւ միայն անոնց ձեւաւորումով կարելի պիտի ըլլայ հասնիլ Ուքրանիոյ մէջ կայուն խաղաղութեան եւ ընդհանուր առմամբ ամրապնդել շրջանային անվտանգութիւնը: Այդ երաշխիքներուն մէկ մասը պէտք է ըլլայ Ուքրանիոյ չէզոք կարգավիճակը եւ ՕԹԱՆ-ի երկիրներու` զայն դաշինք ընդունելէ հրաժարիլը», ըսած է Կրուշքօ:

Ուքրանիոյ արտաքին գործոց նախարար Անտրէյ Սիպիհան «Առ.Պի.Սի.-Եուքրէյն»-ի հետ հարցազրոյցի ընթացքին անդրադառնալով բանակցութիւններ սկսելու պարագային Ուքրանիոյ «Կարմիր գիծերու»-ն յայտնեց. «Ուքրանիան երբեք պիտի չճանչնայ բռնագրաւուած տարածքները: Երկրորդ, ոչ մէկ երկիր կրնայ վեթօ դնել ուքրանացի ժողովուրդի ընտրութեան վրայ, Ուքրանիոյ ընտրութեան վրայ` մասնակցելու այս կամ այն միութեան` ըլլայ այդ Եւրոպական Միութիւնը, թէ ՕԹԱՆ-ը: Երրորդ, չի կրնար ըլլալ Ուքրանիոյ պաշտպանունակութեան որեւէ սահմանափակում, մեր բանակի հզօրութեան, մեր կարելիութիւններու որեւէ սահմանափակում»:

Ան նաեւ նշած է, որ համաձայն չէ «կարմիր գիծեր» բնորոշման: Ատոնք, իրեն համաձայն, հիմնարար սկզբունքներն են, որոնք բանակցութիւններու ենթակայ չեն, որոնց «կարելի չէ դպչիլ»:

Աղբիւրը՝ Ազդակ