«Սահմաններից այն կողմ» - Լարի Կակոսեան – Աշխարհի խոշորագոյն արտ-դիլերը
Այսօր պատմելու ենք մի մարդու մասին, ում անունը շշնջում են աշխարհի ամենահեղինակաւոր պատկերասրահներում, և ում կարծիքը կարող է փոխել ժամանակակից արուեստի ճակատագիրը։ Նա համարւում է աշխարհում ամենաազդեցիկ արուեստի դիլերներից մէկը։ Նրա անունն է՝ Լարի Կակոսեան։
Լարի Կակոսեանը ծնուել է 1945 թուականին՝ Լոս Անջելեսում, հայկական ծագում ունեցող ընտանիքում։ Նրա ծնողները՝ հայ գաղթականներ, ԱՄՆ էին եկել՝ փախչելով Հայոց ցեղասպանութիւնից։ Այդ ցաւոտ յիշողութիւնը երբեք բացայայտ կերպով չխօսուեց Կակոսեանի խօսքերում, բայց նրա հայ ինքնութիւնը երբեք չմոռացուեց։
Մանկութիւնն անցել է համեստ պայմաններում։ Սկզբում ոչինչ չէր մատնանշում, որ այս ամերիկահայ պատանին դառնալու էր մի օր աշխարհի ամենահզօր արտ-դիլերը։
Կակոսեանի ճանապարհը սկսուեց ոչ թէ արուեստից, այլ ձեռնարկատիրութիւնից։ Նա Լոս Անջելեսի օդանաւակայանի մօտ բացեց իր առաջին փոքրիկ պատկերասրահը, որտեղ վաճառում էր պաստառներ։ Բայց շուտով հասկացաւ, որ իր հայեացքն ու ռիսկը կարող են աւելին։ Նա սկսեց համագործակցել ժամանակակից արուեստագէտների հետ, ապա հաւաքորդների, գնորդների, թանգարանների։
Կակոսեանի պատկերասրահները գործում են աշխարհի մշակութային մայրաքաղաքներում՝ Նիու Եորք, Լոնդոն, Փարիզ, Հոնկոնգ, Ժնև, Հռոմ, Լոս Անջելես։ Նրա պատկերասրահների ցանցը անվանում են «Gagosian Empire», իսկ նրա ազդեցութիւնը՝ «Կակոսեանի էֆեկտ»։ Երբ մի նկարիչ պայմանագիր է կնքում Կակոսեանի հետ, նրա ստեղծագործութիւնների գինն աճում է գրեթէ 100 անգամ։
Լարի Կակոսեանի գեղագիտական աչքն ու գործարքային խելամտութիւնը միաւորելով՝ նա դարձաւ արդի արուեստի աշխարհի թագաւոր։ Նրա միջոցով վաճառուել են գործեր՝ Ժան Միշել Բասկիայից մինչև Դեմիեն Հյորսթ, Սայ Թվոմբլիից մինչև Յայոյ Կուսամա։ Նա նաև ներկայացրել է համաշխարհային հայ մեծերին՝ ինչպէս օրինակ՝ Յարութիւն Կալենցին կամ Ժորժ Գորգուին։
Բայց Լարի Կակոսեանը միայն վաճառք չէ։ Նա նաև մշակութային հսկայական ազդեցութիւն ունեցող գործիչ է։ Նրա պատկերասրահները դարձել են արուեստի նոր լեզուների ձևաւորման հարթակ։ Նա օգնում է երիտասարդ արուեստագէտներին դուրս գալ միջազգային ասպարէզ։
Չնայած իր գլոբալ յաջողութեանը՝ Լարի Կակոսեանը չի մոռանում իր արմատները։ Նա աջակցում է մի շարք հայկական մշակութային նախագծերի։ Ըստ որոշ աղբիւրների՝ նա ֆինանսական աջակցութիւն է տրամադրել Հայաստանում ժամանակակից արուեստի ցուցահանդէսներին, ինչպէս նաև դրսում հայկական արուեստի ներկայացմանը։
Նա մի անգամ ասել է՝
«Արուեստը միակ լեզուն է, որը բոլորը կարող են հասկանալ։ Իսկ իմ պատկանելութիւնը՝ թէ՛ հայ լինելը, թէ՛ ամերիկացի լինելը, ինձ սովորեցրել է՝ աշխարհը բազմաշերտ է»։
Այսօր Լարի Կակոսեանը ոչ միայն արուեստի գործարքների վարպետ է, այլեւ հայի մի կերպար, ով առանց բարձրաձայնելու՝ կերտել է ժառանգութիւն աշխարհում։ Նրա պատկերասրահներում պտտւում են ոչ միայն նկարներ, այլ մշակոյթների պատմութիւններ։
Նա ցոյց տուեց, որ հնարաւոր է՝ լինել յաջողակ, ազդեցիկ, համաշխարհային, բայց միևնոյն ժամանակ՝ ծագումով հայ:
Հաղորդաշարը պատրաստեց` Ռուզաննա Պետրոսեանը
Շնորհակալութիւն յօդուածը ընթերցելուն համար։ Եթէ կը փափաքիս թարմ լուրեր ստանալ կը հրաւիրենք բաժանորդագրուիլ մեր լրաթերթին` սեղմելով այստեղ
