Իրան Թել Աւիւի մէջ Մոսատի եւ Ամատի կեդրոնատեղիները հարուածեց, իսկ Իսրայէլ Իրանեան բանակի սպայակոյտի նոր պետն ալ ահաբեկեց

Իրան երէկ շարունակեց հրթիռակոծել Իսրայէլը: Հրթիռներէն մէկը Թել Աւիւի հիւսիսը գտնուող Հերցիլիա քաղաքին մէջ 8 յարկանի շէնք մը ուղղակի կերպով հարուածեց:

Հզօր պայթումներ արձանագրուեցան Թել Աւիւի արեւելեան շրջաններուն եւ Ռամալլայի արեւմուտքը գտնուող բնակեցման վայրերուն մէջ:

Իսրայէլեան լրատուամիջոցներ հաղորդեցին, որ Հայֆայէն 60 անձեր հեռացուած են, Պթահ Թիքվայէն` 1300 անձեր, իսկ Թել Աւիւի շուրջ 300 բնակիչներ պանդոկներ տեղափոխուած են, երբ Իրանէն արձակուած հրթիռներուն հետեւանքով իրենց բնակարանները վնասուած են:

Իրանի ցամաքային ուժերու հրամանատարը երէկ յայտնեց, որ սկսած են Իսրայէլի վրայ արդիական զէնքերու օգտագործումով յարձակումներու ալիք մը, «որ յառաջիկայ ժամերուն պիտի սաստկանայ»:

Ան աւելցուց, որ իրանեան ուժերը քանդումի մեծ կարողութիւն ունեցող քամիքազ անօդաչու թռչող սարքեր օգտագործած են Իսրայէլի ռազմավարական դիրքերը քանդելու համար:

Իրանի Յեղափոխական պահակագունդը հաղորդեց, որ հարուածած է Թել Աւիւի մէջ իսրայէլեան բանակի հետախուզութեան` Ամանի կեդրոնատեղին եւ ահաբեկումներու գործողութիւններու ծրագրաւորման կեդրոնը:

Իրանի պաշտպանութեան նախարարութեան բանբերը յայտարարեց, որ երէկ իրենց յարձակումի ընթացքին առաջին անգամ ըլլալով օգտագործած են հրթիռ մը, որ իսրայէլացիները չեն կրցած նկատել կամ վնասազերծել: «Այդպիսի յաւելեալ անակնկալներ պիտի տեսնեն», նշեց ան:

Իրանեան ոստիկանութիւնը իր կարգին յայտարարեց, որ ձերբակալած է իսրայէլեան գաղտնի սպասարկութեան` Մոսատի գործակալ մը, որ Թեհրանի արեւմուտքը գտնուող Քարժ քաղաքին մէջ պայթուցիկ նիւթեր կ՛արտադրէր եւ կը փորձարկէր:

Իսրայէլեան բանակը իր կարգին յայտարարեց, որ Թեհրանի մէջ կեդրոնատեղի մը հարուածելով ահաբեկած է իրանեան բանակի սպայակոյտի նոր նշանակուած պետ Ալի Շամատանին:

Իսրայէլեան օդուժը յայտարարեց, որ երկուշաբթի-երեքշաբթի գիշեր հարուածած է հրթիռներու պահեստաւորման եւ արձակման դիրքեր, հրթիռներու արձակման հարթակներ եւ անօդաչու թռչող սարքերու պահեստանոցներ:

Իսրայէլացի բարձրաստիճան պաշտօնատար մը երէկ իսրայէլեան պատկերասփիւռի 14-րդ կայանին յայտնած է. «Մենք Իրանի դէմ պատերազմին մէջ վճռորոշ 48 ժամուան առջեւ կանգնած ենք»:

Իսրայէլի պաշտպանութեան նախարար Իսրայէլ Քաց յայտարարեց. «Կը զգուշացնենք Իրանի գերագոյն հոգեւոր պետ Ալի Խամենէին` Իսրայէլի ուղղութեամբ հրթիռներու արձակումը շարունակելէ»:

Քաց աւելի ուշ նաեւ նշեց. «Միացեալ Նահանգներ մեզի կ՛օգնեն մեր հողերը պաշտպանելու եւ չեն մասնակցիր Իրանի վրայ մեր յարձակումներուն»:

«Նաթանզ կայանին մէջ կեդրոնական դիրքը քանդեցինք եւ աշխատանք կը տանինք քանդելու իրանեան հիւլէական ծրագիրի ամբողջ ենթակառոյցը», ըսաւ Իսրայէլի պաշտպանութեան նախարարը` աւելցնելով. «Իսրայէլ պիտի հակադարձէ իրանեան հիւլէական ծրագիրը վերանորոգելու իւրաքանչիւր փորձի»:

«Իրանեան վարչակազմին պատկանող վարչական ամէն ենթակառոյց, որ զինուորական կառոյցին հետ կապ ունի, մեզի համար թիրախ է», յայտնեց Քաց:

«Իրանը բռնագրաւել չենք ուզեր, ո՛չ ալ վարչակարգը տապալել, այլ` սպառնալիքները վերացնել», շեշտեց ան:

Քաթարի արտաքին գործոց նախարարութեան բանբեր Մաժետ Անսարի զգուշացուց, որ շրջանային անվտանգութիւնը յաւելեալ տագնապներու եւ մագլցումի չի տոկար:

Ան նշեց, որ շրջանի պետութիւնները մասնակից էին Ուաշինկթընի եւ Թեհրանի միջեւ համաձայնութեան գոյացման ջանքերուն:

Անսարի նշեց, որ իսրայէլեան չհաշուարկուած քայլը քարիւղի գիներուն վրայ հետեւանքներ պիտի ունենայ` զգուշացնելով Իրանի հիւլէական կայաններու անհաշիւ թիրախաւորումէն:

Քաթարի արտաքին գործոց նախարարութեան բանբերը շեշտեց, որ երկրին վարչապետը կ՛ընդգծէ շրջանին մէջ լարուածութիւնը նուազեցնելու անհրաժեշտութիւնը` նշելով, որ Քաթար Հիւլէական ուժանիւթի միջազգային գործակալութեան հետ քննարկած է հիւլէական կայաններու անվտանգութիւնը ամրապնդելու կարելիութիւնները:

Իրանի արտաքին գործոց նախարար Ապպաս Արաղչի զգուշացուց «սիոնական գոյացութեան պատերազմի ծիրը ընդլայնելու եւ շրջանային ու միջազգային դերակատարներ ներքաշելու սադրանքէն»:

«Մեր ժողովուրդը ամբողջ ուժով ինքզինք պիտի պաշտպանէ սիոնական վայրագ յարձակումէն», շեշտեց ան:

«Սիոնական գոյացութեան Ծոցի ջուրերուն մէջ մեր քարիւղի կառոյցներուն թիրախաւորումները պատերազմը ընդլայնելու անոր ջանքերուն ծիրին մէջ են», յայտնեց իրանեան դիւանագիտութեան պետը:

Քրեմլին յայտարարեց, որ Միջին Արեւելքի մէջ կացութիւնը վտանգ կ՛ահազանգէ եւ դէպի յաւելեալ մագլցում կ՛ուղղուի:

«Իսրայէլի մօտ միջնորդութեան անցնելու կամ Իրանի հետ կարգաւորման յանգեցնող հոլովոյթ որոնելու փափաք չենք տեսներ», նշեց Ռուսիոյ նախագահական պալատը:

Քրեմլին նաեւ հաղորդեց, որ Ռուսիան իր քաղաքացիներուն առիթ կ՛ընծայէ Ազրպէյճանի ճամբով Իրանէն հեռանալու:

Աղբիւրը՝ Ազդակ