Եւրոպական յանձնաժողովի նախագահը կ՛առաջարկէ առեւտուրի համաշխարհային կազմակերպութեան այլընտրանք ստեղծել
Եւրոպական յանձնաժողովի նախագահ Ուրսուլա Ֆոն Տեր Լեյեն Եւրոպական Միութեան ղեկավարներուն առաջարկած է նախաձեռնութեան սկսիլ` ստեղծելու Ասիոյ երկիրներու հետ կառուցուածքային առեւտրական գործընկերութիւն, որ կրնայ դառնալ Առեւտուրի համաշխարհային կազմակերպութեան այլընտրանքը: Այս մասին կը հաղորդէ «Եուրոնիուզ»:
Պրիւքսելի մէջ տեղի ունեցած Եւրոպական Միութեան վեհաժողովի ընթացքին եւրոպացի ղեկավարները քննարկած են Առեւտուրի համաշխարհային կազմակերպութեան հաստատութենական կառուցուածքի վերատեսութեան կարելիութիւնը, անոնց շարքին` կազմակերպութեան վէճերու լուծման մեքանիզմները:
«Առեւտուրի համաշխարհային կազմակերպութիւնը երկար տարիներէ ի վեր չ՛աշխատիր», յայտարարած է Գերմանիոյ վարչապետ Ֆրիտրիխ Մերց` անդրադառնալով Միացեալ Նահանգներու նախագահներ Տանըլտ Թրամփի եւ Ճօ Պայտընի վարչակազմերու օրերուն կազմակերպութեան մնայուն խնդիրներուն:
Եւրոպական յանձնաժողովի նախագահ Ուրսուլա Ֆոն Տեր Լեյեն ղեկավարներուն ներկայացուցած է առեւտրական համաձայնագիրներու շարք մը տարբերակներ` ընդգծելով Եւրոպական Միութեան եւ Անդրխաղաղովկիանոսեան գործընկերութեան համապարփակ եւ յառաջադէմ համաձայնագիրի անդամներու միջեւ աւելի սերտ համագործակցութիւնը, Խաղաղ ովկիանոսեան 11 երկիրներ եւ Բրիտանիան ներառող շրջանային առեւտրական համաձայնագիր է:
Ան նախաձեռնութիւնը ներկայացուցած է իբրեւ համաշխարհային առեւտրական կարգի վերաձեւաւորման ուղղութեամբ հաւանական առաջին քայլ:
«Մենք կրնանք ատիկա նկատել Առեւտուրի համաշխարհային կազմակերպութեան վերաձեւաւորման սկիզբը: Սակայն պէտք է հասկնանք, որ բարեփոխումները պէտք է դրական ըլլան», նշած է Ֆոն Տեր Լեյենը:
Ան ընդգծած է Առեւտուրի համաշխարհային կազմակերպութեան թերութիւններէն դասեր քաղելու եւ աշխարհին ցոյց տալու կարեւորութիւնը, որ «ազատ, կանոններու վրայ հիմնուած առեւտուրը» կամաւոր գործընկերներու լայն խումբի պարագային տակաւին հասանելի է:
Շնորհակալութիւն յօդուածը ընթերցելուն համար։ Եթէ կը փափաքիս թարմ լուրեր ստանալ կը հրաւիրենք բաժանորդագրուիլ մեր լրաթերթին` սեղմելով այստեղ
