ՄԱԿ-ը պաշտօնապէս յայտարարեց, որ Կազայի մէջ սով գոյութիւն ունի

Կազայի մէջ սովը իբրեւ պատերազմի միջոց օգտագործելը ռազմական յանցագործութիւն է: «Թայմզ աֆ Իզրայէլ» կը հաղորդէ, որ այս մասին յայտարարած է ՄԱԿ-ի մարդու իրաւունքներու հարցերով յանձնակատար Վոլքըր Թիւրքը:

«Կազայի մէջ սովը Իսրայէլի կառավարութեան կողմէ ձեռնարկուած գործողութիւններու ուղղակի հետեւանքն է, եւ սովէն մահերը կրնան պատերազմական յանցագործութիւն համարուիլ», ըսած է ան:

ՄԱԿ-ի ընդհանուր քարտուղար Անթոնիօ Կութերես յայտարարեց. «Չենք կրնար արտօնել, որ այս կացութիւնը անպատիժ շարունակուի: Անհրաժեշտ է ապահովել մարդասիրական օգնութեան լիարժէք, անարգել մուտք»:

Կութերես նաեւ կոչ ուղղեց. «Անյապաղ զինադադարի, բոլոր պատանդներու անյապաղ ազատ արձակման եւ մարդասիրական օգնութեան լիարժէք, անարգելք մուտքի»:

Նախքան այդ, ՄԱԿ-ը երէկ պաշտօնապէս յայտարարեց, որ Կազայի մէջ սով գոյութիւն ունի: ՄԱԿ-ի փորձագէտները յայտնեցին, որ 500.000 անձեր «աղէտալի» անօթութիւն կը դիմագրաւեն:

Աղբիւրը` Ազդակ