Իսրայէլ Տոհայի մէջ յարձակում գործեց Համասի ղեկավարութեան ժողովի մը վրայ

Երէկ կէսօրէ ետք Քաթարի մայրաքաղաք Տոհայի մէջ լսուեցան պայթումի ձայներ: Համասէն ղեկավար աղբիւր մը «Ժազիրա»-ին յայտնեց, թէ պայթումները հետեւանք են իսրայէլեան յարձակումի մը, որ թիրախաւորեց Համաս շարժումի պատուիրակութիւնը, որ այդ պահուն կը քննարկէր Միացեալ Նահանգներու նախագահ Տանըլտ Թրամփի Կազայի մէջ զինադադարի հաստատման առաջարկը:

Համասէն ղեկավար աղբիւր մը «Ժազիրա»-ին յայտնեց, թէ Խալիլ Հայէի գլխաւորած պատուիրակութիւնը փրկուած է իսրայէլեան մահափորձէն: Իսրայէլացի պաշտօնատար մը իսրայէլեան պատկերասփիւռի 14-րդ կայանին յայտնեց, որ թիրախաւորուած ղեկավարներու շարքին էին Խալիլ Հայէն եւ Զահեր Ժապարինը: «Արապիա» իր կարգին հաղորդեց, որ յարձակումի թիրախ դարձած Համասի ժողովին կը մասնակցէին Խալիլ Հայէն, Խալետ Մեշաալն ու Զահեր Ժապարինը:

Ապահովական աղբիւր մը իսրայէլեան պատկերասփիւռի 12-րդ կայանին յայտնեց. «Մեր գնահատումով, Համասի բարձրաստիճան ղեկավարներէն 6-ը սպաննուած են»:

Քաթարի արտաքին գործոց նախարարութիւնը բուռն կերպով դատապարտեց «երկչոտ» եւ «ոճրային» յարձակումը, «որ բոլոր միջազգային օրէնքները կը խախտէ եւ կը սպառնայ քաթարցիներուն եւ Քաթար բնակողներուն անվտանգութիւնը:

«Քաթարի պետութիւնը բուռն կերպով կը դատապարտէ եւ աչքաթող պիտի չընէ իսրայէլեան անպատասխանատու այս վերաբերումը», նշեց նախարարութիւնը` աւելցնելով. «Քաթարի պետութիւնը կը հաստատէ, որ աչք պիտի չփակէ որեւէ արարքի, որ իր անվտանգութիւնն ու գերիշխանութիւնը կը թիրախաւորէ»:

Իսրայէլի վարչապետ Պենիամին Նեթանիահուի գրասենեակը նշեց. «Համասի բարձրաստիճան ղեկավարներուն դէմ գործողութիւնը ամբողջովին անկախ էր, անոր Իսրայէլը նախաձեռնեց ու գործադրեց, ուստի կը կրէ ամբողջական պատասխանատուութիւնը»:

Սէուտական Արաբիոյ գահաժառանգը Քաթարի իշխանին հեռաձայնելով թագաւորութեան ամբողջական զօրակցութիւնը յայտնեց Քաթարի եւ նշեց, որ իր բոլոր կարելիութիւնները կը դնէ Քաթարի տրամադրութեան տակ իր անվտանգութիւնը պաշտպանելու բոլոր քայլերուն աջակցելու: Նոյն կեցուածքը արտայայտեցին նաեւ Յորդանանը, Օմանը եւ Քուէյթը:

Լիբանանի նախագահ Ժոզեֆ Աուն իր կարգին Լիբանանի զօրակցութիւնը յայտնեց եւ դատապարտեց «ոճրային յարձակումը»: «Տոհայի վրայ իսրայէլեան յարձակումը երեւան կը հանէ շրջանին մէջ կայունութիւն ու անվտանգութիւն հաստատելու ջանքերը հարուածելու Իսրայէլի պնդումը», նշեց ան:

Նեթանիահու եւ Իսրայէլի պաշտպանութեան նախարար Իսրայէլ Քաց միացեալ հաղորդագրութիւն մը հրապարակելով յայտնեցին, որ յարձակումը հակադարձութիւն է Երուսաղէմի մէջ մէկ օր առաջ փոխադրակառքի մը դէմ կատարուած յարձակումին` նշելով, որ անոնք յարձակումը կը նկատեն արդարացուած, որովհետեւ Համասի ղեկավարութիւնը 7 հոկտեմբերի յարձակումը կազմակերպած է:

Իրան յարձակումը նկատեց «վտանգաւոր եւ ոճրային»: Թուրքիոյ արտաքին գործոց նախարարութիւնը դատապարտեց Համասի բանակցող պատուիրակութեան Տոհայի մէջ թիրախաւորումը` նշելով, որ Քաթարի կողքին կը կանգնի ընդդէմ իսրայէլեան «երկչոտ» յարձակումին:

Աղբիւրը` Ազդակ