Սահմաններից այն կողմ - Քարլա Կարապետեան – Լրագրող, վաւերագրող կինոռեժիսոր

Քարլա Կարապետեանը ժամանակակից միջազգային լրագրութեան եւ վաւերագրական կինոյի նշանաւոր ներկայացուցիչներից է, որի ստեղծագործական ուղին միաւորում է մասնագիտական խստապահանջութիւնը եւ բարոյական պատասխանատուութիւնը։

Նա հանդիսացել է BBC հեռուստաընկերութեան նախկին լրագրող եւ BBC World News-ի պատմութեան մէջ միակ ամերիկացի հաղորդավարը։ Այս հանգամանքը ինքնին վկայում է նրա բացառիկ մասնագիտական կարողութիւնների եւ միջազգային հեղինակութեան մասին։

Քարլա Կարապետեանի լրագրողական գործունէութիւնը կերտուեց համաշխարհային քաղաքական եւ մարդասիրական ճգնաժամերի կիզակէտերում։

Նա լայն ճանաչում ձեռք բերեց իր պատրաստած վաւերագրութիւններով, որոնք նուիրուած էին Հայոց ցեղասպանութեան, Հիւսիսային Կորեայի, Չեչնիայի, Աֆղանստանի եւ Իրանի խնդիրներին։

Նրա աշխատանքներին բնորոշ է՝

- փաստի հանդէպ խստապահանջ հաւատարմութիւն,

- վտանգաւոր միջավայրերում աշխատելու պատրաստակամութիւն,

- մարդկային ճակատագրի խորքային բացայայտում։

Քարլա Կարապետեանը իր մի շարք վաւերագրական ֆիլմերով անդրադարձել է համաշխարհային հրատապ խնդիրների։

Դրանց մէջ առանձնանում են՝

- Հիւսիսային Կորեայի մասին Children of the Secret State («Գաղտնի երկրի երեխաները») ֆիլմը,

- Աֆղանստանի մասին Lifting the Veil («Բարձրացնելով քողը»),

- Իրանի մասին Forbidden Iran («Արգելուած Իրան») աշխատանքը։

Հայոց ցեղասպանութեան թեմային նա անդրադարձաւ Screamers («Ճչացողներ») ֆիլմում, որի մէջ ընդգրկուած էր նաեւ ամերիկեան ռոք խումբը System of a Down։ Ֆիլմը ցեղասպանութեան ճանաչման եւ ժխտման խնդիրը ներկայացրեց միջազգային լայն լսարանին՝ մշակութային եւ քաղաքական համատեքստում։

Քարլա Կարապետեանը ծնուած է Միացեալ Նահանգներում, մեծացած՝ Լոս Անջելեսում։

Նա ծագումով վանեցի եւ սեբաստացի ծնողների ընտանիքից է, եւ իր հայկական ինքնութիւնը մշտապէս ներկայ է եղել նրա ստեղծագործական եւ գաղափարական աշխարհում։

Քարլա Կարապետեանը իր ստեղծագործական մղումների մասին ասել է․

«Որքան ինձ յիշում եմ, Հայոց ցեղասպանութեան ժխտումն է, որ ինձ մշտապէս դրդել է գործի։ Սա գիտակցուած չի եղել, պարզապէս կայ, անտեսանելիօրէն եռում է իմ բոլոր գործերում, որ նկարահանել եմ այն ոճրագործութիւնների մասին, որոնք կառավարութիւնները ցանկանում են թաքցնել, այն ճշմարտութիւնների, որոնք մարդիկ կցանկանային ժխտել»։

Այս միտքը յստակօրէն արտայայտում է նրա ստեղծագործական առաքելութիւնը՝ ճշմարտութեան բացայայտում եւ լռութեան խախտում։

«Գրանցում է ճշմարտութիւնը վտանգաւոր վայրերում», – գրել է Los Angeles Times-ը Քարլա Կարապետեանի գործունէութեան մասին։

Հոլիվուդեան պրոդիւսեր Peter McElwee-ն իր հերթին նշել է․

«Իմ կարծիքով, իբրեւ մարդ եւ վաւերագրող՝ նա բացառիկ եւ չբացայայտուած տաղանդ է... Նա ապրել է մի կեանք, որը բոլոր երիտասարդ դերասանուհիները աղաչում են խաղալ»։

Քարլա Կարապետեանը այն վաւերագրողներից է, որոնց համար լրագրութիւնը մասնագիտութիւն չէ միայն, այլ՝ բարոյական դիրքորոշում։

Նրա ֆիլմերը փաստագրական ժանրի շրջանակներից դուրս գալիս դառնում են յիշողութեան եւ արդարութեան պայքարի մաս։

Նա մնացել է որպէս լրագրող, ով համարձակուեց մուտք գործել փակ աշխարհներ եւ բարձրաձայնել այն, ինչ շատերը կը ցանկանային լռեցնել։