Ռայի Պատրիարք. «Իսրայէլի հետ «շրջագծային համաձայնութիւն»-ը կարդացի եւ օրհնութիւնս տուի»
Մարոնիներու Ռայի պատրիարքը յայտնեց. «Մենք կ՛ողջունենք Սուրիոյ նախագահ Ահմետ Շարհը, որ բարի մտադրութիւններ ունի վերականգնելու Սուրիան, որ վերականգնման կարիք ունի: Մենք յոյս ու հաւատք ունինք նախագահ Շարհի` Սուրիան վերականգնելու կարողութեան նկատմամբ»: Ան այս մասին հաղորդեց «Մայատին» արբանեակային պատկերասփիւռի կայանին:
«Լիբանանը իր կացութենէն դուրս կու գայ, Սուրիոյ հետ դառնալու կարելիութիւններու փոխանակում կատարող երկու դրացի երկիրներ, եւ մենք կ՛ուզենք խաղաղութիւն վայելել, ու ժողովուրդը խաղաղութեան կարիք ունի», ըսաւ ան` աւելցնելով, որ Լիբանանի մէջ եկեղեցին չի հեռանար, այլ ներկայ կը մնայ եւ արժէքներու մասին կը վկայէ:
Ռայի պատրիարքին կարծիքով, Լիբանանի մէջ սուրիական միջամտութիւն տեղի պիտի չունենայ, իսկ եթէ տեղի ունենայ, ի շահ ոչ ոքի պիտի ըլլայ, եւ նախագահ Շարհը Լիբանանի եւ Սուրիոյ միջեւ խաղաղութեան առաջարկներ կը ներկայացնէ:
Պատրիարքը շեշտեց, թէ Միացեալ Նահանգներու նախագահ Տանըլտ Թրամփի սուրիական միջամտութեան կոչը պաշտօնական չէ, որովհետեւ սխալ է: «Չեմ կարծեր, թէ Ամերիկան կ՛ուզէ պատերազմը ընդլայնել, որովհետեւ բոլորը պատերազմէն յոգնեցան, եւ մարդիկ դէպի պատերազմ չեն ուղղուիր, այլ` դէպի խաղաղութիւն եւ փոխըմբռնումներ», ըսաւ ան:
Ռայի պատրիարքը յայտնեց, որ եկեղեցին պաղեստինցիներուն համար պետութիւն կ՛ուզէ, եւ անոր կարծիքով` առանց պաղեստինեան պետութեան, խաղաղութեան չկայ, ինչպէս նաեւ եկեղեցին պատերազմներ շղթայազերծող զինեալ շարժումներու կազմակերպման հետ չէ, այլ կը ճանչնայ պետութիւնը` իբրեւ խաղաղութեան միջնորդ:
«Աշխարհը այսօր զինուած է, եւ չկայ ցուցանիշ, թէ աշխարհը դէպի խաղաղութիւն կ՛ընթանայ, եւ պետութիւնները պատերազմներու համար գոյութիւն չունին, այլ` բարգաւաճման ու խաղաղութեան», յայտնեց ան:
«Երբ «շրջագծային համաձայնութիւն»-ը կը կարդաս, կը տեսնես, թէ անիկա գերիշխանութիւն, հեռացում, զէնքի հաւաքում, խաղաղութիւն եւ գերիներու վերադարձ կը պարունակէ: Կարեւոր է, որ պատերազմն ու քանդումը դադրեցնենք, յաւելեալ զոհերու արձանագրումը դադրեցնենք, եւ եթէ «համաձայնութիւն»-ը մեզի բանի մը հասցուց, կրնանք ուրախանալ, իսկ եթէ այդ հարցերը տեղի չունենան, ատիկա կը նշանակէ, թէ պատերազմին վերադարձանք», ըսաւ Ռայի պատրիարքը:
«Մենք մեզի առիթ տանք: Պէտք չէ այսպէս արագ մերժենք, եւ Աստուած ուզէ խաղաղութիւն կը հաստատուի: Ես կարդացի «շրջագիծի համաձայնութիւն»-ը եւ զայն օրհնեցի, սակայն ասիկա չի նշանակեր, թէ զայն որդեգրեցի, որովհետեւ ատիկա բան մըն է, իսկ գործադրումը` այլ բան: Համաձայնութեան մէջ նշուածը կա՛մ կը գործադրուի, կա՛մ ալ պատերազմի եւ քանդումի պիտի վերադառնանք», յայտնեց մարոնիներու պատրիարքը:
Ռայի ըսաւ. «Դիմադրութեան վերաբերեալ ըսինք, թէ պէտք է հասարակաց պաշտպանութեան հասնին, եւ պետութեան հետ հասկցուին: Անոնք պատերազմ յայտարարեցին եւ այդ ուղղութեամբ ընթացան, եւ կառավարութիւնը անոնց դէմ է: Եթէ կ՛ուզեն, որ որոշումը կառավարութեան ձեռքը ըլլայ, պէտք է բանաձեւի շուրջ համաձայնութիւն գոյացնեն` աւելցնելով, որ միացեալ պաշտպանութիւնը դժուար դարձաւ, որովհետեւ կառավարութիւնը իր որոշումը տուաւ եւ այլեւս Դիմադրութիւնը չի ճանչնար:
«Շիի համայնքը թիրախաւորուած չէ, այլ հայրենիքին մէջ իր դիրքը, արժէքն ու դերը ունի: Շիի համայնքը թիրախաւորուած պէտք չէ զգայ, այլ այս հարենիքին մէջ ուրիշներուն նման տեղ ունի, եւ հաւասարութեան հիմամբ մշակութային ու կրօնական համակեցութիւնը միայն Լիբանանի մէջ գոյութիւն ունի», աւելցուց ան` հարց տալով. «Լիբանանը առանց շիիներուն, կամ մարոնիներուն, սիւննիներուն եւ ուրիշներուն ի՞նչ արժէք ունի»:
«Կ՛ուզենք, որ լիբանանցիները ընդունին Լիբանանի չէզոքութիւնը, եւ Սուրիոյ, Իսրայէլի եւ Իրանի նման երկիրներ ճանչնան Լիբանանի հողային ամբողջականութիւնը: Չէզոքութիւնը չի նշանակեր, թէ Լիբանան առնչակից պիտի չըլլայ շրջանին մէջ հակամարտութիւններուն, այլ խաղաղութեան հող ըլլայ, եւ բոլոր լիբանանցիները կ՛ուզեն, որ Լիբանան գոյատեւէ, սակայն պէտք է իւրաքանչիւր ոք առանձին ոտքի կանգնի», ըսաւ Ռայի պատրիարքը:
Աղբիւրը՝ Ազդակ
Շնորհակալութիւն յօդուածը ընթերցելուն համար։ Եթէ կը փափաքիս թարմ լուրեր ստանալ կը հրաւիրենք բաժանորդագրուիլ մեր լրաթերթին` սեղմելով այստեղ.
