ತಂಜಾನಿಯಾದ ಧರ್ಮಾಧ್ಯಕ್ಷರುಗಳ ಅಧ್ಯಕ್ಷರು: 'ಪ್ರತಿಭಟನಾಕಾರರನ್ನು ನಿರ್ದಯವಾಗಿ ಕೊಲ್ಲಲಾಯಿತು'

ಫೆಡೆರಿಕೊ ಪಿಯಾನಾ

ಇದು ದುಃಖಕರ, ಭಯಾನಕ, ಮಾರಕ ಘಟನೆಯಾಗಿತ್ತು ಎಂದು ಲಿಂಡಿ ಧರ್ಮಕ್ಷೇತ್ರದ ಧರ್ಮಾಧ್ಯಕ್ಷರಾದ ವೋಲ್ಫ್‌ಗ್ಯಾಂಗ್ ಪಿಸಾರವರು ಹೇಳಿದ್ದಾರೆ. ತಂಜಾನಿಯಾದ ಕಥೋಲಿಕ ಧರ್ಮಾಧ್ಯಕ್ಷರುಗಳ ಸಮ್ಮೇಳನದ ಅಧ್ಯಕ್ಷರು ವ್ಯಾಟಿಕನ್ ಸುದ್ದಿಯವರಿಗೆ ನೀಡಿದ ಸಂದರ್ಶನದಲ್ಲಿ ಅಕ್ಟೋಬರ್ 29 ರ ಘಟನೆಗಳನ್ನು ಚರ್ಚಿಸಿದರು.

ತಂಜಾನಿಯಾದ ಸಾರ್ವತ್ರಿಕ ಚುನಾವಣೆಯ ದಿನದಂದು, ದಾರ್ ಎಸ್ ಸಲಾಮ್, ಎಂಬೆಯಾ, ಅರುಷಾ, ಮ್ವಾನ್ಜಾ, ಗೀತಾ ಮತ್ತು ಕಹಾಮಾದಂತಹ ಪ್ರಮುಖ ನಗರಗಳು ದೊಡ್ಡ ಸಾರ್ವಜನಿಕ ಪ್ರದರ್ಶನಗಳಿಂದ ನಡುಗಿದವು, ಅನೇಕರು ಅನಿಯಮಿತ ಮತ್ತು ನ್ಯಾಯಸಮ್ಮತವಲ್ಲದ ಮತದಾನವೆಂದು ಪರಿಗಣಿಸಿದ್ದನ್ನು ಪ್ರತಿಭಟಿಸಿದರು.

ಕೆಲವು ಪ್ರತಿಭಟನಾಕಾರರು ಸಹ ಅತಿಯಾದ ಹಿಂಸಾಚಾರದ ಕ್ರಿಯೆಯನ್ನು ಎಸಗಿದರು. ಅವ್ಯವಸ್ಥೆಯ ನಡುವೆಯೂ ಪೊಲೀಸರು ಅಭೂತಪೂರ್ವ ಕ್ರೌರ್ಯದಿಂದ ಪ್ರತಿಕ್ರಿಯಿಸಿದರು ಎಂದು ಧರ್ಮಾಧ್ಯಕ್ಷರು ಹೇಳಿದರು. ಅವರು ಗುಂಡು ಹಾರಿಸುತ್ತಿದ್ದವರನ್ನು ಮಾತ್ರವಲ್ಲದೆ, ಪ್ರತಿಭಟನೆಗಳಿಗೆ ಯಾವುದೇ ಸಂಬಂಧವಿಲ್ಲದ ತಮ್ಮ ಮನೆಗಳ ಮುಂದೆ ನಿಂತಿದ್ದ ಸಾಮಾನ್ಯ ಜನರನ್ನೂ ಸಹ ಕೊಂದುಹಾಕಿದರು, ಅವರು ಕರುಣೆಯಿಲ್ಲದೆ ಅಜಾಗರೂಕತೆಯಿಂದ ವರ್ತಿಸಿದರು ಎಂದು ಅವರು ಹೇಳಿದರು.

ಪ್ರತಿಭಟನೆ ನಡೆಸುವುದು ಒಂದು ಹಕ್ಕು
ಬೀದಿಗಿಳಿದವರಿಗೆ ಔಪಚಾರಿಕವಾಗಿ ಹಾಗೆ ಮಾಡಲು ಅಧಿಕಾರ ನೀಡದಿದ್ದರೂ, ಧರ್ಮಾಧ್ಯಕ್ಷರಾದ ಪಿಸಾರವರು ಜನರು ಪ್ರತಿಭಟಿಸುವ ಅವರ ಹಕ್ಕನ್ನು ಎತ್ತಿಹಿಡಿದರು. ಪ್ರತಿಭಟನೆಗಳು ಜನರ ಹಕ್ಕು ಮತ್ತು ಅದನ್ನು ಗುಂಡಿನ ದಾಳಿಯಿಂದ ನಿಲ್ಲಿಸಿ, ಅವರಿಂದ ಆ ಹಕ್ಕನ್ನು ಕಸಿದುಕೊಳ್ಳಬಾರದು ಎಂದು ಅವರು ಹೇಳಿದರು. ಇದಲ್ಲದೆ, ಪ್ರತಿಭಟನೆಗಳ ಹಿಂದಿನ ಪ್ರೇರಕ ಶಕ್ತಿಯಾಗಿದ್ದ ಯುವಜನರಿಗೆ, ಇಂತಹ ಉದ್ವಿಗ್ನ ಸಾಮಾಜಿಕ-ರಾಜಕೀಯ ವಾತಾವರಣದಲ್ಲಿ, ಅಧಿಕಾರಿಗಳು ಎಂದಿಗೂ ಅನುಮತಿ ನೀಡುತ್ತಿರಲಿಲ್ಲ ಎಂದು ಚೆನ್ನಾಗಿ ತಿಳಿದಿತ್ತು. ಈ ಪ್ರತಿಭಟನೆಯಿಂದ ಎಷ್ಟು ಮಂದಿ ಸಾವನ್ನಪ್ಪಿದ್ದಾರೆ ಅಥವಾ ಗಾಯಗೊಂಡಿದ್ದಾರೆ ಎಂಬುದು ಇನ್ನೂ ಯಾರಿಗೂ ತಿಳಿದಿಲ್ಲ. ಎರಡನೇ ಅವಧಿಗೆ ಪ್ರಮಾಣವಚನ ಸ್ವೀಕರಿಸಿದ ನಂತರ, ಅಧ್ಯಕ್ಷೆ ಸಮಿಯಾ ಸುಲುಹು ಹಸನ್ ಪರಿಸ್ಥಿತಿಯನ್ನು ಕಡಿಮೆ ಮಾಡಿದರು. ಕೆಲವೇ ಸಂತ್ರಸ್ತರುಗಳ ಬಗ್ಗೆ ಉಲ್ಲೇಖಿಸಿದರು.

ಸತ್ಯಕ್ಕೆ ಸಾಕ್ಷಿಯಾಗಿ ಧರ್ಮಸಭೆ
ಸ್ಥಳೀಯ ಧರ್ಮಸಭೆಯು ಸತ್ಯ, ನ್ಯಾಯ ಮತ್ತು ಶಾಂತಿಗೆ ಸಾಕ್ಷಿಯಾಗುವ ಜವಾಬ್ದಾರಿಯ ಬಗ್ಗೆ ಎಂದಿಗಿಂತಲೂ ಹೆಚ್ಚು ಅರಿವು ಹೊಂದಿದೆ ಎಂದು ಧರ್ಮಾಧ್ಯಕ್ಷರಾದ ಪಿಸಾರವರು ತೀರ್ಮಾನಿಸಿದರು. ತಂಜಾನಿಯಾದಲ್ಲಿರುವ ಧರ್ಮಸಭೆ, ನಾಯಕರು ಹಿಂಸಾಚಾರಕ್ಕೆ ಕ್ಷಮೆಯಾಚಿಸಬೇಕು ಮತ್ತು ಈ ವಿಪತ್ತಿನ ತನಿಖೆಗಾಗಿ ಸ್ವತಂತ್ರ ಸಮಿತಿಯನ್ನು ತಕ್ಷಣವೇ ಸ್ಥಾಪಿಸಬೇಕು ಎಂದು ಜೋರಾಗಿ ಕರೆ ನೀಡುತ್ತಿದೆ ಎಂದು ಅವರು ಹೇಳಿದರು.