‘ನಮ್ಮ ಮನೆ ಮಾರಾಟಕ್ಕಿಲ್ಲ’: ಗ್ರೀನ್ ಲ್ಯಾಂಡಿನ ನುಕ್ ಧರ್ಮಕೇಂದ್ರದ ಗುರುಗಳು

ಲೇಖಕರು: ವ್ಯಾಲೆರಿಯೊ ಪಲೊಂಬಾರೊ

“ನಮ್ಮ ಭವಿಷ್ಯವನ್ನು ನಾವು ತಾವೇ ಆಯ್ಕೆಮಾಡಿಕೊಳ್ಳಲು ಬಯಸುತ್ತೇವೆ.”

ಆರ್ಕ್ಟಿಕ್ ಪ್ರದೇಶದ ಮೇಲೆ ಜಾಗತಿಕ ರಾಜಕೀಯ ಗಮನ ಹೆಚ್ಚುತ್ತಿರುವ ಈ ಸಂದರ್ಭದಲ್ಲಿ, ಗ್ರೀನ್‌ಲ್ಯಾಂಡ್‌ನ ನುಕ್ ನಗರದ ಧರ್ಮಕೇಂದ್ರದ ಧರ್ಮಗುರು, ದ್ವೀಪದ ಜನರು ತಮ್ಮ ಭವಿಷ್ಯವನ್ನು ತಾವೇ ನಿರ್ಧರಿಸಬೇಕು ಎಂದು ಸ್ಪಷ್ಟವಾಗಿ ಹೇಳಿದ್ದಾರೆ. ಗ್ರೀನ್‌ಲ್ಯಾಂಡ್ ಅನ್ನು ಕೇವಲ ತಂತ್ರಾತ್ಮಕ ಸಂಪತ್ತಾಗಿ ಕಾಣಬಾರದು ಎಂಬುದು ಅವರ ಸಂದೇಶ.

“ಗ್ರೀನ್‌ಲ್ಯಾಂಡ್‌ನ ಭವಿಷ್ಯವನ್ನು ನಾವು ತಾವೇ ಆಯ್ಕೆ ಮಾಡಿಕೊಳ್ಳಲು ಬಯಸುತ್ತೇವೆ,” ಎಂದು ಹೇಳುತ್ತಾರೆ ಸ್ಲೋವೇನಿಯಾ ಮೂಲದ ಫ್ರಾನ್ಸಿಸ್ಕನ್ ಸಭೆಯ ವಂದನೀಯ ಗುರು ತೋಮಾಜ್ ಮಾಯ್ಚೆನ್. ಕಳೆದ ಎರಡು ವರ್ಷಗಳಿಂದ ಅವರು ನುಕ್‌ನ ಕ್ರಿಸ್ತರಾಜ ಧರ್ಮಸಭೆಯಲ್ಲಿ ಸೇವೆ ಸಲ್ಲಿಸುತ್ತಿದ್ದಾರೆ. ಇದು ಗ್ರೀನ್‌ಲ್ಯಾಂಡ್‌ನಾದ್ಯಂತ ಇರುವ ಏಕೈಕ ಲ್ಯಾಟಿನ್ ಕಥೋಲಿಕ ಧರ್ಮಕೇಂದ್ರವಾಗಿದೆ.

ಸುಮಾರು 20,000 ಜನಸಂಖ್ಯೆಯ ನುಕ್ ನಗರದಲ್ಲಿ ಹೊರಗಣ ಶಾಂತಿ ಕಂಡರೂ, ಒಳಗೊಳಗೆ ಗಟ್ಟಿಯಾದ ದೃಢನಿಶ್ಚಯ ಮತ್ತು ಒತ್ತಡ ಇದೆ ಎಂದು ಅವರು ವಿವರಿಸುತ್ತಾರೆ. ಅಪರೂಪದ ಖನಿಜಗಳು ಮತ್ತು ಶಕ್ತಿ ಸಂಪನ್ಮೂಲಗಳ ಕಾರಣದಿಂದಾಗಿ ಗ್ರೀನ್‌ಲ್ಯಾಂಡ್‌ ಮೇಲಿನ ಜಾಗತಿಕ ಆಸಕ್ತಿ, 56,000 ಜನರಿರುವ ಈ ದ್ವೀಪದಲ್ಲಿ ಅಶಾಂತಿಯನ್ನು ಹುಟ್ಟಿಸಿದೆ.

‘ನಾವು ಒಂದು ಜನಾಂಗ – ಆಸ್ತಿ ಅಲ್ಲ’

ವಿದೇಶಿ ನಾಯಕರು ಗ್ರೀನ್‌ಲ್ಯಾಂಡ್ ಅನ್ನು “ಸ್ವತ್ತು ಅಥವಾ ಶಕ್ತಿಯ ಕೇಂದ್ರ”ದಂತೆ ಕಂಡಾಗ ಜನರ ಮನಸ್ಸಿಗೆ ನೋವಾಗುತ್ತದೆ ಎಂದು ವಂದನೀಯ ಗುರು ಮಾಯ್ಚೆನ್ ಹೇಳಿದ್ದಾರೆ. “ಇದು ಅವರ ಘನತೆಗೆ ಧಕ್ಕೆ ತರುತ್ತದೆ. ತಮ್ಮದೇ ಇತಿಹಾಸ, ಭಾಷೆ, ಸಂಸ್ಕೃತಿ ಮತ್ತು ನಂಬಿಕೆಯುಳ್ಳ ಜನರಾಗಿರುವುದಾಗಿ ಗುರುತಿಸಬೇಕೆಂಬುದು ಜನರ ಆಶಯ,” ಎಂದು ಅವರು ಹೇಳಿದ್ದಾರೆ.

ಭಯಕ್ಕಿಂತಲೂ ಜನರಲ್ಲಿ ಒಗ್ಗಟ್ಟಿನ ಭಾವನೆ ಹೆಚ್ಚುತ್ತಿದೆ ಎಂದು ಅವರು ಗಮನಿಸುತ್ತಾರೆ. “ಇಲ್ಲಿನ ಜನರು ಜೋರಾಗಿ ಮಾತನಾಡುವವರಲ್ಲ. ಅವರು ಗಮನಿಸುತ್ತಾರೆ, ಕೇಳುತ್ತಾರೆ, ನಂತರ ಮಾತಾಡುತ್ತಾರೆ. ಆದರೆ ಇತ್ತೀಚೆಗೆ ರಾಜಕೀಯ ಚರ್ಚೆಗಳು ಅಂಗಡಿಗಳಲ್ಲೂ, ಕಾಫಿ ಮೇಜುಗಳ ಬಳಿಯೂ ನಡೆಯುತ್ತಿವೆ. ಕಾರಣ – ಹೊರಗಿನವರು ಗ್ರೀನ್‌ಲ್ಯಾಂಡ್ ಬಗ್ಗೆ ಅರ್ಥಮಾಡಿಕೊಳ್ಳದೇ ಮಾತನಾಡುತ್ತಿದ್ದಾರೆ.”

ನಂಬಿಕೆಯೊಳಗಿನ ಒಗ್ಗಟ್ಟು

ಈ ಒಗ್ಗಟ್ಟು ನಂಬಿಕೆಯ ಮೂಲಕ ಮತ್ತಷ್ಟು ಬಲಗೊಳ್ಳುತ್ತಿದೆ. ಗ್ರೀನ್‌ಲ್ಯಾಂಡ್‌ನ ಸುಮಾರು 90 ಶೇಕಡಾ ಜನರು ಇವಾಂಜೆಲಿಕಲ್ ಲೂಥರನ್ ಧರ್ಮಸಭೆಗೆ ಸೇರಿದ್ದಾರೆ. ಅದು ಜನರ ಇತಿಹಾಸ ಮತ್ತು ಗುರುತಿನ ಭಾಗವಾಗಿದೆ. ಕಥೋಲಿಕ ಕ್ರೈಸ್ತರು ಅಲ್ಪಸಂಖ್ಯಾತರು – ನುಕ್‌ನಲ್ಲಿ ಸುಮಾರು 500, ದ್ವೀಪದಾದ್ಯಂತ ಸುಮಾರು 800 ಜನರು – ಆದರೆ “ಸಣ್ಣದಾದರೂ ಚೈತನ್ಯಭರಿತ ಸಮುದಾಯ” ಎಂದು ವಂದನೀಯ ಗುರು ವಿವರಿಸುತ್ತಾರೆ.

ಈ ಸಮಯದಲ್ಲಿ ಧರ್ಮಸಭೆಯ ಧ್ವನಿ ಅತ್ಯಂತ ಮಹತ್ವದ್ದು ಎಂದು  ಹೇಳಿದರು. “ಭೂಮಿ ಎಂದರೆ ಕೇವಲ ಭೂಮಿ ಅಲ್ಲ. ಅದು ಸ್ಮೃತಿ, ಪೂರ್ವಜರು ಮತ್ತು ಮುಂದಿನ ಪೀಳಿಗೆಯ ಹೊಣೆಗಾರಿಕೆ,” ಎಂದು ಅವರು ನೆನಪಿಸುತ್ತಾರೆ. ಗ್ರೀನ್‌ಲ್ಯಾಂಡ್‌ನ ಧರ್ಮಕೇಂದ್ರಗಳಲ್ಲಿ ಶಾಂತಿ, ಡೆನ್ಮಾರ್ಕ್ ರಾಜ್ಯ ಮತ್ತು ಸ್ವಾಯತ್ತ ಸರ್ಕಾರಕ್ಕಾಗಿ ನಿರಂತರವಾಗಿ ಪ್ರಾರ್ಥನೆ ನಡೆಯುತ್ತಿದೆ – ಇಂತಹ ಜಾಗತಿಕ ಒತ್ತಡದ ಕಾಲದಲ್ಲಿ ಇದು ಅಪೂರ್ವವಾದ ನಡೆ.

ಘನತೆ ಮತ್ತು ಹೊಣೆಗಾರಿಕೆ

ಇತ್ತೀಚಿನ ಘಟನೆಗಳು ಸ್ವಾತಂತ್ರ್ಯದ ಆಶಯವನ್ನು ಬಲಪಡಿಸಬಹುದು ಎಂದು ವಂದನೀಯ ಗುರು ಒಪ್ಪಿಕೊಳ್ಳುತ್ತಾರೆ. ಆದರೆ ಅವರು ವಾಸ್ತವಿಕತೆಯನ್ನೂ ಒತ್ತಿಹೇಳುತ್ತಾರೆ. “ಸ್ವಾತಂತ್ರ್ಯ ಎಂದರೆ ಕೇವಲ ಕನಸು ಅಲ್ಲ – ಅದು ದೊಡ್ಡ ಹೊಣೆಗಾರಿಕೆ. ಶಿಕ್ಷಣ, ಆರೋಗ್ಯ ಸೇವೆ, ಆರ್ಥಿಕ ವ್ಯವಸ್ಥೆ – ಎಲ್ಲವೂ ಮುಖ್ಯ.”

ಒಂದು ವಿಷಯ ಮಾತ್ರ ಸ್ಪಷ್ಟ: ಗ್ರೀನ್‌ಲ್ಯಾಂಡ್ ಜನರು ಒಂದು ಅವಲಂಬನೆಯಿಂದ ಮತ್ತೊಂದು ಅವಲಂಬನೆಗೆ ಬದಲಾವಣೆ ಬಯಸುವುದಿಲ್ಲ. “ಬಹುಜನರಿಗೆ ಸ್ವಾತಂತ್ರ್ಯ ಎಂದರೆ ಘನತೆ, ಸಂಸ್ಕೃತಿಯ ಉಳಿವು ಮತ್ತು ಆತ್ಮಗೌರವವಾಗಿದೆ.”

ಹಿಮದ ಮಧ್ಯೆ ಶಾಂತಿ

ಹವಾಮಾನ ಬದಲಾವಣೆ ಇಲ್ಲಿ ದಿನನಿತ್ಯದ ಅನುಭವವಾಗಿದೆ. “ಇದು ಕೇವಲ ಸಿದ್ಧಾಂತವಲ್ಲ. ಕಣ್ಣಾರೆ ನೋಡಬಹುದಾದ ವಾಸ್ತವ. ಹಿಮದ ರಚನೆ ಬದಲಾಗುತ್ತಿದೆ, ಋತುಚಕ್ರ ಬದಲಾಗುತ್ತಿದೆ, ಪ್ರಕೃತಿ ಹಿಂದಿನಂತೆ ವರ್ತಿಸುತ್ತಿಲ್ಲ ಎಂದು ಬೇಟೆಗಾರರು ಹೇಳುತ್ತಿದ್ದಾರೆ” ಎಂದು ಅವರು ಹೇಳಿದ್ದಾರೆ.

ಹಿಮದ ಮಧ್ಯೆ ಬದುಕುವುದು ಅನಗತ್ಯವನ್ನೆಲ್ಲ ತೆಗೆದುಹಾಕುತ್ತದೆ. “ಒಬ್ಬ ಯಾಜಕನಾಗಿ, ಈ ನೆಲವೇ ನನಗೆ ಪ್ರಾರ್ಥನೆಯನ್ನು ಕಲಿಸುತ್ತದೆ ಎಂಬ ಅನುಭವ ನನಗೆ ಆಗಾಗ ಬರುತ್ತದೆ,” ಎಂದು ಹೇಳಿದರು. “ಮೌನ, ವಿಶಾಲತೆ, ನಾಜೂಕು — ಇವೆಲ್ಲವೂ ನಮಗೆ ವಿನಯವನ್ನು ಕಲಿಸುತ್ತವೆ.”

“ಗ್ರೀನ್‌ಲ್ಯಾಂಡ್‌ನ ರಾಜಕೀಯ ಹಾಗೂ ಆರ್ಥಿಕ ನಿರ್ಧಾರಗಳು ಆತುರದ ಲಾಭಕ್ಕಾಗಿ ಅಲ್ಲ, ದೀರ್ಘಕಾಲೀನ ಹೊಣೆಗಾರಿಕೆಯನ್ನು ನೆಲೆಸಿಕೊಂಡು, ನಿಧಾನವಾಗಿ ಮತ್ತು ವಿವೇಕಪೂರ್ವಕವಾಗಿ ತೆಗೆದುಕೊಳ್ಳಬೇಕು. ಈ ನೆಲ ಒಮ್ಮೆ ಹಾನಿಗೊಳಗಾದರೆ, ಅದನ್ನು ಸುಲಭವಾಗಿ ಮರುಸ್ಥಾಪಿಸಲು ಸಾಧ್ಯವಿಲ್ಲ,” ಎಂದು ಅವರು ಎಚ್ಚರಿಸುತ್ತಾರೆ.

ನಮ್ಮ ಲೇಖನವನ್ನು ಓದಿದ್ದಕ್ಕಾಗಿ ಧನ್ಯವಾದಗಳು. ನಮ್ಮ ದೈನಂದಿನ ಸುದ್ದಿಪತ್ರಕ್ಕೆ ಚಂದಾದಾರರಾಗುವ ಮೂಲಕ ನೀವು ಸದಾ ಇತ್ತೀಚಿನ ಮಾಹಿತಿಯನ್ನು ಪಡೆದುಕೊಳ್ಳಬಹುದು.(ಇಲ್ಲಿ ಕ್ಲಿಕ್ ಮಾಡಿ).