ಜನಪ್ರಿಯತಾವಾದ ಮತ್ತು ಯುದ್ಧಗಳ ನಡುವೆ ಯುರೋಪಿನ ಭವಿಷ್ಯದ ದೃಷ್ಟಿಕೋನವನ್ನು ಮಂಡಿಸಿದ COMECE
ಲೇಖಕರು: ದಾವಿದೆ ದಿಯೋನಿಸಿ
“ಇಂದಿನ ಭೇಟಿಯು ವಿಶೇಷವಾಗಿ ಆತ್ಮೀಯ, ನೇರ ಮತ್ತು ಚರ್ಚಿಸಲಾದ ವಿಷಯಗಳ ಕುರಿತು ಮುಕ್ತ ಮನಸ್ಸಿನದ್ದಾಗಿತ್ತು. ನಮ್ಮ ಕಾರ್ಯ ಮತ್ತು ಪೂಜ್ಯ ಜಗದ್ಗುರುಗಳು ತಮ್ಮ ಬೋಧನೆ, ನಿಲುವುಗಳು ಮತ್ತು ಉಪಕ್ರಮಗಳ ಮೂಲಕ ನೀಡುತ್ತಿರುವ ಸಾಕ್ಷ್ಯದ ನಡುವೆ ಆಳವಾದ ಹೊಂದಾಣಿಕೆ ಕಂಡುಬಂದಿತು.”
ಇವು, ಇಂದು ಬೆಳಿಗ್ಗೆ COMECE ಅಧ್ಯಕ್ಷ ಮಂಡಳಿಯು ಪೂಜ್ಯ ಜಗದ್ಗುರುಗಳಾದ 14ನೇ ಲಿಯೋ ಅವರನ್ನು ಭೇಟಿಯಾದ ನಂತರ, ವ್ಯಾಟಿಕನ್ ರೇಡಿಯೋ ಕೇಂದ್ರದ ಸಾಲಾ ಮಾರ್ಕೋನಿಯಲ್ಲಿ ನಡೆದ ಪತ್ರಿಕಾಗೋಷ್ಠಿಯಲ್ಲಿ, ಯುರೋಪಿಯನ್ ಒಕ್ಕೂಟದ ಧರ್ಮಾಧ್ಯಕ್ಷರ ಮಹಾಸಂಘಗಳ ಆಯೋಗದ (COMECE) ಅಧ್ಯಕ್ಷರಾದ ಧರ್ಮಾಧ್ಯಕ್ಷ ಮರಿಯಾನೊ ಕ್ರೋಚಿಯಾತಾ ಅವರು ಹೇಳಿದ ಮಾತುಗಳಾಗಿವೆ.
ಯುರೋಪಿಯನ್ ಒಕ್ಕೂಟದ ಧ್ಯೇಯದ ದುರ್ಬಲತೆ
“ಯುರೋಪಿಯನ್ ಒಕ್ಕೂಟವು,” ಎಂದು ಧರ್ಮಾಧ್ಯಕ್ಷ ಕ್ರೋಚಿಯಾತಾ ಹೇಳಿದರು, “ಶಾಂತಿಯ ಯೋಜನೆಯಾಗಿ ಹುಟ್ಟಿಕೊಂಡದ್ದು. ಶಾಂತಿಯೇ ಅದರ ಮೂಲವೂ ಅದರ ಅಸ್ತಿತ್ವದ ಗುರುತೂ ಆಗಿದೆ. ಆದ್ದರಿಂದ, ದೇಶಗಳು ಮತ್ತು ಅಂತರರಾಷ್ಟ್ರೀಯ ಸಂಸ್ಥೆಗಳ ನಡುವೆ ಸಂವಾದವನ್ನು ಉತ್ತೇಜಿಸುವ ಕರ್ತವ್ಯ ಅದಕ್ಕಿದೆ. ಅದೇ ಸಮಯದಲ್ಲಿ, ಪೂಜ್ಯ ಜಗದ್ಗುರುಗಳು ಸ್ಪಷ್ಟವಾಗಿ ಸ್ಮರಿಸಿದಂತೆ, ಬಹುಪಕ್ಷೀಯ ಸಹಕಾರವನ್ನೂ ಅದು ಬೆಳೆಸಬೇಕು.”
ಅದೇ ವೇಳೆ, ತೀವ್ರ ಧ್ರುವೀಕರಣದಿಂದ ಗುರುತಿಸಲ್ಪಟ್ಟಿರುವ ಇಂದಿನ ಜಗತ್ತಿನಲ್ಲಿ, “ಜನಪ್ರಿಯತಾವಾದದ ಪರಿಣಾಮದಿಂದಲೂ ಏಕತೆಯ ಕೊರತೆ ಉಂಟಾಗಿರುವುದರಿಂದ, ಯುರೋಪಿಯನ್ ಒಕ್ಕೂಟದ ಧ್ಯೇಯ ದುರ್ಬಲಗೊಳ್ಳುತ್ತಿದೆ” ಎಂದು COMECE ಅಧ್ಯಕ್ಷರು ತಿಳಿಸಿದರು.
ಮೌಲ್ಯಗಳ ಉತ್ತೇಜನ
ಧರ್ಮಾಧ್ಯಕ್ಷ ಕ್ರೋಚಿಯಾತಾ ಅವರ ಅಭಿಪ್ರಾಯದಲ್ಲಿ, “ಇಂದು ನಮ್ಮನ್ನು ಕಾಡುತ್ತಿರುವ ಪ್ರಶ್ನೆಗಳ ಮೇಲೆ ಅನ್ವಯವಾಗುವ ಸುವಾರ್ತೆಯ ವಾಕ್ಯಗಳು ಮತ್ತು ಧರ್ಮಸಭೆಯ ಸಾಮಾಜಿಕ ಬೋಧನೆಗಳು” ಇನ್ನೂ ಮೂಲಭೂತ ಮಹತ್ವವನ್ನು ಹೊಂದಿವೆ.
COMECE ಅಧ್ಯಕ್ಷರು ಒತ್ತಿಹೇಳಿದಂತೆ, ಇದೇ ಮುಖ್ಯ ಅಂಶವಾಗಿದೆ. “ಭಯ, ಅನುಕೂಲತೆ ಅಥವಾ ಇನ್ನೂ ಕೆಟ್ಟದಾಗಿ ರಾಜಕೀಯ ಒಲವುಗಳ ಕಾರಣದಿಂದ ನಾವು ಇದರಿಂದ ಹಿಂದೆ ಸರಿಯಲು ಸಾಧ್ಯವಿಲ್ಲ. ನಮ್ಮ ಕರ್ತವ್ಯವು ವಿಭಜನೆಗಳು, ಬಹುಮತಗಳು ಮತ್ತು ಅಲ್ಪಸಂಖ್ಯಾತರನ್ನು ಮೀರಿ ಹೋಗುತ್ತದೆ. ಅದು ಮಾನವಕುಲ ಮತ್ತು ಇಂದಿನ ಯುರೋಪಿನ ಸೇವೆಗೆ ಅಗತ್ಯವಾದ ಮೌಲ್ಯಗಳನ್ನು ಉತ್ತೇಜಿಸುವುದಾಗಿದೆ.”
2027ರ ಶರತ್ಕಾಲದಲ್ಲಿ “ರೀಥಿಂಕಿಂಗ್ ಯುರೋಪ್” ಕಾರ್ಯಕ್ರಮದ ಹೊಸ ಆವೃತ್ತಿಯನ್ನು ಆಯೋಜಿಸುವ ಪ್ರಸ್ತಾವನೆಯನ್ನು ಧರ್ಮಾಧ್ಯಕ್ಷರು ಪೂಜ್ಯ ಜಗದ್ಗುರುಗಳಿಗೆ ಸಲ್ಲಿಸಿದ್ದಾಗಿ ಧರ್ಮಾಧ್ಯಕ್ಷ ಕ್ರೋಚಿಯಾತಾ ಮತ್ತಷ್ಟು ವಿವರಿಸಿದರು.
ಮೊದಲ ಆವೃತ್ತಿ ನಡೆದದ್ದು ಈಗಾಗಲೇ ಹತ್ತು ವರ್ಷಗಳು ಪೂರ್ಣಗೊಳ್ಳುತ್ತಿರುವ ಹಿನ್ನೆಲೆಯಲ್ಲಿ ಈ ಕಾರ್ಯಕ್ರಮವನ್ನು ಆಯೋಜಿಸಲು ಉದ್ದೇಶಿಸಲಾಗಿದೆ. ಆ ಮೊದಲ ಕಾರ್ಯಕ್ರಮದಲ್ಲಿ ವ್ಯಾಟಿಕನ್ನಲ್ಲಿ ಸುಮಾರು 300 ಮಂದಿ ಭಾಗವಹಿಸಿದ್ದರು. ಅದರಲ್ಲಿ ಯುರೋಪಿಯನ್ ಒಕ್ಕೂಟ ಮತ್ತು ಅದರ ಸದಸ್ಯ ರಾಷ್ಟ್ರಗಳ ರಾಜಕೀಯ ಪ್ರತಿನಿಧಿಗಳು, ಶಿಕ್ಷಣತಜ್ಞರು ಮತ್ತು ವಿವಿಧ ಧರ್ಮಸಭೆಗಳ ಪ್ರತಿನಿಧಿಗಳೂ ಸೇರಿದ್ದರು.
“ಈ ಕಾರ್ಯಕ್ರಮ, ಯುರೋಪ್ ಮತ್ತು ಇಡೀ ಜಗತ್ತು ಎದುರಿಸುತ್ತಿರುವ ಸವಾಲುಗಳ ಕುರಿತು ಚಿಂತನೆ ಮತ್ತು ಸಂವಾದ ನಡೆಸಲು ಅತ್ಯಂತ ಮಹತ್ವದ ಕ್ಷಣವಾಗಲಿದೆ” ಎಂದು ವಿವರಿಸಿದರು.
ಸಂವಾದ ಮತ್ತು ಶಾಂತಿಯುತ ಸಹಬಾಳ್ವೆ
COMECEಯ ಮೊದಲ ಉಪಾಧ್ಯಕ್ಷರೂ ಆಗಿರುವ ಡಿಜೋನ್ ಮಹಾಧರ್ಮಾಧ್ಯಕ್ಷ ಅಂಟೋಯಿನ್ ಹೆರೂಆರ್ಡ್ ಅವರು, “ಏಕತೆ ಮತ್ತು ಶಾಂತಿಯ ಮೇಲೆ ಆಧಾರಿತ ಯುರೋಪ್” ಎಂಬ ಕಲ್ಪನೆಯ ಕುರಿತು ಮಾತನಾಡಿದರು. “ಸಂವಾದ ಮತ್ತು ಶಾಂತಿಯುತ ಸಹಬಾಳ್ವೆಯನ್ನು ಉತ್ತೇಜಿಸುವ ಪರಿಸ್ಥಿತಿಗಳನ್ನು ನಿರ್ಮಿಸುವುದು,” ಎಂದು ಅವರು ಒತ್ತಿಹೇಳಿದರು, “ಕಾನೂನುಗಳು ಮತ್ತು ಸಂಸ್ಥೆಗಳನ್ನು ಮೀರಿದ ಜವಾಬ್ದಾರಿಯಾಗಿದೆ.”
“ಈ ವಿಷಯದಲ್ಲಿ, ವಿಶೇಷವಾಗಿ ಯುರೋಪ್ ಮತ್ತು ಮಧ್ಯಪ್ರಾಚ್ಯದಲ್ಲಿ ಯುದ್ಧಗಳಿಂದ ಗುರುತಿಸಲ್ಪಟ್ಟಿರುವ ಈ ಐತಿಹಾಸಿಕ ಸಂದರ್ಭದಲ್ಲಿ ಅನೇಕ ದೇಶಗಳು ಮತ್ತು ಖಂಡಗಳು ಯುರೋಪಿನತ್ತ ನಿರೀಕ್ಷೆಯಿಂದ ನೋಡುತ್ತಿವೆ”ಎಂದು ಮಹಾಧರ್ಮಾಧ್ಯಕ್ಷರು ಉಲ್ಲೇಖಿಸಿದರು.
ಧರ್ಮಸಭೆಯಾಗಿ, ನಾವು ಬದುಕಿ ಸಾಕ್ಷಿಯಾಗಬೇಕಾದ ವಾಸ್ತವಿಕತೆಯಿದು ಎಂದು ಅವರು ಗಮನಿಸಿದರು. “ನಾವು ರಾಜಕೀಯ ಪಾತ್ರಧಾರಿಗಳಲ್ಲ ಮತ್ತು ರಾಜಕೀಯ ಫಲಿತಾಂಶಗಳನ್ನು ಹುಡುಕುವುದಿಲ್ಲ,” ಎಂದು ಅವರು ಹೇಳಿದರು, “ಆದರೆ ಕೆಲವು ತತ್ವಗಳು ಯುರೋಪಿಯನ್ ಯೋಜನೆಯೊಂದಿಗೆ ಹೊಂದಾಣಿಕೆಯಾಗಿವೆ ಎಂಬುದನ್ನು ನಾವು ಗುರುತಿಸುತ್ತೇವೆ.”
ವಲಸಿಗರು ಮತ್ತು ಜನಪ್ರಿಯತಾವಾದ
ಯುರೋಪಿಯನ್ ಒಕ್ಕೂಟದ ಧರ್ಮಾಧ್ಯಕ್ಷರ ಉಪಾಧ್ಯಕ್ಷರಾದ ಕೋಪನ್ಹೇಗನ್ ಧರ್ಮಾಧ್ಯಕ್ಷ ಚೆಸ್ಲಾವ್ ಕೊಜೋನ್ ಅವರು ವಲಸಿಗರ ಪರಿಸ್ಥಿತಿಯ ಕುರಿತು ಗಮನಹರಿಸಿದರು ಮತ್ತು “ದುರದೃಷ್ಟವಶಾತ್, ವಲಸಿಗರನ್ನು ಅನೇಕ ಬಾರಿ ಬಲಿಪಶುಗಳಾಗಿ, ಸಮಾಜದ ಶತ್ರುಗಳಾಗಿ ಚಿತ್ರಿಸಲಾಗುತ್ತಿದೆ” ಎಂದು ವಿಷಾದ ವ್ಯಕ್ತಪಡಿಸಿದರು.
“ವಲಸೆ ಸಮಸ್ಯೆ ಹಲವು ದಶಕಗಳಿಂದ ಅಸ್ತಿತ್ವದಲ್ಲಿದೆ ಮತ್ತು ಎಲ್ಲರಿಗೂ ಪರಿಚಿತವಾಗಿದೆ,” ಎಂದು ಅವರು ಒಪ್ಪಿಕೊಂಡರು. “ಆದರೆ, ಹೋಲಿಕೆಗೆ ಹೊಸದಾಗಿ ಕಾಣಿಸುತ್ತಿರುವುದು ಜನಪ್ರಿಯತಾವಾದವು ಇದನ್ನು ಬಳಸುವ ವಿಧಾನವಾಗಿದೆ; ಅನೇಕ ಸಮಾಜಗಳಿಗೆ ಇದು ಒಂದು ಬೆದರಿಕೆಯಾಗಿದೆ ಎಂದು ರೂಪಿಸಲಾಗುತ್ತಿದೆ” ಎಂದು ಹೇಳಿದರು.
“ಕಥೋಲಿಕ ಧರ್ಮಸಭೆ, ವಿಶೇಷವಾಗಿ ಉತ್ತರ ಯುರೋಪಿನ ದೇಶಗಳಲ್ಲಿ, ಬಹುಪಾಲು — ಕೆಲವು ಸಂದರ್ಭಗಳಲ್ಲಿ ಮುಖ್ಯವಾಗಿ — ವಲಸಿಗರಿಂದಲೇ ಕೂಡಿದೆ,” ಎಂದು ಧರ್ಮಾಧ್ಯಕ್ಷ ಕೊಜೋನ್ ಸ್ಮರಿಸಿದರು. “ಅವರನ್ನು ಕೇವಲ ಮಾನವೀಯ ಕಾರಣಗಳಿಗಾಗಿ ಮಾತ್ರವಲ್ಲ, ಧರ್ಮಸಭೆಯ ಜೀವಂತ ಅಂಗಗಳಾಗಿ ಸ್ವಾಗತಿಸಲಾಗಿದೆ.”
“ಅವರ ಉಪಸ್ಥಿತಿಯು ಒಂದು ಶ್ರೀಮಂತಿಕೆಯಾಗಿಯೇ ಕಾಣಲ್ಪಡುತ್ತದೆ,ಕೆಲವು ಧರ್ಮಕೇಂದ್ರಗಳು ಅಳಿದುಹೋಗುವ ಸ್ಥಿತಿಗೆ ತಲುಪಿದ್ದ ಸಂದರ್ಭಗಳಲ್ಲಿ, ವಲಸಿಗರ ಆಗಮನವು ಹೊಸ ಜೀವ ತುಂಬಿತು.”
“ಈ ಕಾರಣಕ್ಕಾಗಿ, ಉತ್ತರ ದೇಶಗಳ ಧರ್ಮಸಭೆಯಾಗಿ, ವಲಸಿಗರೊಂದಿಗೆ ನಿಲ್ಲಲು ನಮಗೆ ಕನಿಷ್ಠ ಎರಡು ಕಾರಣಗಳಿವೆ: ಒಂದೆಡೆ ಮಾನವೀಯ ಕಾರಣಗಳು, ಮತ್ತೊಂದೆಡೆ ನಿಜವಾದ ಧಾರ್ಮಿಕ ಕಾರಣಗಳು.”
ನಮ್ಮ ಲೇಖನವನ್ನು ಓದಿದ್ದಕ್ಕಾಗಿ ಧನ್ಯವಾದಗಳು. ನಮ್ಮ ದೈನಂದಿನ ಸುದ್ದಿಪತ್ರಕ್ಕೆ ಚಂದಾದಾರರಾಗುವ ಮೂಲಕ ನೀವು ಸದಾ ಇತ್ತೀಚಿನ ಮಾಹಿತಿಯನ್ನು ಪಡೆದುಕೊಳ್ಳಬಹುದು.(ಇಲ್ಲಿ ಕ್ಲಿಕ್ ಮಾಡಿ).
