ಜಗದ್ಗುರುಗಳ ಮನೆತನದ ಗೌರವಾನ್ವಿತ ಸೇವಕರಿಗೆ ಜಗದ್ಗುರು XIVನೇ ಲಿಯೋರವರ ಪ್ರೋತ್ಸಾಹ
ವ್ಯಾಟಿಕನ್ ವರದಿ
ಫೆಬ್ರವರಿ 1ರಂದು ಪ್ರೇಷಿತರ ಅರಮನೆಯಲ್ಲಿ ನಡೆದ ವಿಶಿಷ್ಟ ಭಾನುವಾರದ ಭೇಟಿಯಲ್ಲಿ, ಜಗದ್ಗುರು XIVನೇ ಲಿಯೋರವರು ಜಗದ್ಗುರುಗಳ ಮನೆತನದ ಸಜ್ಜನರು, ಅಧಿಕಾರಿಗಳು ಹಾಗೂ ‘ಸೆಡಿಯಾರಿ’ ಎಂದು ಕರೆಯಲ್ಪಡುವ ಜಗದ್ಗುರುಗಳ ಆಸನ ಹೊರುವವರನ್ನು ಭೇಟಿಯಾದರು.
ಈ ಸಂದರ್ಭದಲ್ಲಿ ಜಗದ್ಗುರುಗಳು, ಜಗದ್ಗುರುಗಳ ಮನೆತನದ ಪ್ರಿಫೆಕ್ಚರ್ನ ರೀಜೆಂಟ್ ಮೋನ್ಸಿನಿಯರ್ ಲಿಯೋನಾರ್ಡೊ ಸಪಿಯೆನ್ಜಾ ಹಾಗೂ ಉಪ-ರೀಜೆಂಟ್ ಆಗಸ್ಟಿನಿಯನ್ ಯಾಜಕರು ಎಡ್ವರ್ಡ್ ಡಾಲೆಂಗ್ ರವರ ಮಾರ್ಗದರ್ಶನದಲ್ಲಿ, ಜಗದ್ಗುರುಗಳಿಗೆ ನಿಷ್ಠೆಯ ಮನೋಭಾವದೊಂದಿಗೆ ಪ್ರತಿದಿನವೂ ನಡೆಯುತ್ತಿರುವ ಇವರ ಸೇವೆಗೆ ಹೃತ್ಪೂರ್ವಕ ಕೃತಜ್ಞತೆಯನ್ನು ವ್ಯಕ್ತಪಡಿಸಿದರು.
ಈ ಸೇವೆಯು ತನ್ನ ಪ್ರೇಷಿತರ ಧರ್ಮಕಾರ್ಯವನ್ನು ದಿನನಿತ್ಯ ಸಹಗಮಿಸುವ ಮತ್ತು ಬೆಂಬಲಿಸುವ ಸಮರ್ಪಣೆ ಎಂದು ಜಗದ್ಗುರುಗಳು ವಿವರಿಸಿದರು. ರಾಜ್ಯಭೇಟಿಗಳು, ಸಾರ್ವಜನಿಕ ಭೇಟಿಗಳು, ಅತ್ಯಂತ ಭವ್ಯ ಸಂದರ್ಭಗಳು ಮತ್ತು ಸರಳ ಆತ್ಮೀಯ ಭೇಟಿಗಳಲ್ಲಿಯೂ ಜಗದ್ಗುರುಗಳನ್ನು ಭೇಟಿಯಾಗುವ ಎಲ್ಲರ ಹಿತಕ್ಕಾಗಿ ಈ ಸೇವೆ ನೆರವಾಗುತ್ತಿದೆ ಎಂದು ಅವರು ಹೇಳಿದರು.
ಜಗದ್ಗುರು XIVನೇ ಲಿಯೋರವರು ಇವರ ಕಾರ್ಯವನ್ನು ಮೂರು ಕ್ರಿಯಾಪದಗಳಲ್ಲಿ ಸಾರಬಹುದು ಎಂದರು: ಸಿದ್ಧಪಡಿಸುವುದು, ಸ್ವಾಗತಿಸುವುದು ಮತ್ತು ಅಭಿನಂದಿಸುವುದು. ಭೇಟಿಯ ಗುಣಮಟ್ಟವು ಅದರ ಸಿದ್ಧತೆಯಲ್ಲಿ ತೋರಿಸುವ ಕಾಳಜಿಯಿಂದಲೇ ಆರಂಭವಾಗುತ್ತದೆ, ಅತಿ ಸಣ್ಣ ವಿವರಗಳಲ್ಲಿಯೂ ಈ ಜಾಗ್ರತೆ ಅಗತ್ಯವೆಂದು ಅವರು ತಿಳಿಸಿದರು.
ಈ ಸೇವೆ ಎಚ್ಚರಿಕೆ ಮತ್ತು ವಿನಯವನ್ನು ಬೇಡುವುದಾಗಿ ಜಗದ್ಗುರುಗಳು ಹೇಳಿದರು. ಜಗದ್ಗುರುಗಳ ಅಧಿಕಾರ ಹುದ್ದೆಯಲ್ಲಿ ಇತಿಹಾಸ ಮತ್ತು ಕಲೆಯಿಂದ ಸಮೃದ್ಧವಾದ ವಾತಾವರಣದಲ್ಲಿ ಕಾರ್ಯನಿರ್ವಹಿಸುವವರು, ಭವ್ಯವಾದರೂ ಕೃತಕವಲ್ಲದ, ಸೊಗಸಾದರೂ ಅತಿಶಯವಿಲ್ಲದ ಸ್ವಾಗತ ಮತ್ತು ಅಭಿನಂದನೆಯ ಸಂಕೆತಗಳ ಮೂಲಕ ಎಲ್ಲರಿಗೂ ಆತ್ಮೀಯತೆಯನ್ನು ತಲುಪಿಸಬೇಕೆಂದು ಅವರು ಒತ್ತಿಹೇಳಿದರು.
ರಾಜಕುಮಾರನಾಗಲಿ ಅಥವಾ ತೀರ್ಥಯಾತ್ರಿಕನಾಗಲಿ, ಪಿತಾಮಹನಾಗಲಿ ಅಥವಾ ಸಹಾಯ ಯಾಚಿಸುವವನಾಗಲಿ ಎಲ್ಲರಿಗೂ ಒಂದೇ ರೀತಿಯ ಗೌರವ ಮತ್ತು ಪ್ರೀತಿಯಿಂದ ಸೇವೆ ಸಲ್ಲಿಸುವುದೇ ಇವರ ವೈಶಿಷ್ಟ್ಯ ಎಂದು ಜಗದ್ಗುರುಗಳು ಮೆಚ್ಚುಗೆ ವ್ಯಕ್ತಪಡಿಸಿದರು.
ಅಂತಿಮವಾಗಿ, ಜಗದ್ಗುರುಗಳ ಪ್ರೋಟೋಕಾಲ್ಗೆ ವೈಶಿಷ್ಟ್ಯವಾದ ಸೌಮ್ಯ ಸೌಂದರ್ಯ ಪ್ರತಿಯೊಂದು ಅವರ ಸಂಕೆತದಲ್ಲಿಯೂ ಪ್ರತಿಬಿಂಬಿಸುತ್ತಿದೆ ಎಂದು ಜಗದ್ಗುರುಗಳು ಹೇಳಿದರು. ಈ ಗೌರವ ಸೇವೆಗೆ ವೃತ್ತಿಪರ ನೈತಿಕತೆ ಮಾತ್ರವಲ್ಲ, ದೃಢವಾದ ವಿಶ್ವಾಸವೂ ಅಗತ್ಯವೆಂದು ನೆನಪಿಸಿ, ಕ್ರಿಸ್ತನಿಗೆ, ಧರ್ಮ ಸಭೆಗೆ ಮತ್ತು ಜಗದ್ಗುರುಗಳಿಗೆ ಇರುವ ಭಕ್ತಿಯೇ ಇವರ ಸೇವೆಗೆ ಜೀವಾಳ ಎಂದು ಹೇಳಿದರು. ತಮ್ಮ ಪಾತ್ರಕ್ಕೆ ಅನುಗುಣವಾಗಿ ನಿಷ್ಠೆಯಿಂದ ಸೇವೆಯನ್ನು ಮುಂದುವರಿಸಬೇಕೆಂದು ಪ್ರೋತ್ಸಾಹಿಸಿ, ಎಲ್ಲರಿಗೂ ಮತ್ತು ಅವರ ಕುಟುಂಬಗಳಿಗೆ ಪ್ರೇಷಿತರ ಆಶೀರ್ವಾದವನ್ನು ಜಗದ್ಗುರು XIV ನೇ ಲಿಯೋರವರು ನೀಡಿದರು.
