ಜಗದ್ಗುರು XIVನೇ ಲಿಯೋರವರು: ಸತ್ಯವು ತನ್ನ ನಿಜವಾದ ಗುರುತನ್ನು ಯೇಸು ಕ್ರಿಸ್ತನ ವ್ಯಕ್ತಿತ್ವದಲ್ಲೇ ಕಂಡುಕೊಳ್ಳುತ್ತದೆ.
ವ್ಯಾಟಿಕನ್ ವರದಿ
ಜ್ಞಾನ ವಿಭಜನೆ, ಸಾಪೇಕ್ಷತಾವಾದ ಮತ್ತು ತಿಳುವಳಿಕೆಯನ್ನು ಕೇವಲ ಉಪಯೋಗದ ಸಾಧನವಾಗಿ ಬಳಸುವ ಸಾಂಸ್ಕೃತಿಕ ಪರಿಸ್ಥಿತಿಯ ನಡುವೆ, [ಜಗದ್ಗುರು XVIನೇ ಬೆನೆಡಿಕ್ಟ್ ರವರ ವಿಶ್ವಪತ್ರಿಕೆ] ಕ್ಯಾರಿಟೇಟ್ನಲ್ಲಿ ವೆರಿತಾಸ್ ಇನ್ನೂ ಶೈಕ್ಷಣಿಕ ಮತ್ತು ಪಾಸ್ತೋರಲ್ ವಿವೇಚನೆಗೆ ಮಾನದಂಡವಾಗಿಯೇ ಉಳಿದಿದೆ. ಜೊತೆಗೆ, ನೀವು “ಲೋಕದ ಬೆಳಕಾಗಿರಲು” ಕರೆಯಲ್ಪಟ್ಟಿರುವ ಭವಿಷ್ಯಕ್ಕಾಗಿ ಇದು ಒಂದು ಗಂಭೀರ ಕಾರ್ಯಕ್ರಮವಾಗಿಯೂ ಕಾರ್ಯನಿರ್ವಹಿಸುತ್ತದೆ ಎಂದು ಜಗದ್ಗುರು ಲಿಯೋರವರು ಹೇಳಿದರು.
ಬೊಲಿವಿಯಾದ ಕಥೋಲಿಕ ವಿಶ್ವವಿದ್ಯಾಲಯ “ಸಾನ್ ಪಾಬ್ಲೋ”ಯ 60ನೇ ವಾರ್ಷಿಕೋತ್ಸವದ ಅಂಗವಾಗಿ ಕಳುಹಿಸಿದ ಸಂದೇಶದಲ್ಲಿ ಜಗದ್ಗುರುಗಳ ಈ ಮಾತುಗಳನ್ನು ಒತ್ತಿಹೇಳಿದರು.
ಅವರು ತಮ್ಮ ಸಂದೇಶದ ಆರಂಭದಲ್ಲೇ, ಅರವತ್ತು ವರ್ಷಗಳನ್ನು ಸ್ಮರಿಸುವುದು ಎಂದರೆ ಧರ್ಮ ಸಭೆ ಮತ್ತು ಸಮಾಜಕ್ಕೆ ಸಲ್ಲಿಸಿದ ಫಲಪ್ರದ ಸೇವೆಯ ಪಯಣವನ್ನು ಗುರುತಿಸುವುದಾಗಿದೆ ಎಂದು ಹೇಳಿದರು.
ವಿಶ್ವವಿದ್ಯಾಲಯವು ತನ್ನ ಆಳವಾದ ಗುರುತಿನಲ್ಲಿ ಕೇವಲ ತಾಂತ್ರಿಕ ಶಿಕ್ಷಣ ನೀಡುವ ಕೇಂದ್ರವಲ್ಲ, ಅಥವಾ ಉಪಯೋಗಪರ ಜ್ಞಾನವನ್ನು ಉತ್ಪಾದಿಸುವ ಸ್ಥಳವಲ್ಲ, ಬದಲಾಗಿ ಮಾನವ ಗೌರವ ಮತ್ತು ಸಾಂಸ್ಕೃತಿಕ ಪರಂಪರೆಯ ರಕ್ಷಣೆಯಲ್ಲಿಯೂ ಅಭಿವೃದ್ಧಿಯಲ್ಲಿಯೂ ಕಟ್ಟುನಿಟ್ಟಾದ ಮತ್ತು ವಿಮರ್ಶಾತ್ಮಕ ರೀತಿಯಲ್ಲಿ ಕೊಡುಗೆ ನೀಡುವ ಶೈಕ್ಷಣಿಕ ಸಮುದಾಯವಾಗಿದೆ ಎಂದು ಅವರು ಒತ್ತಿಹೇಳಿದರು.
ನಿಜವಾದ ಶಿಕ್ಷಣವು ಸಂಪೂರ್ಣ ಮಾನವ ವ್ಯಕ್ತಿತ್ವವನ್ನು ರೂಪಿಸಬೇಕು
ವಿಶ್ವವಿದ್ಯಾಲಯಗಳ ಉದ್ದೇಶ ವ್ಯಕ್ತಿಯ ಸಮಗ್ರ ರೂಪುಗೊಳಿಸುವಿಕೆಯನ್ನು ಉತ್ತೇಜಿಸುವುದಾಗಿದೆ ಎಂದು ಜಗದ್ಗುರುಗಳು ಗಮನಿಸಿದರು. ಯಾಕೆಂದರೆ ನಿಜವಾದ ಶಿಕ್ಷಣವು ಮಾನವನ ಅಂತಿಮ ಗುರಿಯನ್ನೂ, ಅವನು ಸದಸ್ಯನಾಗಿರುವ ಸಮಾಜದ ಹಿತವನ್ನೂ ಗಮನದಲ್ಲಿಟ್ಟುಕೊಂಡು ಮಾನವ ವ್ಯಕ್ತಿಯ ರೂಪುಗೊಳಿಸುವಿಕೆಯನ್ನು ಸಾಧಿಸಲು ಉದ್ದೇಶಿಸುತ್ತದೆ ಎಂದು ಅವರು ಹೇಳಿದರು.
ಈ ದೃಷ್ಟಿಕೋನದೊಳಗೆ, ಬೌದ್ಧಿಕ ಮತ್ತು ನೈತಿಕ ಸಾಮರ್ಥ್ಯಗಳು, ಜವಾಬ್ದಾರಿಯುತ ಸ್ವಾತಂತ್ರ್ಯ ಮತ್ತು ಸಾಮೂಹಿಕ ಹಿತದ ಬದ್ಧತೆಗಳು ಸಮನ್ವಯದಿಂದ ಬೆಳೆಸಲ್ಪಡುತ್ತವೆ ಎಂದು ಅವರು ಹೇಳಿದರು. ಇದರಿಂದ ಕಟ್ಟುನಿಟ್ಟಾಗಿ ಚಿಂತಿಸುವ, ಮುಕ್ತ ಮನಸ್ಸಿನಿಂದ ಸಂವಾದಿಸುವ ಮತ್ತು ಪ್ರಾಮಾಣಿಕತೆಯಿಂದ ನಡೆದುಕೊಳ್ಳುವ ವ್ಯಕ್ತಿಗಳು ರೂಪುಗೊಳ್ಳುತ್ತಾರೆ ಎಂದು ಜಗದ್ಗುರು ಲಿಯೋರವರು ಹೇಳಿದರು.
ಆದ್ದರಿಂದ, ವಿಶ್ವವಿದ್ಯಾಲಯದ ಧ್ಯೇಯವಾಕ್ಯವಾದ ಕ್ಯಾರಿಟೇಟ್ನಲ್ಲಿ ವೆರಿತಾಸ್ ಅನ್ನು ಅರ್ಥಮಾಡಿಕೊಳ್ಳುವುದು ಅತ್ಯಂತ ಅರ್ಥಪೂರ್ಣವಾಗಿದೆ ಎಂದು ಅವರು ಹೇಳಿದರು. ಈ ಅಭಿವ್ಯಕ್ತಿ ವಿಶ್ವಾಸದ ದೃಷ್ಟಿಕೋನದಿಂದ ಕೈಗೊಳ್ಳಲಾದ ವಿಶ್ವವಿದ್ಯಾಲಯದ ಧ್ಯೇಯದ ಸ್ಪಷ್ಟ ಸಾರಾಂಶವಾಗಿದೆ ಎಂದು ಅವರು ವಿವರಿಸಿದರು.
ಸತ್ಯವು ತನ್ನ ಗುರುತನ್ನು ಯೇಸು ಕ್ರಿಸ್ತನ ವ್ಯಕ್ತಿತ್ವದಲ್ಲೇ ಕಂಡುಕೊಳ್ಳುತ್ತದೆ
ಕ್ರೈಸ್ತ ಪರಂಪರೆಯಲ್ಲಿ,ಸತ್ಯವೆಂದರೆ ಕೇವಲ ಬೌದ್ಧಿಕ ಆದರ್ಶ ಅಥವಾ ನಿರಾಕಾರ ಕಲ್ಪನೆಯಲ್ಲ ಎಂದು ಜಗದ್ಗುರುಗಳು ನೆನಪಿಸಿದರು.
ಬದಲಾಗಿ, ಸತ್ಯವು ತನ್ನ ಗುರುತನ್ನು ಯೇಸು ಕ್ರಿಸ್ತನ ವ್ಯಕ್ತಿತ್ವದಲ್ಲೇ ಕಂಡುಕೊಳ್ಳುತ್ತದೆ. ಆತನು ತನ್ನನ್ನೇ ಸತ್ಯವೆಂದು ಪ್ರಕಟಿಸಿಕೊಳ್ಳುತ್ತಾನೆ; ಹಾಗೆಯೇ ಮಾನವನಿಗೆ ಅವನ ನಿಜಸ್ವರೂಪವನ್ನು ಸಂಪೂರ್ಣವಾಗಿ ಅನಾವರಣಗೊಳಿಸಿ, ಅವನ ಅತ್ಯುನ್ನತ ಕರೆಯನ್ನು ತೋರಿಸುತ್ತಾನೆ ಎಂದು ಅವರು ಹೇಳಿದರು.
ಈ ದೃಷ್ಟಿಕೋನದಿಂದ ನೋಡಿದಾಗ, ಬೌದ್ಧಿಕ ಕಟ್ಟುನಿಟ್ಟು ಮತ್ತು ವೈಜ್ಞಾನಿಕ ಪ್ರಾಮಾಣಿಕತೆಯೊಂದಿಗೆ ಹುಡುಕಲ್ಪಡುವ ಸತ್ಯವು ಪ್ರೀತಿಯಲ್ಲಿ ತನ್ನ ಗುರಿಯನ್ನೂ ಅಂತಿಮ ಮಾನದಂಡವನ್ನೂ ಕಂಡುಕೊಳ್ಳುತ್ತದೆ ಎಂದು ಅವರು ಹೇಳಿದರು.
ಇದಕ್ಕೆ ಕಾರಣವೆಂದರೆ, ಕ್ರೈಸ್ತನಿಗೆ ಸತ್ಯವನ್ನು ಹೇಳುವುದು ಎನ್ನುವುದು ವ್ಯಕ್ತಿಯನ್ನು ನಿರ್ಮಿಸುವ, ಗುಣಪಡಿಸುವ ಮತ್ತು ಅವನ ಪೂರ್ಣತೆಯ ಕಡೆಗೆ ದಾರಿ ತೋರಿಸುವ ಪ್ರೀತಿಯ ಕಾರ್ಯವಾಗಿದೆ ಎಂದು ಅವರು ವಿವರಿಸಿದರು.
ಸತ್ಯಕ್ಕೆ ವೈಯಕ್ತಿಕ ಮತ್ತು ಸಂಬಂಧಾತ್ಮಕ ಆಯಾಮವಿದೆ ಎಂಬುದನ್ನು ಗುರುತಿಸುವುದು ಅತ್ಯಂತ ಮಹತ್ವದ್ದಾಗಿದೆ ಎಂದು ಜಗದ್ಗುರುಗಳು ಒತ್ತಿಹೇಳಿದರು.
ಈ ಅರಿವು ಜ್ಞಾನವನ್ನು ಆಧಿಪತ್ಯ, ಹೊರತಳ್ಳುವಿಕೆ ಅಥವಾ ಕೇವಲ ಉಪಯೋಗದ ಸಾಧನವಾಗುವುದರಿಂದ ಕಾಪಾಡುತ್ತದೆ ಮತ್ತು ಬದಲಾಗಿ ನ್ಯಾಯ ಮತ್ತು ಪ್ರತಿಯೊಬ್ಬ ಮಾನವನ ಗೌರವದ ಸೇವೆಯತ್ತ, ವಿಶೇಷವಾಗಿ ಅತಿ ದುರ್ಬಲರ ಸೇವೆಯತ್ತ, ಅದನ್ನು ದಾರಿತೋರುತ್ತದೆ ಎಂದು ಅವರು ಹೇಳಿದರು.
ಜ್ಞಾನವು ಯಾವಾಗಲೂ ಮಾನವ ವ್ಯಕ್ತಿಯ ಸೇವೆಯಲ್ಲಿರಬೇಕು
ಕ್ಯಾರಿಟೇಟ್ನಲ್ಲಿ ವೆರಿಟಾಸ್ ಎನ್ನುವುದು ಜ್ಞಾನ ಮತ್ತು ಜೀವನ, ಬುದ್ಧಿಶಕ್ತಿ ಮತ್ತು ನೈತಿಕತೆ, ವಿಶ್ವಾಸ ಮತ್ತು ವಿವೇಕ, ಶೈಕ್ಷಣಿಕ ಶ್ರೇಷ್ಠತೆ ಮತ್ತು ನಾಗರಿಕ ಹೊಣೆಗಾರಿಕೆಯನ್ನು ಒಗ್ಗೂಡಿಸಲು ಪ್ರಯತ್ನಿಸುವ ಶೈಕ್ಷಣಿಕ ಸಮುದಾಯದ ಕರೆಯನ್ನು ವ್ಯಕ್ತಪಡಿಸುತ್ತದೆ ಎಂದು ಜಗದ್ಗುರುಗಳು ನೆನಪಿಸಿದರು.
ಸಂಶೋಧನೆ, ಬೋಧನೆ ಮತ್ತು ವೃತ್ತಿಪರ ತರಬೇತಿಗಳನ್ನು ಸ್ವಯಂಪ್ರತಿಷ್ಠೆಯ ಗುರಿಗಳಾಗಿ ನೋಡದೆ, ಹೆಚ್ಚು ಮಾನವೀಯ, ನ್ಯಾಯಯುತ ಮತ್ತು ಪರಮಾರ್ಥದತ್ತ ತೆರೆದಿರುವ ಸಮಾಜದ ನಿರ್ಮಾಣದತ್ತ ಕೇಂದ್ರೀಕೃತವಾದ ಸೇವೆಗಳಾಗಿ ಅರ್ಥಮಾಡಿಕೊಳ್ಳಬೇಕು ಎಂದು ಅವರು ಹೇಳಿದರು. ಅಲ್ಲಿ ಜ್ಞಾನವು ಯಾವಾಗಲೂ ಮಾನವ ವ್ಯಕ್ತಿಯ ಸೇವೆಯಲ್ಲಿರುತ್ತದೆ ಎಂದು ಅವರು ಒತ್ತಿಹೇಳಿದರು.
ಕೊನೆಯಲ್ಲಿ, ಕ್ಯಾರಿಟೇಟ್ನಲ್ಲಿ ವೆರಿಟಾಸ್ ನಿಮ್ಮ ವಿವೇಚನೆಗೆ ಮಾರ್ಗದರ್ಶಿಯಾಗಲಿ ಎಂದು ಜಗದ್ಗುರು ಲಿಯೋರವರು ಪ್ರೋತ್ಸಾಹಿಸಿದರು. ಜೊತೆಗೆ, ವಿಶ್ವವಿದ್ಯಾಲಯದ ಶೈಕ್ಷಣಿಕ, ರೂಪಣಾತ್ಮಕ ಮತ್ತು ಸಮುದಾಯ ಚಟುವಟಿಕೆಗಳನ್ನು ಜ್ಞಾನದ ಆಸನವಾದ ಧನ್ಯ ಕನ್ಯಾ ಮರಿಯಮ್ಮ ತಾಯಿಯ ಮಧ್ಯಸ್ಥಿಕೆಗೆ ಒಪ್ಪಿಸಿದರು.
