“ಜಗದ್ಗುರುಗಳಿಂದ ಸಂತ ಹತ್ತನೇ ಪಿಯಸ್ ರವರ ಸಂಘಕ್ಕೆ ಅಂತಿಮ ಮನವಿ: ಕ್ರಿಸ್ತನ ಅವಿಭಾಜ್ಯ ಅಂಗಿಯನ್ನು ಹರಿದುಹಾಕಬೇಡಿ.”

ವ್ಯಾಟಿಕನ್ ವರದಿ

ಮೊನ್ನೆಯಷ್ಟೇ ಕ್ಯಾಸ್ಟೆಲ್ ಗಾಂಡೋಲ್ಫೋದಲ್ಲಿ ಪತ್ರಕರ್ತರೊಂದಿಗೆ ನಡೆದ ಭೇಟಿಯ ವೇಳೆ ತಾವು ಸೂಚಿಸಿದ್ದಂತೆ, ಜಗದ್ಗುರು XIVನೇ ಲಿಯೋರವರು ಸಂತ ಹತ್ತನೇ ಪಿಯಸ್ ರವರ ಯಾಜಕ ಭ್ರಾತೃತ್ವಕ್ಕೆ  ತಮ್ಮ ಅಂತಿಮ ಮನವಿಯನ್ನು ಸಲ್ಲಿಸಿದ್ದಾರೆ. ಜಗದ್ಗುರುಗಳ ಅಧಿಕೃತ ಅನುಮತಿ ಇಲ್ಲದೆ ನಾಲ್ವರು ಹೊಸ ಬಿಷಪ್‌ಗಳ ಅಭಿಷೇಕವನ್ನು ನೆರವೇರಿಸುವ ತಮ್ಮ ಯೋಜನೆಯನ್ನು ಕೈಬಿಡುವಂತೆ ಅವರು ಕೋರಿದ್ದಾರೆ. ಈ ಅಭಿಷೇಕವು ಜುಲೈ 1ರ ಬೆಳಿಗ್ಗೆ ಸ್ವಿಟ್ಜರ್ಲೆಂಡ್‌ನ ಎಕೋನ್ ನಲ್ಲಿ ನಡೆಯಲು ನಿಗದಿಯಾಗಿತ್ತು.

“ಪ್ರೇಷಿತ ಪೇತ್ರನ ಉತ್ತರಾಧಿಕಾರಿಯಾಗಿ ಪ್ರಭು ನನಗೆ ವಹಿಸಿರುವ ಹೊಣೆಗಾರಿಕೆಯನ್ನು ಅರಿತು, ತಂದೆಯ ಹೃದಯದಿಂದ ನಾನು ನಿಮಗೆ ಮತ್ತು ನಿಮ್ಮ ಮೂಲಕ ಸಂತ ಹತ್ತನೇ ಪಿಯಸ್ ರವರ ಯಾಜಕ ಭ್ರಾತೃತ್ವಕ್ಕೆ ಸಂಬಂಧಿಸಿದ ಬಿಷಪ್‌ಗಳು, ಯಾಜಕರು, ಗುರು ವಿದ್ಯಾರ್ಥಿ ಮಂದಿರದ ವಿದ್ಯಾರ್ಥಿಗಳು ಹಾಗೂ ವಿಶ್ವಾಸಿಗಳಿಗೆ ಈ ಸಂದೇಶವನ್ನು ನೀಡುತ್ತಿದ್ದೇನೆ,” ಎಂದು ಜಗದ್ಗುರು XIVನೇ ಲಿಯೋರವರು ಪತ್ರದಲ್ಲಿ ಬರೆದಿದ್ದಾರೆ.

“ನಿಮ್ಮ ಭ್ರಾತೃತ್ವಕ್ಕೆ ಸಂಬಂಧಿಸಿದ ಅನೇಕ ವ್ಯಕ್ತಿಗಳು ಮತ್ತು ಸಮುದಾಯಗಳಲ್ಲಿ ಕಂಡುಬರುವ ಆರಾಧನಾ ಜೀವನದ ಮೇಲಿನ ಭಕ್ತಿ, ಯಾಜಕ ಶಿಕ್ಷಣದ ಮೇಲಿನ ಬದ್ಧತೆ, ಸುವಾರ್ತಾ ಸೇವೆಯ ಉತ್ಸಾಹ ಹಾಗೂ ಸಂಪ್ರದಾಯದ  ಕಡೆಗಿನ ನಿಷ್ಠೆಯ ಬಯಕೆಯನ್ನು ಚರ್ಚೆಯು ಗುರುತಿಸಿ ಗೌರವಿಸುತ್ತದೆ. ಇದೇ ಕಾರಣದಿಂದ ನನ್ನ ಪೂರ್ವಾಧಿಕಾರಿಗಳು ನಿಮ್ಮ ಬಗ್ಗೆ ಸದಾ ಕಾಳಜಿಯುತ, ಉದಾರ ಮತ್ತು ಸಹಾನುಭೂತಿಯ ಮನೋಭಾವವನ್ನು ತೋರಿದ್ದಾರೆ.”

ಮುಂದೆ ಜಗದ್ಗುರುಗಳು ಹೀಗೆ ಮನವಿ ಮಾಡುತ್ತಾರೆ:

“ಅದೇ ಮನೋಭಾವದಿಂದ ಮತ್ತು ಕ್ರೈಸ್ತ ಪ್ರೀತಿಯಿಂದ ತುಂಬಿದ ಹೃದಯದಿಂದ ನಾನು ನಿಮ್ಮನ್ನು ಬೇಡಿಕೊಳ್ಳುತ್ತೇನೆ, ಹೃತ್ಪೂರ್ವಕವಾಗಿ ವಿನಂತಿಸುತ್ತೇನೆ ದಯವಿಟ್ಟು ಹಿಂದಿರುಗಿ ನೀವು ಕೈಗೊಳ್ಳಲಿರುವ ಈ ಭಿನ್ನಮತೀಯ ಕ್ರಮವು ವಿಶ್ವಾಸಿಗಳ ಆಧ್ಯಾತ್ಮಿಕ ಹಿತಕ್ಕೆ ಎಷ್ಟು ದೊಡ್ಡ ಹಾನಿಯನ್ನು ಉಂಟುಮಾಡಲಿದೆ ಎಂಬುದನ್ನು ಗಂಭೀರವಾಗಿ ಪರಿಗಣಿಸಿ. ಏಕೆಂದರೆ ಈ ಕ್ರಮವು ಅವರು ತಮ್ಮ ಪಾವಿತ್ರ್ಯಕ್ಕಾಗಿ ಪ್ರೀತಿಯಿಂದ ಬಯಸುವ ಮತ್ತು ಸ್ವೀಕರಿಸುವ ಸಂಸ್ಕಾರಗಳನ್ನು ಚರ್ಚೆಯ ನಿಯಮಾನುಸಾರ ಹಾಗೂ ಕೆಲವು ಸಂದರ್ಭಗಳಲ್ಲಿ ಮಾನ್ಯವಾಗಿಯೂ  ಸ್ವೀಕರಿಸುವ ಅವಕಾಶದಿಂದ ಅವರನ್ನು ವಂಚಿಸಲಿದೆ.”

ಫ್ರೆಂಚ್ ಭಾಷೆಯಲ್ಲಿ ರಚಿಸಲ್ಪಟ್ಟ ಈ ಪತ್ರವನ್ನು ಭ್ರಾತೃತ್ವದ ಮಹಾಧ್ಯಕ್ಷರಾದ ವಂ. ಸ್ವಾಮಿ ಡೇವಿಡ್ ಪಾಗ್ಲಿಯಾರಾನಿರವರಿಗೆ ಉದ್ದೇಶಿಸಿ ಬರೆಯಲಾಗಿದ್ದು, ಅದರಲ್ಲಿ ಜಗದ್ಗುರುಗಳು ಹೀಗೆ ಹೇಳುತ್ತಾರೆ.

“ಪವಿತ್ರಾತ್ಮನು ಸಾಧ್ಯವಾಗಿಸಿ ಫಲಪ್ರದಗೊಳಿಸಬಲ್ಲ ಸಂವಾದ ಮತ್ತು ಪರಸ್ಪರ ತಿಳುವಳಿಕೆಯ ಮಾರ್ಗಕ್ಕೆ ಚರ್ಚೆಯು ಸದಾ ತೆರೆದಿದೆ. ಕ್ರಿಸ್ತನ ಅವಿಭಾಜ್ಯ ವಸ್ತ್ರವನ್ನು ಹರಿದುಹಾಕುವುದು ಅತ್ಯಂತ ಗಂಭೀರವಾದ ಪಾಪವಾಗಿರುವುದರಿಂದ ನಾನು ನಿಮಗಾಗಿ ಪ್ರಾರ್ಥಿಸುತ್ತೇನೆ. ಪ್ರಭು ನಿಮ್ಮ ಮನಸ್ಸುಗಳಿಗೆ ಬೆಳಕನ್ನು ನೀಡಿ, ನಿಮ್ಮ ಹೃದಯಗಳನ್ನು ಸ್ಪರ್ಶಿಸಲಿ. ದುಃಖಭರಿತವಾದರೂ ಆಶಾಭರಿತ ಹೃದಯದಿಂದ, ಕ್ರಿಸ್ತನಿಂದ ನನಗೆ ದೊರೆತಿರುವ ಅಧಿಕಾರದ ಬಲದಿಂದ, ನೀವು ಉದ್ದೇಶಿಸಿರುವ ಈ ಕ್ರಮವನ್ನು ಕೈಬಿಡುವಂತೆ ನಿಮ್ಮನ್ನು ಕೋರುವುದು ನನ್ನ ಕರ್ತವ್ಯವೆಂದು ನಾನು ಭಾವಿಸುತ್ತೇನೆ. ಈ ಎಲ್ಲಾ ಉದ್ದೇಶಗಳನ್ನು ಶುಭಸಲಹೆಯ ತಾಯಿಯಾದ ನಿರ್ಮಲ ಹೃದಯದ ಮರಿಯಮ್ಮನವರಿಗೆ ಒಪ್ಪಿಸುತ್ತೇನೆ.”

ಹೀಗೆ, ಜಗದ್ಗುರುಗಳು ಮತ್ತೊಮ್ಮೆ ಲೆಫೆಬ್ರಿಸ್ಟ್‌ಗಳಿಗೆ ಜಗದ್ಗುರುಗಳ ಅಧಿಕೃತ ಅನುಮತಿ ಇಲ್ಲದೆ ಬಿಷಪ್‌ಗಳ ಅಭಿಷೇಕವನ್ನು ನೆರವೇರಿಸುವ ಈ ಭಿನ್ನಮತೀಯ ಕೃತ್ಯವನ್ನು ಕೈಬಿಡುವಂತೆ ಕರೆ ನೀಡಿದ್ದಾರೆ.

ಈ ಪತ್ರದ ಅತ್ಯಂತ ಪ್ರಮುಖ ಅಂಶವೆಂದರೆ, ಸಂತ ಹತ್ತನೇ ಪಿಯಸ್ ರವರ ಸಂಘಕ್ಕೆ ಸಂಬಂಧಿಸಿದ ವಿಶ್ವಾಸಿಗಳ ಆಧ್ಯಾತ್ಮಿಕ ಕಲ್ಯಾಣದ ಬಗ್ಗೆ ಜಗದ್ಗುರುಗಳು ವ್ಯಕ್ತಪಡಿಸಿರುವ ಆಳವಾದ ಕಾಳಜಿ. ಏಕೆಂದರೆ ಇಂತಹ ಭಿನ್ನಮತೀಯ ಕ್ರಮವು ಅವರು ಸ್ವೀಕರಿಸುವ ಸಂಸ್ಕಾರಗಳನ್ನು ಚರ್ಚೆಯ ನಿಯಮಾನುಸಾರವಲ್ಲದವುಗಳಾಗಿ ಮಾಡುತ್ತದೆ, ಮತ್ತು ಕೆಲವು ಸಂದರ್ಭಗಳಲ್ಲಿ ವಿಶೇಷವಾಗಿ ಪಾಪನಿವೇದನೆ ಹಾಗೂ ವಿವಾಹ ಸಂಸ್ಕಾರ ಅವುಗಳನ್ನು ಅಮಾನ್ಯಗೊಳಿಸುವ ಗಂಭೀರ ಪರಿಣಾಮ ಉಂಟುಮಾಡುತ್ತದೆ.