ಜಗದ್ಗುರುಗಳ ಅಧಿಕಾರ ಸ್ಥಳವು ಅಮೆರಿಕದ ರಾಯಭಾರಿಯನ್ನು ಅಮೆರಿಕದ ಸ್ವಾತಂತ್ರ್ಯ ದಿನದ (ಜುಲೈ 4) ಅಂಗವಾಗಿ ಭೇಟಿಯಾದ ಜಗದ್ಗುರು ಲಿಯೋರವರು.
ವ್ಯಾಟಿಕನ್ ವರದಿ
ಇಂದು, ಜುಲೈ 4, ಅಮೆರಿಕ ಸಂಯುಕ್ತ ಸಂಸ್ಥಾನದ ಸ್ವಾತಂತ್ರ್ಯ ಘೋಷಣಾಪತ್ರಕ್ಕೆ ಸಹಿ ಹಾಕಿದ 250ನೇ ವಾರ್ಷಿಕೋತ್ಸವವಾಗಿದೆ.
ಈ ವಿಶೇಷ ಸಂದರ್ಭದಲ್ಲಿ, ಇಂದು ಬೆಳಿಗ್ಗೆ ವ್ಯಾಟಿಕನ್ ಜಗದ್ಗುರು XIVನೇ ಲಿಯೋರವರು ಅಮೆರಿಕದ ಜನತೆಗೆ ಬರೆದ ಪತ್ರವನ್ನು ಪ್ರಕಟಿಸಿತು. ಆ ಪತ್ರದಲ್ಲಿ ಅವರು ಈ ಐತಿಹಾಸಿಕ ದಿನದ ಅಂಗವಾಗಿ ತಮ್ಮ ಪ್ರಾರ್ಥನೆಗಳನ್ನು ಅಮೆರಿಕದ ಜನರಿಗೆ ಅರ್ಪಿಸಿದ್ದಾರೆ.
ಶನಿವಾರದ ಮೊದಲಾರ್ಧದಲ್ಲಿ ಜಗದ್ಗುರುಗಳು ದಕ್ಷಿಣ ಇಟಲಿಯ ಲಾಂಪೆಡುಸಾ ದ್ವೀಪಕ್ಕೆ ಭೇಟಿ ನೀಡಿ, ವಲಸಿಗರೊಂದಿಗೆ ತಮ್ಮ ಸಾಮೀಪ್ಯ ಮತ್ತು ಐಕ್ಯತೆಯನ್ನು ವ್ಯಕ್ತಪಡಿಸುವ ಧರ್ಮಾಧ್ಯಕ್ಷೀಯ ಭೇಟಿಯನ್ನು ನೆರವೇರಿಸಿದರು.
ದಿನದ ಕಾರ್ಯಕ್ರಮಗಳ ಬಳಿಕ, ಜಗದ್ಗುರುಗಳ ಅಧಿಕಾರ ಸ್ಥಳದ ಪತ್ರಿಕಾ ಕಚೇರಿ ಪತ್ರಕರ್ತರಿಗೆ ನೀಡಿದ ಪ್ರಕಟಣೆಯಲ್ಲಿ, "ಜಗದ್ಗುರುಗಳ ಅಧಿಕಾರ ಸ್ಥಳವು ಅಮೆರಿಕದ ರಾಯಭಾರಿ ಬ್ರಿಯಾನ್ ಬರ್ಚ್ ರವರ ಆಹ್ವಾನವನ್ನು ಸ್ವೀಕರಿಸಿ, ರಾಷ್ಟ್ರೀಯ ಹಬ್ಬದ ಪ್ರಯುಕ್ತ ಶನಿವಾರ ಸಂಜೆ ಜಗದ್ಗುರುಗಳು ರೋಮಿನಲ್ಲಿರುವ ಅಮೆರಿಕದ ರಾಯಭಾರಿಯ ನಿವಾಸಕ್ಕೆ ಭೇಟಿ ನೀಡಿದರು" ಎಂದು ತಿಳಿಸಿತು.
ಶುಕ್ರವಾರ ಸಂಜೆ (ರೋಮ್ ಸಮಯ), ಈ ವಾರ್ಷಿಕೋತ್ಸವದ ಮುನ್ನಾದಿನದಂದು, ವಿಶ್ವದಾದ್ಯಂತ ಧಾರ್ಮಿಕ ಸ್ವಾತಂತ್ರ್ಯ, ಮನಸ್ಸಾಕ್ಷಿಯ ಸ್ವಾತಂತ್ರ್ಯ ಹಾಗೂ ಅಭಿವ್ಯಕ್ತಿ ಸ್ವಾತಂತ್ರ್ಯವನ್ನು ಉತ್ತೇಜಿಸಲು ತಮ್ಮ ಜೀವಮಾನದ ಬದ್ಧತೆಯನ್ನು ಗುರುತಿಸಿ, ಅಮೆರಿಕದ ನ್ಯಾಷನಲ್ ಕಾನ್ಸ್ಟಿಟ್ಯೂಷನ್ ಸೆಂಟರ್ ವತಿಯಿಂದ ಜಗದ್ಗುರು ಲಿಯೋರವರಿಗೆ ಲಿಬರ್ಟಿ ಮೆಡಲ್ ಪ್ರದಾನ ಮಾಡಲಾಯಿತು.
ಚಿಕಾಗೋದಲ್ಲಿ ಜನಿಸಿದ ಜಗದ್ಗುರು ಲಿಯೋರವರು, ವ್ಯಾಟಿಕನ್ನಿಂದ ವೀಡಿಯೊ ಸಂದೇಶದ ಮೂಲಕ ಫಿಲಡೆಲ್ಫಿಯಾದಲ್ಲಿ ಸೇರಿದ್ದ ಜನರನ್ನು ಉದ್ದೇಶಿಸಿ ಮಾತನಾಡಿದರು. ಅಮೆರಿಕದ ಸ್ಥಾಪನೆಯ 250ನೇ ವಾರ್ಷಿಕೋತ್ಸವವು ದೇಶದ ಅಡಿಪಾಯವಾಗಿರುವ ಮೂಲಭೂತ ಆದರ್ಶಗಳಾದ ಜೀವನ ಮತ್ತು ಸ್ವಾತಂತ್ರ್ಯದ ಬಗ್ಗೆ ಹೊಸ ಬದ್ಧತೆಯನ್ನು ಮೂಡಿಸುವ ಸಂದರ್ಭವಾಗಲಿ ಎಂದು ಅವರು ಪ್ರಾರ್ಥಿಸಿದರು. ತಮ್ಮ ಸಂದೇಶವನ್ನು "ದೇವರು ಅಮೆರಿಕವನ್ನು ಆಶೀರ್ವದಿಸಲಿ" ಎಂಬ ಮಾತುಗಳೊಂದಿಗೆ ಮುಕ್ತಾಯಗೊಳಿಸಿದರು.
"ಸ್ವಾತಂತ್ರ್ಯ ಮತ್ತು ತಮ್ಮ ಹಾಗೂ ತಮ್ಮ ಮಕ್ಕಳಿಗಾಗಿ ಉತ್ತಮ ಜೀವನದ ಕನಸು ಕಂಡ ಧೈರ್ಯಶಾಲಿ ಪುರುಷರು ಮತ್ತು ಮಹಿಳೆಯರಿಂದ ಸ್ಥಾಪಿಸಲ್ಪಟ್ಟ ಈ ಮಹಾನ್ ದೇಶದ ಮಗನಾಗಿ," ಎಂದು ಜಗದ್ಗುರು ಲಿಯೋರವರು ಹೇಳಿದರು, "ಅಮೆರಿಕದ ಭವಿಷ್ಯದ ಮೇಲೆ ದೇವರ ಆಶೀರ್ವಾದ ಇರಲೆಂದು ನಾನು ನಿಮ್ಮೊಂದಿಗೆ ಸೇರಿ ಪ್ರಾರ್ಥಿಸುತ್ತೇನೆ. ಸ್ವಾತಂತ್ರ್ಯ ಘೋಷಣಾಪತ್ರದ ಆರಂಭದಲ್ಲಿ ಪ್ರತಿಪಾದಿಸಲಾದ ಉನ್ನತ ಆದರ್ಶಗಳು ರಾಷ್ಟ್ರವನ್ನು ಐಕ್ಯತೆ, ನ್ಯಾಯ ಮತ್ತು ಶಾಂತಿಯ ಮಾರ್ಗದಲ್ಲಿ ಮುಂದುವರೆಯುವಂತೆ ಸದಾ ಮಾರ್ಗದರ್ಶನ ಮಾಡಲಿ."
