ಇರಾನಿನಾದ್ಯಂತ ಪ್ರತಿಭಟನೆಗಳು ಮುಂದುವರಿಕೆ

ಭಾರೀ ಭದ್ರತಾ ಕ್ರಮಗಳು ಹಾಗೂ ದೇಶವ್ಯಾಪಿ ಅಂತರ್ಜಾಲ  ನಿರ್ಬಂಧ ಇದ್ದರೂ, ಶುಕ್ರವಾರ ರಾತ್ರಿ ಇರಾನಿನಾದ್ಯಂತ ಮತ್ತೆ ಪ್ರತಿಭಟನೆಗಳು ಭುಗಿಲೆದ್ದಿವೆ.

ಇದು  ಪ್ರತಿಭಟನೆಗಳ 13ನೇ ರಾತ್ರಿ.

AFP ಪ್ರಕಟಿಸಿದ ಪರಿಶೀಲಿತ ವೀಡಿಯೊಗಳಲ್ಲಿ, ತೆಹರಾನ್‌ನ ಸಾದಾತಾಬಾದ್ ಪ್ರದೇಶ ಸೇರಿದಂತೆ ಹಲವು ಕಡೆಗಳಲ್ಲಿ ಭಾರೀ ಜನಸಮೂಹಗಳು ಸೇರಿರುವುದು ಕಂಡುಬಂದಿದೆ. ಪ್ರತಿಭಟನಾಕಾರರು ಪಾತ್ರೆಗಳನ್ನು ಬಡಿದು, ಸರ್ವಾಧಿಕಾರಿ ಅಯತೊಲ್ಲಾ ಅಲಿ ಖಮೇನಿ ವಿರುದ್ಧ ಘೋಷಣೆಗಳನ್ನು ಕೂಗಿದ್ದಾರೆ.

ಅಂತರರಾಷ್ಟ್ರೀಯ ಪ್ರತಿಕ್ರಿಯೆಗಳು

ವಾಷಿಂಗ್ಟನ್‌ನಲ್ಲಿ ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರು, ಇರಾನ್ “ದೊಡ್ಡ ಸಮಸ್ಯೆಯಲ್ಲಿದೆ” ಎಂದು ಹೇಳಿ, “ನೀವು ಗುಂಡು ಹಾರಿಸಲು ಪ್ರಾರಂಭಿಸಿದರೆ, ನಾವು ಕೂಡ ಗುಂಡು ಹಾರಿಸುತ್ತೇವೆ” ಎಂದು ಎಚ್ಚರಿಕೆ ನೀಡಿದರು.

ವಿಶ್ವಸಂಸ್ಥೆಯ ಭದ್ರತಾ ಮಂಡಳಿಗೆ ಸಲ್ಲಿಸಿದ ಪತ್ರದಲ್ಲಿ, ಇರಾನ್ ಸರ್ಕಾರವು ಈ ಪ್ರತಿಭಟನೆಗಳನ್ನು “ಹಿಂಸಾತ್ಮಕ ಉಪಕ್ರಮಗಳು ಮತ್ತು ವ್ಯಾಪಕ ಧ್ವಂಸಕೃತ್ಯಗಳಾಗಿ” ರೂಪಾಂತರಗೊಳಿಸುವಲ್ಲಿ ಅಮೆರಿಕ ಪಾತ್ರವಹಿಸಿದೆ ಎಂದು ಆರೋಪಿಸಿದೆ.

ಶನಿವಾರ ಬೆಳಗ್ಗೆ, ಅಮೆರಿಕ ವಿದೇಶಾಂಗ ಕಾರ್ಯದರ್ಶಿ ಮಾರ್ಕೊ ರೂಬಿಯೋ ಅವರು X ನಲ್ಲಿ, “ಅಮೆರಿಕಾ ಇರಾನ್‌ನ ಧೈರ್ಯಶಾಲಿ ಜನರನ್ನು ಬೆಂಬಲಿಸುತ್ತದೆ” ಎಂದು ಬರೆದಿದ್ದಾರೆ.

ನಾರ್ವೆ ಮೂಲದ ಇರಾನ್ ಮಾನವ ಹಕ್ಕುಗಳ ಸಂಸ್ಥೆಯ ಪ್ರಕಾರ, ಕಳೆದ ಎರಡು ವಾರಗಳ ಅಶಾಂತಿಯಲ್ಲಿ ಒಂಬತ್ತು ಅಪ್ರಾಪ್ತರು ಸೇರಿದಂತೆ ಕನಿಷ್ಠ 51 ಪ್ರತಿಭಟನಾಕಾರರು ಸಾವನ್ನಪ್ಪಿದ್ದಾರೆ.

ಆರ್ಥಿಕ ಕಾರಣಗಳಿಂದ ಆರಂಭವಾದ ಪ್ರತಿಭಟನೆಗಳು

ಡಿಸೆಂಬರ್ 28ರಂದು, ಅಮೆರಿಕನ್ ಡಾಲರ್ ಎದುರು ಇರಾನ್‌ನ ಕರೆನ್ಸಿಯಾದ ರಿಯಾಲ್ ಮೌಲ್ಯ ಮತ್ತೊಮ್ಮೆ ತೀವ್ರವಾಗಿ ಕುಸಿದ ನಂತರ, ತೆಹರಾನ್‌ನ ವ್ಯಾಪಾರಿಗಳು ರಸ್ತೆಗಳಿಗೆ ಇಳಿದಾಗ ಈ ಪ್ರತಿಭಟನೆಗಳು ಆರಂಭವಾಗಿವೆ.

ಶೀಘ್ರದಲ್ಲೇ ವಿಶ್ವವಿದ್ಯಾಲಯದ ವಿದ್ಯಾರ್ಥಿಗಳು ಸೇರಿಕೊಂಡರು ಮತ್ತು ಪ್ರತಿಭಟನೆಗಳು ಇತರ ಹಲವಾರು ನಗರಗಳಿಗೆ ವಿಸ್ತರಿಸಿವೆ.

ಅಂತರ್ಜಾಲ ಸೇವೆಗಳನ್ನು ತೀವ್ರವಾಗಿ ನಿರ್ಬಂಧಿಸಿರುವ ಕಾರಣ, ಅಶಾಂತಿಯ ಸಂಪೂರ್ಣ ಪ್ರಮಾಣ ಇನ್ನೂ ಸ್ಪಷ್ಟವಾಗಿಲ್ಲ. ಲಭ್ಯವಿರುವ ದೃಶ್ಯಗಳು ಅತಿ ಕಡಿಮೆ ಮತ್ತು ಅವುಗಳಲ್ಲಿ ಬಹುತೇಕವನ್ನು ಸ್ವತಂತ್ರವಾಗಿ ಪರಿಶೀಲಿಸಲು ಸಾಧ್ಯವಾಗಿಲ್ಲ.

ಈ ವಾರ, ಫ್ರಾನ್ಸ್ ಅಧ್ಯಕ್ಷ ಇಮ್ಯಾನುಯೆಲ್ ಮ್ಯಾಕ್ರೋನ್, ಬ್ರಿಟನ್ ಪ್ರಧಾನಮಂತ್ರಿ ಸರ್ ಕೀರ್ ಸ್ಟಾರ್ಮರ್ ಹಾಗೂ ಜರ್ಮನಿ ಚಾನ್ಸಲರ್ ಫ್ರೀಡ್ರಿಕ್ ಮರ್ಝ್ ಅವರು ಸಂಯುಕ್ತ ಹೇಳಿಕೆ ನೀಡಿದ್ದು, ಇರಾನ್ ತನ್ನ ನಾಗರಿಕರನ್ನು ರಕ್ಷಿಸಬೇಕು ಮತ್ತು “ಯಾವುದೇ ಪ್ರತೀಕಾರದ ಭಯವಿಲ್ಲದೆ” ಅಭಿವ್ಯಕ್ತಿ ಸ್ವಾತಂತ್ರ್ಯ ಹಾಗೂ ಶಾಂತಿಯುತ ಸಭೆಗಳಿಗೆ ಅವಕಾಶ ನೀಡಬೇಕು ಎಂದು ಆಗ್ರಹಿಸಿದ್ದಾರೆ.

ಈಗ ನಡೆಯುತ್ತಿರುವ ಪ್ರತಿಭಟನೆಗಳ ಅಲೆ, 2022ರಲ್ಲಿ ನಡೆದ ಅಶಾಂತಿಯ ನಂತರದ ಅತಿ ವ್ಯಾಪಕ ಚಳವಳಿಯಾಗಿದೆ. ಆ ಸಮಯದಲ್ಲಿ, ಹಿಜಾಬ್ ನಿಯಮ ಉಲ್ಲಂಘನೆ ಆರೋಪದಲ್ಲಿ ನೈತಿಕ ಪೊಲೀಸ್‌ ವಶದಲ್ಲಿದ್ದ ಕುರ್ದಿಶ್ ಮಹಿಳೆ ಮಹ್ಸಾ ಅಮಿನಿ ಸಾವಿನಿಂದ ಪ್ರತಿಭಟನೆಗಳು ಸಿಡಿದಿದ್ದವು.

ಮಾನವ ಹಕ್ಕು ಸಂಸ್ಥೆಗಳ ಪ್ರಕಾರ, ಆ ದಮನದ ವೇಳೆ 550ಕ್ಕಿಂತ ಹೆಚ್ಚು ಜನರು ಸಾವನ್ನಪ್ಪಿದ್ದರು ಮತ್ತು 20,000 ಜನರನ್ನು ಬಂಧಿಸಲಾಗಿತ್ತು.