ಉತ್ತರ ಕೊರಿಯಾದಿಂದ ಸಮುದ್ರದತ್ತ ಕ್ಷಿಪಣಿಗಳ ದಾಳಿ

ಲೇಖಕರು:ನೇತಾನ್ ಮಾರ್ಲೆ

ಮಂಗಳವಾರ ಉತ್ತರ ಕೊರಿಯಾ ಹಲವು ಶಂಕಿತ ಕಿರು ದೂರದ ಬ್ಯಾಲಿಸ್ಟಿಕ್ ಕ್ಷಿಪಣಿಗಳನ್ನು ಸಮುದ್ರದತ್ತ ಹಾರಿಸಿದೆ.

ದಕ್ಷಿಣ ಕೊರಿಯಾದ ಸಂಯುಕ್ತ ಸೇನಾ ಮುಖ್ಯಸ್ಥರ ಸಮಿತಿ (Joint Chiefs of Staff) ಮಾಹಿತಿ ನೀಡುವಂತೆ, ಪ್ಯಾಂಗ್ಯಾಂಗ್ ಪ್ರದೇಶದಿಂದ ಉತ್ತರ ಕೊರಿಯಾದ ಪೂರ್ವ ಕರಾವಳಿಯ ಸಮುದ್ರದತ್ತ ಈ ಕ್ಷಿಪಣಿಗಳನ್ನು ಉಡಾಯಿಸಲಾಗಿದ್ದು, ಅವು ಸುಮಾರು 350 ಕಿಲೋಮೀಟರ್ ದೂರ ಹಾರಿವೆ.

ಜಪಾನ್ ಕರಾವಳಿ ರಕ್ಷಣಾ ಪಡೆ ಕೂಡ ಉಡಾವಣೆಯ ಕೆಲವೇ ನಿಮಿಷಗಳಲ್ಲಿ ಸಮುದ್ರಕ್ಕೆ ಬಿದ್ದಂತೆ ಕಂಡುಬಂದ ಬ್ಯಾಲಿಸ್ಟಿಕ್ ಕ್ಷಿಪಣಿಗಳನ್ನು ಪತ್ತೆಹಚ್ಚಿದೆ ಎಂದು ತಿಳಿಸಿದೆ. ಜಪಾನ್ ಪ್ರಧಾನಿ ಸನಯೆ ತಕೈಚಿ, ಈ ಕ್ಷಿಪಣಿಗಳಿಂದ ಜಪಾನ್‌ಗೆ ಯಾವುದೇ ಪರಿಣಾಮ ಇರುವುದಿಲ್ಲ ಎಂದು ಹೇಳಿದ್ದಾರೆ.

ಇತ್ತೀಚಿನ ತಿಂಗಳುಗಳಲ್ಲಿ, ಉತ್ತರ ಕೊರಿಯಾ ಅಮೆರಿಕ ಮತ್ತು ದಕ್ಷಿಣ ಕೊರಿಯಾದ ವಿರುದ್ಧ ಅಣ್ವಸ್ತ್ರ ಸಾಮರ್ಥ್ಯ ತಂತ್ರ ವೃದ್ಧಿಸುವ ಉದ್ದೇಶದಿಂದ ಅಭಿವೃದ್ಧಿಪಡಿಸಲಾಗುತ್ತಿದೆ ಎನ್ನಲಾದ ಕಿರು ದೂರದ ಕ್ಷಿಪಣಿಗಳು ಹಾಗೂ ಬಹು-ಉಡಾವಣೆ ರಾಕೆಟ್‌ಗಳನ್ನು ಪರೀಕ್ಷಿಸಿದೆ.

2024ರ ಪರಸ್ಪರ ರಕ್ಷಣಾ ಒಪ್ಪಂದದ ಅಡಿಯಲ್ಲಿ ಉಕ್ರೇನ್ ಯುದ್ಧದಲ್ಲಿ ಬಳಸಲು ರಷ್ಯಾಕ್ಕೆ ಉತ್ತರ ಕೊರಿಯಾ ಕಿರು ದೂರದ ಕ್ಷಿಪಣಿಗಳು ಹಾಗೂ ಗೊಳಿಬಾರುದನ್ನು ಒದಗಿಸಿದ್ದರಿಂದ, ಈ ಅಸ್ತ್ರಗಳತ್ತ ಹೆಚ್ಚಿನ ಗಮನ ಹರಿಸಲಾಗಿದೆ.

ಮಂಗಳವಾರದ ಈ ಉಡಾವಣೆ, ಉತ್ತರ ಕೊರಿಯಾದ ವಿರುದ್ಧದ ಸಂಯುಕ್ತ ರಕ್ಷಣಾ ವ್ಯವಸ್ಥೆಯಲ್ಲಿ ಅಮೆರಿಕ ತನ್ನ ಪಾತ್ರವನ್ನು ಸೀಮಿತಗೊಳಿಸುವ ಪ್ರಯತ್ನಗಳ ನಡುವೆ, ಮೈತ್ರಿ ಆಧುನೀಕರಣ ಕುರಿತು ಚರ್ಚಿಸಲು ಅಮೆರಿಕದ ರಕ್ಷಣಾ ಇಲಾಖೆಯ ಹಿರಿಯ ಅಧಿಕಾರಿಯೊಬ್ಬರು ದಕ್ಷಿಣ ಕೊರಿಯಾ ಭೇಟಿ ನೀಡಿದ್ದ ಸಂದರ್ಭದಲ್ಲೇ ನಡೆದಿದೆ.

ಜನವರಿ 4ರಂದು ಇದೇ ದಿಕ್ಕಿನಲ್ಲಿ ಕ್ಷಿಪಣಿಗಳನ್ನು ಹಾರಿಸಿದ್ದ ನಂತರ ಇದು ಉತ್ತರ ಕೊರಿಯಾದ ಎರಡನೇ ಉಡಾವಣೆಯಾಗಿದ್ದು, ಆ ಸಮಯದಲ್ಲಿ ದಕ್ಷಿಣ ಕೊರಿಯಾ ಅಧ್ಯಕ್ಷ ಲೀ ಜೇ ಮ್ಯುಂಗ್ ಚೀನಾ ಅಧ್ಯಕ್ಷ ಷಿ ಜಿನ್‌ಪಿಂಗ್ ಅವರೊಂದಿಗೆ ಶೃಂಗಸಭೆ ಮಾತುಕತೆಗಾಗಿ ಬೀಜಿಂಗ್‌ಗೆ ತೆರಳಲು ಸಿದ್ಧತೆ ನಡೆಸುತ್ತಿದ್ದರು.

ನಮ್ಮ ಲೇಖನವನ್ನು ಓದಿದ್ದಕ್ಕಾಗಿ ಧನ್ಯವಾದಗಳು. ನಮ್ಮ ದೈನಂದಿನ ಸುದ್ದಿಪತ್ರಕ್ಕೆ ಚಂದಾದಾರರಾಗುವ ಮೂಲಕ ನೀವು ಸದಾ ಇತ್ತೀಚಿನ ಮಾಹಿತಿಯನ್ನು ಪಡೆದುಕೊಳ್ಳಬಹುದು.(ಇಲ್ಲಿ ಕ್ಲಿಕ್ ಮಾಡಿ).