ಗಾಜಾ: ಎರಡು ವರ್ಷಗಳ ಬಳಿಕ ರಫಾ ಗಡಿ ಸಂಚಾರ ಮುಕ್ತ

ಲೇಖಕರು: ಅರ್ಬೆನ್ ನ್ದರೇಕೆ

ಸೋಮವಾರ ಇಸ್ರಾಯೇಲ್ ರಫಾ ಗಡಿ ದಾಟುವ ದ್ವಾರವನ್ನು ತೆರೆದ ಹಿನ್ನೆಲೆಯಲ್ಲಿ ಹಲವು ಪ್ರಶ್ನೆಗಳು ಉದ್ಭವಿಸಿವೆ. ಗಾಜಾದ ದಕ್ಷಿಣ ತುದಿಯನ್ನು ಈಜಿಪ್ಟ್‌ಗೆ ಸಂಪರ್ಕಿಸುವ ಈ ಗಡಿ, ಕಳೆದ ಅಕ್ಟೋಬರ್‌ನಲ್ಲಿ ಸ್ಥಗಿತಗೊಂಡ ಎರಡು ವರ್ಷಗಳ ಯುದ್ಧದ ಬಳಿಕ ಮತ್ತೆ ಕಾರ್ಯಾರಂಭ ಮಾಡಿದೆ. ಆ ಯುದ್ಧವು ಅಪಾರ ವಿನಾಶವನ್ನುಂಟುಮಾಡಿದ್ದು ಮಾತ್ರವಲ್ಲ, ಸಾವಿರಾರು ನಿವಾಸಿಗಳ ಜೀವನವನ್ನೇ ಬದಲಾಯಿಸಿತು—ಅನೇಕ ಸಂದರ್ಭಗಳಲ್ಲಿ ಸಂಪೂರ್ಣವಾಗಿ ಕಿತ್ತುಹಾಕಿತು.

ಈಗ, ಅವರಲ್ಲಿ ಅನೇಕರು, ವಿಶೇಷವಾಗಿ ಗಂಭೀರವಾಗಿ ಅಸ್ವಸ್ಥರಾದವರು ಚಿಕಿತ್ಸೆ ಹಾಗೂ ಉತ್ತಮ ಭವಿಷ್ಯದ ನಿರೀಕ್ಷೆಯಲ್ಲಿ ಗಾಜಾ ಗಡಿಯನ್ನು ದಾಟಿ ಈಜಿಪ್ಟ್‌ಗೆ ತೆರಳುತ್ತಿದ್ದಾರೆ. ಆದರೆ, ಯಾರು ಮತ್ತು ಯಾವ ಆಧಾರದ ಮೇಲೆ ಗಾಜಾದಿಂದ ಈಜಿಪ್ಟ್‌ಗೆ ಹೊರಡಬಹುದು ಎಂಬುದು ಇನ್ನೂ ಸ್ಪಷ್ಟವಾಗಿಲ್ಲ. ಅಧಿಕೃತವಾಗಿ, ಗಡಿ ದಾಟುವ ದ್ವಾರ ಮಾನವೀಯ ಸೌಲಭ್ಯ ಕಾರಣಗಳಿಗಾಗಿ ತೆರೆಯಲಾಗಿದೆ ಎಂದು ಹೇಳಲಾಗಿದೆ. ಆದರೆ, ವೈಯಕ್ತಿಕವಾಗಿ ಅಥವಾ ಗುಂಪುಗಳಾಗಿ ಗಾಜಾವನ್ನು ತೊರೆಯಲು ಬಯಸುವ  ಜನರ ಸ್ಥಿತಿ ಏನು?

ಇನ್ನೂ ಪರಿಹಾರವಾಗಬೇಕಾದ ಹಲವು ಸಮಸ್ಯೆಗಳು

“ಮಾನವೀಯ ಪ್ರಕರಣಗಳು” ಎಂದು ಪರಿಗಣಿಸದ ಇತರ ವಿಷಯಗಳೂ ದೊಡ್ಡ ಪ್ರಶ್ನೆಯಾಗಿ  ಉಳಿದಿವೆ. ಇಂತಹ ವಿಚಾರಗಳನ್ನು ಇಸ್ರಾಯೇಲ್ ಅಧಿಕಾರಿಗಳು ಇದುವರೆಗೆ ಸ್ಪಷ್ಟವಾಗಿ ಪರಿಹರಿಸಿಲ್ಲ ಎಂದು ವರದಿಯಾಗಿದೆ. ಗಡಿ ದಾಟುವ ಕೇಂದ್ರವು ದಿನಕ್ಕೆ ಕೇವಲ ಆರು ಗಂಟೆಗಳವರೆಗೆ ಮಾತ್ರ ಕಾರ್ಯನಿರ್ವಹಿಸುವ ಸಾಧ್ಯತೆ ಇದೆ. ಈ ಅವಧಿಯಲ್ಲಿ ಗಾಜಾದಿಂದ ಗರಿಷ್ಠ 150 ಜನರಿಗೆ ಮಾತ್ರ ಹೊರಡುವ ಅವಕಾಶ ನೀಡಲಾಗುತ್ತದೆ. ಮತ್ತೊಂದೆಡೆ, ಈಜಿಪ್ಟ್ ಕಡೆಯಿಂದ ಗಾಜಾಕ್ಕೆ ಪ್ರವೇಶಿಸಲು ದಿನಕ್ಕೆ ಕೇವಲ 50 ಜನರಿಗೆ ಮಾತ್ರ ಅನುಮತಿ ನೀಡಲಾಗುತ್ತದೆ.

ಗಾಜಾ ನಗರದ ಅಲ್–ಶಿಫಾ ಆಸ್ಪತ್ರೆಯ ಮುಖ್ಯಸ್ಥರಾದ ಡಾ. ಮೊಹಮ್ಮದ್ ಅಬು ಸಲ್ಮಿಯಾ ಅವರು, ಸುಮಾರು 20,000 ಪ್ಯಾಲೇಸ್ತೀನಿಯರಿಗೆ ತುರ್ತು ವೈದ್ಯಕೀಯ ಚಿಕಿತ್ಸೆ ಅಗತ್ಯವಿದೆ ಎಂದು ತಿಳಿಸಿದ್ದಾರೆ. ಇದರ ಜೊತೆಗೆ, ದೀರ್ಘಕಾಲದ ಯುದ್ಧದಿಂದ ಗಾಜಾದ ಆರೋಗ್ಯ ವ್ಯವಸ್ಥೆ  ಸಂಪೂರ್ಣವಾಗಿ ನಾಶವಾಗಿರುವುದರಿಂದ, ತಕ್ಷಣ ಸ್ಥಳಾಂತರ ಅಗತ್ಯವಿರುವ 4,500 ಮಕ್ಕಳನ್ನು ಕೂಡ ಈ ಪಟ್ಟಿಗೆ ಸೇರಿಸಬೇಕು ಎಂದು ಅವರು ಹೇಳಿದ್ದಾರೆ. “ಇನ್ನೂ ಜೀವಗಳು ಹೋಗುತ್ತಿವೆ,ಪ್ರತಿ ದಿನ ಕೇವಲ 50 ರೋಗಿಗಳನ್ನು ಮಾತ್ರ ಸ್ಥಳಾಂತರಿಸುವುದು, ಗಾಜಾದ ಜನರ ನೈಜ ಅಗತ್ಯಗಳನ್ನು ಪೂರೈಸುವುದಿಲ್ಲ” ಎಂದು ಡಾ. ಸಲ್ಮಿಯಾ ಹೇಳಿದ್ದಾರೆ.

ಈಜಿಪ್ಟ್ ಗಡಿಯಲ್ಲಿ ಆಂಬುಲೆನ್ಸ್‌ಗಳ ಸಾಲು

ಈ ಪರಿಸ್ಥಿತಿಯಲ್ಲಿ, ನಿರ್ದಿಷ್ಟ ಸಂಖ್ಯೆಯ ರೋಗಿಗಳಿಗೆ ಮಾತ್ರ ಗಾಜಾದಿಂದ ಹೊರಬರಲು ಅವಕಾಶ ನೀಡುವುದರಿಂದ ಈಗಿನ ಸಂಕಷ್ಟ ಸುಧಾರಿಸುವ ಸಾಧ್ಯತೆ ಕಡಿಮೆ ಎಂದು ತೋರುತ್ತದೆ. ಇಸ್ರಾಯೇಲ್ ಅಧಿಕಾರಿಗಳು ವೈದ್ಯಕೀಯ ಸಾಮಗ್ರಿಗಳು ಹಾಗೂ ಹೆಚ್ಚುವರಿ ವೈದ್ಯಕೀಯ ಸಿಬ್ಬಂದಿಯನ್ನು ಗಾಜಾಕ್ಕೆ ಪ್ರವೇಶಿಸಲು ಅನುಮತಿಸಿದ್ದಾರೆ, ಆದರೆ ಇದು ಸಾಕಾಗುತ್ತಿಲ್ಲ ಎಂದು ಹೇಳಲಾಗುತ್ತಿದೆ.

ಈಜಿಪ್ಟ್ ಪ್ರದೇಶದಲ್ಲಿ, ಗಾಜಾದ ರೋಗಿಗಳಿಗೆ ಚಿಕಿತ್ಸೆ ನೀಡಲು ಆಂಬುಲೆನ್ಸ್‌ಗಳ ದೀರ್ಘ ಸಾಲುಗಳು ಗಡಿಯಲ್ಲಿ ಸಿದ್ಧವಾಗಿವೆ. ಈಜಿಪ್ಟ್ ಆರೋಗ್ಯ ಸಚಿವಾಲಯದ ಪ್ರಕಾರ, ಗಾಜಾದಿಂದ ಬಂದ ಗಾಯಾಳು ಹಾಗೂ ಅಸ್ವಸ್ಥರಿಗೆ ಚಿಕಿತ್ಸೆ ನೀಡಲು 12,000 ವೈದ್ಯರನ್ನು ನಿಯೋಜಿಸಲಾಗಿದೆ. ಇದಲ್ಲದೆ, ರಫಾಹ್ ಗಡಿ ರಸ್ತೆ ಪೂರ್ತಿ 30 ಕ್ಷಿಪ್ರ ವೈದ್ಯಕೀಯ ಸಹಾಯ ತಂಡಗಳನ್ನು ಈಜಿಪ್ಟ್ ಅಧಿಕಾರಿಗಳು ನಿಯೋಜಿಸಿದ್ದಾರೆ.

ನಮ್ಮ ಲೇಖನವನ್ನು ಓದಿದ್ದಕ್ಕಾಗಿ ಧನ್ಯವಾದಗಳು. ನಮ್ಮ ದೈನಂದಿನ ಸುದ್ದಿಪತ್ರಕ್ಕೆ ಚಂದಾದಾರರಾಗುವ ಮೂಲಕ ನೀವು ಸದಾ ಇತ್ತೀಚಿನ ಮಾಹಿತಿಯನ್ನು ಪಡೆದುಕೊಳ್ಳಬಹುದು.(ಇಲ್ಲಿ ಕ್ಲಿಕ್ ಮಾಡಿ).