ಗುಟೆರಸ್: ಕಾನೂನಿನ ಶಕ್ತಿಗೆ ಬದಲು ಶಕ್ತಿಯ ಕಾನೂನು ಮೇಲುಗೈ ಸಾಧಿಸಿದರೆ ಜಗತ್ತು ಅಸ್ಥಿರವಾಗುತ್ತದೆ.

ಲೇಖಕರು: ಫಾಲೋ ಮಾಸ್ಟ್ರೋಲಿಲ್ಲಿ

“ಶಕ್ತಿಯ ಕಾನೂನು, ಕಾನೂನಿನ ಶಕ್ತಿಯನ್ನು ಮೀರಿದಾಗ ಅದರ ಪರಿಣಾಮಗಳು ಜಗತ್ತನ್ನು ಗಂಭೀರವಾಗಿ ಅಸ್ಥಿರಗೊಳಿಸುತ್ತವೆ.”

ವಿಶ್ವಸಂಸ್ಥೆಯ ಮಹಾಸಚಿವ ಅಂಟೋನಿಯೊ ಗುಟೆರಸ್ ಅವರು ಇಟಲಿಗೆ ಭೇಟಿ ನೀಡಿ ಒಲಿಂಪಿಕ್ ಕ್ರೀಡಾಕೂಟದ ಉದ್ಘಾಟನೆಯಲ್ಲಿ ಪಾಲ್ಗೊಂಡ ಸಂದರ್ಭದಲ್ಲೇ,ಲಾ ರಿಪಬ್ಲಿಕಾ (La Repubblica) ಪತ್ರಿಕೆಗೆ ನೀಡಿದ ವಿಶೇಷ ಸಂದರ್ಶನದಲ್ಲಿ ಈ ಎಚ್ಚರಿಕೆಯನ್ನು ನೀಡಿದರು. ಅವರ ಈ ಮಾತುಗಳು, ಇಡೀ ಜಾಗತಿಕ ಸಮುದಾಯವನ್ನು ಕಾಡುತ್ತಿರುವ ಅಪಾಯದ ಮೂಲಭೂತ ಸ್ವರೂಪವನ್ನು ನೇರವಾಗಿ ಸ್ಪರ್ಶಿಸುತ್ತವೆ.

ಪ್ರಶ್ನೆ: ಒಲಿಂಪಿಕ್ ಕ್ರೀಡಾಕೂಟಗಳು ಇತಿಹಾಸದ ದೃಷ್ಟಿಯಿಂದ ಸಂವಾದ, ಒಳಗೊಳ್ಳುವಿಕೆ ಮತ್ತು ಶಾಂತಿಯ ಅವಕಾಶವಾಗಿವೆ. ಆದರೆ, 2026ರ ಆದ್ಯತೆಗಳ ಕುರಿತು ವಿಶ್ವಸಂಸ್ಥೆಯ ಮಹಾಸಭೆಯಲ್ಲಿ ನೀವು ನೀಡಿದ ಇತ್ತೀಚಿನ ಭಾಷಣದಲ್ಲಿ, ನೀವು ಹೀಗೆ ಹೇಳಿದಿರಿ: “ನಾವು ಸಂಘರ್ಷ, ಭಯ, ಅಸಮಾನತೆ ಮತ್ತು ಅನಿಶ್ಚಿತತೆಯಿಂದ ತುಂಬಿರುವ ಜಗತ್ತಿನಲ್ಲಿ ಬದುಕುತ್ತಿದ್ದೇವೆ. ಸ್ವಯಂ ವಿನಾಶಕಾರಿ ಭೌಗೋಳಿಕ ರಾಜಕೀಯ ವಿಭಜನೆಗಳು, ಅಂತರರಾಷ್ಟ್ರೀಯ ಕಾನೂನಿನ ನಿರ್ಲಜ್ಜ ಉಲ್ಲಂಘನೆಗಳು ಮತ್ತು ಅಭಿವೃದ್ಧಿ ಹಾಗೂ ಮಾನವೀಯ ನೆರವಿನ ವ್ಯಾಪಕ ಕಡಿತಗಳಿಂದ ಗುರುತಿಸಲ್ಪಟ್ಟ ಜಗತ್ತು ಇದು. ಈ ಶಕ್ತಿಗಳು ಮತ್ತು ಇನ್ನೂ ಅನೇಕ ಅಂಶಗಳು ಜಾಗತಿಕ ಸಹಕಾರದ ಅಡಿಪಾಯಗಳನ್ನು ಅಲುಗಿಸುತ್ತಿವೆ ಮತ್ತು ಬಹುಪಕ್ಷೀಯತೆಯ ಸ್ಥೈರ್ಯವನ್ನು ಪರೀಕ್ಷಿಸುತ್ತಿವೆ. ಇದು ನಮ್ಮ ಯುಗದ ವಿರೋಧಾಭಾಸ: ಅಂತರರಾಷ್ಟ್ರೀಯ ಸಹಕಾರ ನಮಗೆ ಅತ್ಯಂತ ಅಗತ್ಯವಿರುವ ಹೊತ್ತಲ್ಲೇ, ಅದನ್ನು ಬಳಸಲು ಮತ್ತು ಅದರಲ್ಲಿ ಹೂಡಿಕೆ ಮಾಡಲು ನಾವು ಅತ್ಯಲ್ಪ ಆಸಕ್ತಿ ತೋರುತ್ತಿರುವಂತೆ ಕಾಣುತ್ತದೆ.” ಈ ಪ್ರವೃತ್ತಿಯ ಮೂಲ ಕಾರಣಗಳು ನಿಮ್ಮ ದೃಷ್ಟಿಯಲ್ಲಿ ಯಾವುವು? ಮತ್ತು ಇದಕ್ಕೆ ಸಾಧ್ಯವಾದ ಪರಿಹಾರಗಳು ಏನು?

ಶ್ರೀಯುತ ಅಂತೋನಿಯೊ ಗುಟೆರಸ್: ಮೊದಲನೆಯದಾಗಿ, ಒಲಿಂಪಿಕ್ ಕ್ರೀಡಾಕೂಟಗಳು ಶಾಂತಿ, ಅಂತರರಾಷ್ಟ್ರೀಯ ಕಾನೂನಿನ ಗೌರವ ಮತ್ತು ಅಂತರರಾಷ್ಟ್ರೀಯ ಸಹಕಾರವನ್ನು ಸಂಕೇತಿಸುವ ಅತ್ಯುತ್ತಮ ಕ್ಷಣಗಳಾಗಿವೆ. ಪ್ರಾಚೀನ ಒಲಿಂಪಿಕ್ ಶಾಂತಿ ಒಪ್ಪಂದ (ಟ್ರೂಸ್) ಅನ್ನು ಪುನರುಜ್ಜೀವನಗೊಳಿಸುವ ಮೂಲಕ ಶಾಂತಿಯ ಶಕ್ತಿಶಾಲಿ ಸಂಕೇತವಾಗಿ ರೂಪಿಸಲು ಇಟಲಿ ತೋರಿಸಿದ ನಾಯಕತ್ವಕ್ಕಾಗಿ ನನ್ನ ಆಳವಾದ ಕೃತಜ್ಞತೆಯನ್ನು ವ್ಯಕ್ತಪಡಿಸಲು ಬಯಸುತ್ತೇನೆ.

ಇಟಲಿಯ ಉಪಕ್ರಮದ ಫಲವಾಗಿ, ವಿಶ್ವಸಂಸ್ಥೆಯ ಮಹಾಸಭೆ ಒಂದು ನಿರ್ಣಯವನ್ನು ಅಂಗೀಕರಿಸಿದ್ದು, ಮಿಲಾನ್–ಕೋರ್ಟಿನಾ 2026ರ ಚಳಿಗಾಲದ ಒಲಿಂಪಿಕ್ ಮತ್ತು ಪ್ಯಾರಾಲಿಂಪಿಕ್ ಕ್ರೀಡಾಕೂಟಗಳ ಮುನ್ನ ಮತ್ತು ಅವು ನಡೆಯುವ ಅವಧಿಯಲ್ಲಿ ರಾಷ್ಟ್ರಗಳು ಒಲಿಂಪಿಕ್ ಶಾಂತಿ ಒಪ್ಪಂದವನ್ನು ಪಾಲಿಸಬೇಕೆಂದು ಕರೆ ನೀಡಿದೆ. ಇದು ವಿಭಜನೆಯ ಕಾಲದಲ್ಲಿಯೂ ಮಾನವಕುಲವು ಹಂಚಿಕೊಂಡ ಮೌಲ್ಯಗಳ ಸುತ್ತ ಒಗ್ಗೂಡಬಹುದು ಎಂಬುದನ್ನು ನೆನಪಿಸುವ ಶಕ್ತಿಶಾಲಿ ಸ್ಮರಣಿಕೆ. ಕ್ರೀಡೆ ವಿಭಜನೆಗಳನ್ನು ಸೇತುವೆ ಮಾಡಬಲ್ಲ ವಿಶಿಷ್ಟ ಶಕ್ತಿ ಹೊಂದಿದೆ ಮತ್ತು ಸಹಕಾರವನ್ನು ಪ್ರೇರೇಪಿಸುತ್ತದೆ. 2026ರ ಕ್ರೀಡಾಕೂಟಗಳ ಮೂಲಕ ಈ ಮನೋಭಾವವನ್ನು ಅಪ್ಪಿಕೊಂಡಿರುವ ಇಟಲಿಯನ್ನು ನಾನು ಪ್ರಶಂಸಿಸುತ್ತೇನೆ.

ನಾನು ಉಲ್ಲೇಖಿಸಿದ ಸವಾಲುಗಳು ಅನೇಕ ಪರಸ್ಪರ ಸಂಬಂಧಿತ ಅಂಶಗಳಲ್ಲಿ ಆಳವಾಗಿ ಬೇರೂರಿವೆ. ಇಂದಿನ ಭೌಗೋಳಿಕ ರಾಜಕಾರಣದಲ್ಲಿ ನಿರ್ಲಕ್ಷ್ಯಪೂರ್ಣ ಕ್ರಮಗಳು ಅಪಾಯಕಾರಿ ಪ್ರತಿಕ್ರಿಯೆಗಳನ್ನು ಹುಟ್ಟುಹಾಕುತ್ತವೆ. ದಂಡರಹಿತ ಸಂಸ್ಕೃತಿ (impunity) ಉದ್ವಿಗ್ನತೆಯನ್ನು ಹೆಚ್ಚಿಸುತ್ತದೆ; ಅಸಮಾನತೆ ಸಮಾಜಗಳನ್ನು ಅಸ್ಥಿರಗೊಳಿಸುತ್ತದೆ; ಹವಾಮಾನ ಬದಲಾವಣೆ ಬಿರುಗಾಳಿಗಳು, ಕಾಡ್ಗಿಚ್ಚುಗಳು ಮತ್ತು ಸಮುದ್ರ ಮಟ್ಟದ ಏರಿಕೆಯನ್ನು ಪ್ರಚೋದಿಸುತ್ತದೆ. ನಿಯಂತ್ರಣರಹಿತ ತಂತ್ರಜ್ಞಾನ ಅಸ್ಥಿರತೆಯನ್ನು ಮತ್ತಷ್ಟು ಹೆಚ್ಚಿಸುತ್ತದೆ.

ಅದೇ ವೇಳೆ, ಅಂತರರಾಷ್ಟ್ರೀಯ ಕಾನೂನು ಮತ್ತು ಮಾನದಂಡಗಳ ನಿರ್ಲಜ್ಜ ಉಲ್ಲಂಘನೆಗಳು ಜಾಗತಿಕ ಸಂಸ್ಥೆಗಳ ವಿಶ್ವಾಸಾರ್ಹತೆಯನ್ನು ದುರ್ಬಲಗೊಳಿಸುತ್ತವೆ, ಶಕ್ತಿಶಾಲಿ ರಾಷ್ಟ್ರಗಳು ಪರಿಣಾಮವಿಲ್ಲದೆ ಕಾರ್ಯನಿರ್ವಹಿಸಬಹುದು ಎಂಬ ಅಪಾಯಕಾರಿ ಸಂದೇಶವನ್ನು ಕಳುಹಿಸುತ್ತವೆ. ಅಭಿವೃದ್ಧಿ ಮತ್ತು ಮಾನವೀಯ ನೆರವಿನಲ್ಲಿ ಹೂಡಿಕೆಗಳ ಕಡಿತವು ಈ ಸಂಕಟಗಳನ್ನು ಮತ್ತಷ್ಟು ಗಂಭೀರಗೊಳಿಸುತ್ತದೆ, ಜನಸಂಖ್ಯೆಯನ್ನು ಹಸಿವು, ಸ್ಥಳಾಂತರ ಮತ್ತು ಸಂಘರ್ಷಕ್ಕೆ ಒಳಪಡಿಸುತ್ತದೆ.

ಇದರ ಒಟ್ಟಾರೆ ಪರಿಣಾಮವೆಂದರೆ, ಜಾಗತಿಕ ಸಹಕಾರ ಅತ್ಯಂತ ಅಗತ್ಯವಾಗಿರುವ ಈ ಕ್ಷಣದಲ್ಲೇ ಸಂಘರ್ಷಗಳನ್ನು ತಡೆಯಲು, ಸಂಕಟಗಳಿಗೆ ಪ್ರತಿಕ್ರಿಯಿಸಲು, ಹವಾಮಾನ ಬದಲಾವಣೆಯನ್ನು ಎದುರಿಸಲು ಹಾಗೂ ವಿಶ್ವಸಂಸ್ಥೆಯ ಆಧಾರವಾಗಿರುವ ಶಾಂತಿ, ನ್ಯಾಯ ಮತ್ತು ಮಾನವ ಹಕ್ಕುಗಳ ತತ್ವಗಳನ್ನು ಕಾಯ್ದುಕೊಳ್ಳಲು ಬಹುಪಕ್ಷೀಯತೆಯ ದುರ್ಬಲವಾಗಿರುವುದು.

ಒಲಿಂಪಿಕ್ ಕ್ರೀಡಾಕೂಟಗಳು ಹವಾಮಾನ ಸಂಕಟದ ಬಗ್ಗೆ ಜಾಗೃತಿ ಮೂಡಿಸಲು ವಿಶಿಷ್ಟ ವೇದಿಕೆಯನ್ನು ಒದಗಿಸುತ್ತವೆ. ಹವಾಮಾನ ಬದಲಾವಣೆ ಚಳಿಗಾಲದ ಕ್ರೀಡೆಗಳ ಭವಿಷ್ಯವನ್ನೇ ನೇರವಾಗಿ ಬೆದರಿಸುತ್ತದೆ: ತುರ್ತು ಕ್ರಮ ಕೈಗೊಳ್ಳದಿದ್ದರೆ, ಇಂದು 90ಕ್ಕೂ ಹೆಚ್ಚು ಸ್ಥಳಗಳಲ್ಲಿ ವಿಶ್ವಾಸಾರ್ಹವಾಗಿ ಚಳಿಗಾಲದ ಕ್ರೀಡೆಗಳನ್ನು ಆಯೋಜಿಸಬಹುದಾದರೆ, 2080ರ ವೇಳೆಗೆ ಈ ಸಂಖ್ಯೆ ಕೇವಲ 30ಕ್ಕೆ ಇಳಿಯಬಹುದು.

ಕ್ರೀಡೆಯ ಭವಿಷ್ಯವನ್ನು—ಮತ್ತು ನಮ್ಮ ಗ್ರಹವನ್ನು—ರಕ್ಷಿಸಲು, ಪ್ಯಾರಿಸ್ ಒಪ್ಪಂದ, 2030 ಕಾರ್ಯಸೂಚಿ ಮತ್ತು ಸತತ ಅಭಿವೃದ್ಧಿ ಗುರಿಗಳಿಗೆ ಅನುಗುಣವಾಗಿ ತಾಪಮಾನ ಏರಿಕೆಯನ್ನು ನಿಯಂತ್ರಿಸಲು ಎಲ್ಲಾ ಸರ್ಕಾರಗಳಿಂದ ನಿರ್ಣಾಯಕ ಮತ್ತು ಸಾಮೂಹಿಕ ಕ್ರಮ ಅಗತ್ಯ. ಕ್ರೀಡಾಕೂಟಗಳು ಸರ್ಕಾರಗಳು, ಕ್ರೀಡಾಪಟುಗಳು ಮತ್ತು ನಾಗರಿಕರನ್ನು ಒಗ್ಗೂಡಿಸಬಹುದು—ಜಾಗತಿಕ ಸಹಕಾರವು ಶಾಂತಿ ಮತ್ತು ಹವಾಮಾನ ಎರಡರಲ್ಲಿಯೂ ನಿಜವಾದ ಫಲಿತಾಂಶಗಳನ್ನು ತರುತ್ತದೆ ಎಂಬುದನ್ನು ತೋರಿಸುತ್ತದೆ.

ನನಗೆ ದೃಢ ನಂಬಿಕೆ ಇದೆ—ಒಲಿಂಪಿಕ್ ಕ್ರೀಡಾಕೂಟಗಳು ಶಾಂತಿ, ಅಂತರರಾಷ್ಟ್ರೀಯ ಕಾನೂನಿನ ಗೌರವ ಮತ್ತು ಅಂತರರಾಷ್ಟ್ರೀಯ ಸಹಕಾರವನ್ನು ಸಂಕೇತಿಸುವ ಅತ್ಯುತ್ತಮ ಕ್ಷಣಗಳಾಗಿವೆ.

ಪ್ರಶ್ನೆ: ಇತ್ತೀಚೆಗೆ ನೀವು “ಕಾನೂನಿನ ಶಕ್ತಿಯನ್ನು ಬದಲಾಗಿ ಶಕ್ತಿಯ ಕಾನೂನು ಪ್ರಾಬಲ್ಯ ಸಾಧಿಸಬೇಕು ಎಂದು ನಂಬುವವರು ಇದ್ದಾರೆ. ವಾಸ್ತವವಾಗಿ, ಅಮೆರಿಕದ ಪ್ರಸ್ತುತ ನೀತಿಯನ್ನು ಗಮನಿಸಿದರೆ, ಬಹುಪಕ್ಷೀಯ ಪರಿಹಾರಗಳು ಪ್ರಸ್ತುತವಲ್ಲ ಎಂಬ ಸ್ಪಷ್ಟ ನಿಲುವು ಕಂಡುಬರುತ್ತದೆ ಮತ್ತು ಮುಖ್ಯವಾದದ್ದು ಅಮೆರಿಕದ ಶಕ್ತಿ ಹಾಗೂ ಪ್ರಭಾವದ ಬಳಕೆ ಮಾತ್ರ ಎಂಬ ನಂಬಿಕೆ ಇದೆ” ಎಂದು ಹೇಳಿದ್ದೀರಿ. ಈ ರೀತಿಯ ನಡೆ ಜಾಗತಿಕ ಶಾಂತಿ ಮತ್ತು ಸ್ಥಿರತೆಗೆ ಯಾವ ಪರಿಣಾಮಗಳನ್ನು ಹಾಗೂ ಅಪಾಯಗಳನ್ನು ಉಂಟುಮಾಡಬಹುದು?

ಶ್ರೀಯುತ ಅಂತೋನಿಯೊ ಗುಟೆರಸ್: ನಾವು ಶಾಂತಿ ನೆಲೆಸುವ, ಅಭಿವೃದ್ಧಿ ಹಂಚಿಕೊಳ್ಳುವ ಮತ್ತು ನಮ್ಮ ಸಾಮಾನ್ಯ ಮೌಲ್ಯಗಳು ಮೇಲುಗೈ ಸಾಧಿಸುವ ಸ್ಥಿರ ಜಗತ್ತನ್ನು ಬಯಸುವುದಾದರೆ, ಸಂಘರ್ಷವಲ್ಲ, ಸಹಕಾರದ ಮೇಲೆ ಆಧಾರಿತ ಬಹುಧ್ರುವೀಯತೆಯನ್ನು ಬೆಂಬಲಿಸಬೇಕು. ಕಾನೂನಿನ ಶಕ್ತಿಯನ್ನು ಬದಿಗೊತ್ತಿ ಶಕ್ತಿಯ ಕಾನೂನು ಪ್ರಭಾವ ಬೀರುವಾಗ, ಅದರ ಪರಿಣಾಮಗಳು ಆಳವಾಗಿ ಅಸ್ಥಿರಗೊಳಿಸುವಂತಿರುತ್ತವೆ. ದಂಡರಹಿತ ಸಂಸ್ಕೃತಿ (impunity) ಸಂಘರ್ಷಗಳನ್ನು ಹೆಚ್ಚಿಸುತ್ತದೆ, ಉದ್ವಿಗ್ನತೆಯನ್ನು ಉಲ್ಬಣಗೊಳಿಸುತ್ತದೆ ಮತ್ತು ಅವಿಶ್ವಾಸವನ್ನು ವಿಸ್ತರಿಸುತ್ತದೆ; ಇದರಿಂದ ಅಶಾಂತಿ ಬಯಸುವ ಶಕ್ತಿಗಳು ಬಿಕ್ಕಟ್ಟನ್ನು ದುರುಪಯೋಗಪಡಿಸಿಕೊಳ್ಳಲು ಮತ್ತು ಹೊಣೆಗಾರಿಕೆಯಿಲ್ಲದೆ ವರ್ತಿಸಲು ಅವಕಾಶ ಸೃಷ್ಟಿಯಾಗುತ್ತದೆ. ಬಹುಪಕ್ಷೀಯ ಸಹಕಾರ ದುರ್ಬಲಗೊಳ್ಳುತ್ತದೆ ಹಾಗೂ ಅಂತಾರಾಷ್ಟ್ರೀಯ ಸಂಸ್ಥೆಗಳು ಬಿಕ್ಕಟ್ಟುಗಳಿಗೆ ಪರಿಣಾಮಕಾರಿಯಾಗಿ ಪ್ರತಿಕ್ರಿಯಿಸಲು ಹೋರಾಡಬೇಕಾಗುತ್ತದೆ.

ಶಕ್ತಿಶಾಲಿ ರಾಷ್ಟ್ರಗಳು ಅಂತಾರಾಷ್ಟ್ರೀಯ ಕಾನೂನಿನ ಪಾಲನೆಯಿಗಿಂತ ತಮ್ಮ ಪ್ರಭಾವಕ್ಕೆ ಆದ್ಯತೆ ನೀಡಿದಾಗ, ಅದು ನಿಯಮಾಧಾರಿತ ಜಾಗತಿಕ ವ್ಯವಸ್ಥೆಯ ವಿಶ್ವಾಸಾರ್ಹತೆಯನ್ನು ಕುಂದಿಸುತ್ತದೆ. ನಿಯಮಗಳು ಮತ್ತು ಮಾನದಂಡಗಳನ್ನು ನಿರ್ಲಕ್ಷಿಸಬಹುದು ಎಂಬ ಅಪಾಯಕಾರಿ ಸಂದೇಶವನ್ನು ಇದು ರವಾನಿಸುತ್ತದೆ. ಇದರ ಪರಿಣಾಮವಾಗಿ ದೇಶಗಳ ನಡುವಿನ ವಿಶ್ವಾಸ ಕ್ಷೀಣಿಸುತ್ತದೆ, ಏಕಪಕ್ಷೀಯ ಕ್ರಮಗಳು ಹೆಚ್ಚುತ್ತವೆ ಮತ್ತು ಸಂಘರ್ಷ, ಅಸ್ಥಿರತೆ ಹಾಗೂ ಮಾನವ ಸಂಕಟದ ಅಪಾಯ ವೃದ್ಧಿಸುತ್ತದೆ.

ಅಂತಿಮವಾಗಿ, ಅಂತಾರಾಷ್ಟ್ರೀಯ ಕಾನೂನಿನ ಗೌರವ, ನಿರೀಕ್ಷಿತ ವರ್ತನೆ ಮತ್ತು ಸಮೂಹ ಸಹಕಾರವಿಲ್ಲದೆ ಜಾಗತಿಕ ಶಾಂತಿ ಮತ್ತು ಸ್ಥಿರತೆ ಸಾಧ್ಯವಿಲ್ಲ. ಹಂಚಿಕೊಂಡ ಹೊಣೆಗಾರಿಕೆ ಹಾಗೂ ಮೌಲ್ಯಗಳಲ್ಲಿ ನೆಲೆಯೂರಿದ ಬಲಿಷ್ಠ ಮತ್ತು ಸಮಾವೇಶಕಾರಿ ಬಹುಪಕ್ಷೀಯ ಸಂಸ್ಥೆಗಳು, ಸಂಘರ್ಷ ನಿರ್ವಹಣೆ, ಅಸಮಾನತೆ ನಿವಾರಣೆ, ಮಾನವೀಯ ಬಿಕ್ಕಟ್ಟುಗಳಿಗೆ ಪ್ರತಿಕ್ರಿಯೆ, ಹವಾಮಾನ ಬದಲಾವಣೆಗೆ ಸ್ಪಂದನೆ ಹಾಗೂ ವಿಶ್ವಸಂಸ್ಥೆಯ ಸನ್ನದಿನ ತತ್ವಗಳನ್ನು ಉಳಿಸುವಲ್ಲಿ ಅನಿವಾರ್ಯ.

ಪ್ರಶ್ನೆ: 2026ರ ಆದ್ಯತೆಗಳ ಕುರಿತು ನಿಮ್ಮ ಭಾಷಣದಲ್ಲಿ, ಗಾಜಾ ಕದನ ವಿರಾಮದ ಎರಡನೇ ಹಂತ ಆರಂಭವಾಗಿರುವುದನ್ನು ನೀವು ಸ್ವಾಗತಿಸಿದ್ದೀರಿ. ಆದಾಗ್ಯೂ, ಅನೇಕ ವಿಶ್ಲೇಷಕರು “ಬೋರ್ಡ್ ಆಫ್ ಪೀಸ್” (Board of Peace) ಅನ್ನು ವಿಶ್ವಸಂಸ್ಥೆಗೆ ನೇರ ಸವಾಲು ಎಂದು ಪರಿಗಣಿಸುತ್ತಿದ್ದಾರೆ. ಅಧ್ಯಕ್ಷ ಟ್ರಂಪ್ ಅವರೇ ಇದನ್ನು ವಿಶ್ವಸಂಸ್ಥೆಗೆ ಪರ್ಯಾಯವಾಗಿಸಬಹುದು ಎಂದು ಹೇಳಿದ್ದಾರೆ. ನೀವು ಇದನ್ನು ಅಪಾಯವೆಂದು ನೋಡುತ್ತೀರಾ?

ಶ್ರೀಯುತ ಅಂತೋನಿಯೊ ಗುಟೆರಸ್: ಭದ್ರತಾ ಮಂಡಳಿ ಗಾಜಾಕ್ಕೆ ಸಂಬಂಧಿಸಿದ ನಿರ್ಣಯ 2803 ಅನ್ನು ಅಂಗೀಕರಿಸಿದೆ. ಈ ನಿರ್ಣಯವು “Board of Peace” (ಶಾಂತಿ ಮಂಡಳಿ) ಸೇರಿದಂತೆ ವಿವಿಧ ಸಂಸ್ಥೆಗಳು ಮತ್ತು ಪಾತ್ರಧಾರಿಗಳ ಹೊಣೆಗಾರಿಕೆಗಳನ್ನು ಸ್ಪಷ್ಟವಾಗಿ ವಿವರಿಸುತ್ತದೆ. ಈ ನಿರ್ಣಯವನ್ನು ಸಂಪೂರ್ಣವಾಗಿ ಜಾರಿಗೆ ತರುವುದು ಅತ್ಯಂತ ಅಗತ್ಯ. ಎಲ್ಲಾ ಪಕ್ಷಗಳು ಇದನ್ನು ಕಟ್ಟುನಿಟ್ಟಾಗಿ ಪಾಲಿಸಬೇಕೆಂದು ನಾನು ಒತ್ತಾಯಿಸುತ್ತೇನೆ. ಎಲ್ಲಾ ಪ್ರಯತ್ನಗಳು ಸಂಬಂಧಿತ ವಿಶ್ವಸಂಸ್ಥೆಯ ನಿರ್ಣಯಗಳು ಮತ್ತು ಅಂತರರಾಷ್ಟ್ರೀಯ ಕಾನೂನಿನ ಮಾರ್ಗದರ್ಶನದಲ್ಲಿಯೇ ನಡೆಯಬೇಕು.

ಗಾಜಾದಲ್ಲಿ ಕದನ ವಿರಾಮ ಮುಂದುವರಿಯಬೇಕು ಮತ್ತು ದೃಢವಾಗಿ ಎರಡನೇ ಹಂತಕ್ಕೆ ಪ್ರವೇಶಿಸಬೇಕು. ಇದರರ್ಥ—ಇಸ್ರಾಯೇಲ್ ಪಡೆಗಳ ಸಂಪೂರ್ಣ ಹಿಂಪಡೆಯುವಿಕೆ, ಸಶಸ್ತ್ರ ಗುಂಪುಗಳ ವಿಸರ್ಜನೆ, ಹಾಗೂ ಎರಡು-ರಾಜ್ಯ ಪರಿಹಾರವನ್ನು ಒಳಗೊಂಡ ನಂಬಲರ್ಹ ರಾಜಕೀಯ ಭವಿಷ್ಯಕ್ಕೆ ಅಗತ್ಯ ಪರಿಸ್ಥಿತಿಗಳನ್ನು ನಿರ್ಮಿಸುವುದು.

ಅದೇ ಸಮಯದಲ್ಲಿ, ಹೊಣೆಗಾರಿಕೆಗಳ ವ್ಯಾಪ್ತಿಯನ್ನು ಸ್ಪಷ್ಟಪಡಿಸುವುದು ಮುಖ್ಯ. ಅಂತರರಾಷ್ಟ್ರೀಯ ಶಾಂತಿ ಮತ್ತು ಭದ್ರತೆಯ ಜವಾಬ್ದಾರಿ ವಿಶ್ವಸಂಸ್ಥೆಯ ಮೇಲಿದೆ—ವಿಶೇಷವಾಗಿ ಭದ್ರತಾ ಮಂಡಳಿಯ ಮೇಲಿದೆ. ಎಲ್ಲಾ ಸದಸ್ಯ ರಾಷ್ಟ್ರಗಳ ಪರವಾಗಿ ನಿರ್ಣಯಗಳನ್ನು ಕೈಗೊಳ್ಳುವ, ಬಾಧ್ಯತೆಯುಳ್ಳ ತೀರ್ಮಾನಗಳನ್ನು ಅಂಗೀಕರಿಸುವ ಮತ್ತು ಅಂತರರಾಷ್ಟ್ರೀಯ ಕಾನೂನಿನಡಿ ಬಲಪ್ರಯೋಗಕ್ಕೆ ಅನುಮತಿ ನೀಡುವ ಅಧಿಕಾರವನ್ನು ಸನ್ನದಿನ ಪ್ರಕಾರ ಹೊಂದಿರುವ ಏಕೈಕ ಸಂಸ್ಥೆ ಭದ್ರತಾ ಮಂಡಳಿ. ಈ ಪಾತ್ರವನ್ನು ಬೇರೆ ಯಾವುದೇ ಸಂಸ್ಥೆ ಅಥವಾ ಉಪಕ್ರಮ ಬದಲಾಯಿಸಲು ಸಾಧ್ಯವಿಲ್ಲ. ಇದೇ ಕಾರಣಕ್ಕೆ ಭದ್ರತಾ ಮಂಡಳಿಯನ್ನು ಬಲಪಡಿಸುವುದು ಮತ್ತು ಸುಧಾರಿಸುವುದು ಅತ್ಯಂತ ಅಗತ್ಯ.

ಗಾಜಾದ ನೆಲಮಟ್ಟದಲ್ಲಿ, ಕದನ ವಿರಾಮದ ನಂತರ ಮಾನವೀಯ ನೆರವು ಗಣನೀಯವಾಗಿ ಹೆಚ್ಚಾಗಿದೆ. ಆದರೂ ಅದು ಇನ್ನೂ ಸಾಕಷ್ಟಿಲ್ಲ. ಆಹಾರಕ್ಕಿಂತ ಹೊರತಾಗಿ, ಆರೋಗ್ಯ ಸೇವೆ, ಆಶ್ರಯ, ನೀರು ಮತ್ತು ನೈರ್ಮಲ್ಯ ಕ್ಷೇತ್ರಗಳಲ್ಲಿ ಅಪಾರ ಅಗತ್ಯಗಳಿವೆ. ಅಗತ್ಯವಿರುವವರಿಗೆ ಜೀವ ರಕ್ಷಕ ನೆರವು ತಲುಪುವಂತೆ ಅಡ್ಡಿಗಳನ್ನು ನಿವಾರಿಸಲು ವಿಶ್ವಸಂಸ್ಥೆ ಸಂಪೂರ್ಣವಾಗಿ ಬದ್ಧವಾಗಿದೆ

ಪ್ರಶ್ನೆ: ನೀವು ಇತ್ತೀಚೆಗೆ ವಿಶ್ವಸಂಸ್ಥೆಯ ರಾಯಭಾರಿಗಳಿಗೆ ಪತ್ರ ಕಳುಹಿಸಿ, ವಿಶ್ವಸಂಸ್ಥೆಗೆ “ತಕ್ಷಣ ಎದುರಾಗುವ ಹಣಕಾಸಿನ ಕುಸಿತ” (imminent financial collapse) ಎಂಬ ಅಪಾಯವಿದೆ ಎಂದು ಎಚ್ಚರಿಸಿದ್ದೀರಿ. ವಿಶ್ವಸಂಸ್ಥೆ ದಿವಾಳಿಯಾಗುವ ಸ್ಥಿತಿಗೆ (bankruptcy) ಹೋಗುವ ಅಪಾಯದಲ್ಲಿದೆಯೇ? ಇದು ಯಾಕೆ ಸಂಭವಿಸುತ್ತಿದೆ? ಇದನ್ನು ತಪ್ಪಿಸಲು ಸದಸ್ಯ ರಾಷ್ಟ್ರಗಳು ಏನು ಮಾಡಬೇಕು?

ಶ್ರೀಯುತ ಅಂತೋನಿಯೊ ಗುಟೆರಸ್: ನಾನು ಇದು ಸಾಮಾನ್ಯ ನಗದು ಹರಿವಿನ (cash-flow) ಸಮಸ್ಯೆ ಅಲ್ಲ ಎಂದು ಸ್ಪಷ್ಟವಾಗಿ ಒತ್ತಿ ಹೇಳಿದ್ದೇನೆ. ಸದಸ್ಯ ರಾಷ್ಟ್ರಗಳಿಗೆ ನಾನು ತಿಳಿಸಿದ್ದೇನೆಂದರೆ, ಹಿಂದೆ ಬಾಕಿ ಉಳಿದಿರುವ ನಿಗದಿತ ಕೊಡುಗೆಗಳ (assessed contributions) ಸಂಕಷ್ಟಗಳನ್ನು ವಿಶ್ವಸಂಸ್ಥೆ ನಿಭಾಯಿಸಿದ್ದರೂ, ಇಂದಿನ ಪರಿಸ್ಥಿತಿ ಸಂಪೂರ್ಣವಾಗಿ ಭಿನ್ನವಾಗಿದೆ. ಈಗ ಕೆಲವು ದೇಶಗಳು ಅಧಿಕೃತವಾಗಿಯೇ, ಅನುಮೋದಿತ ಸಾಮಾನ್ಯ ಬಜೆಟ್‌ನ ಮಹತ್ವದ ಭಾಗಕ್ಕೆ ಹಣಕಾಸು ಒದಗಿಸುವ ನಿಗದಿತ ಕೊಡುಗೆಗಳನ್ನು ಪಾವತಿಸುವುದಿಲ್ಲ ಎಂದು ಘೋಷಿಸಿವೆ.

ಇದು ರಚನಾತ್ಮಕ (structural) ಹಣಕಾಸು ಬಿಕ್ಕಟ್ಟನ್ನು ಸೃಷ್ಟಿಸಿದೆ. ಪ್ರಸ್ತುತ ಹಣಕಾಸು ನಿಯಮಗಳ ಪ್ರಕಾರ, ಹಣ ಬಂದಿಲ್ಲದಿದ್ದರೆ,  ಅದರ ಕಾರ್ಯವ್ಯಾಪ್ತಿಯನ್ನು ಸಂಪೂರ್ಣವಾಗಿ ಜಾರಿಗೊಳಿಸಲು ಸಾಧ್ಯವಾಗದಿದ್ದರೂ ಖರ್ಚಾಗದ ಮೊತ್ತವನ್ನು ಹಿಂದಿರುಗಿಸಬೇಕೆಂದು ಸಂಸ್ಥೆ ಕಾನೂನಾತ್ಮಕವಾಗಿ ಬಾಧ್ಯವಾಗಿದೆ. ಇದರ ಪರಿಣಾಮವಾಗಿ, ಅನಿಶ್ಚಿತತೆ, ಕಾರ್ಯಾಚರಣೆಗಳಲ್ಲಿ ವಿಳಂಬ, ನೇಮಕಾತಿ ಸ್ಥಗಿತ, ಮತ್ತು ಸದಸ್ಯ ರಾಷ್ಟ್ರಗಳೇ ಅನುಮೋದಿಸಿದ ಕರ್ತವ್ಯಗಳನ್ನು ಸಂಪೂರ್ಣವಾಗಿ ನಿಭಾಯಿಸಲು ಸಾಧ್ಯವಾಗದ ಸ್ಥಿತಿ ಉಂಟಾಗಿದೆ.

ಪ್ರಸ್ತುತ ದಿಕ್ಕು ಮುಂದುವರಿಯಲು ಸಾಧ್ಯವಿಲ್ಲ. ಇದು ವಿಶ್ವಸಂಸ್ಥೆಯನ್ನು ಗಂಭೀರ ಹಣಕಾಸು ಅಪಾಯಕ್ಕೆ ತಳ್ಳುತ್ತದೆ ಮತ್ತು ಕಠಿಣ ಆಯ್ಕೆಯನ್ನು ಎದುರುಗೊಳಿಸುತ್ತದೆ: ಸದಸ್ಯ ರಾಷ್ಟ್ರಗಳು ವಿಶ್ವಸಂಸ್ಥೆಯ ಹಣಕಾಸು ನಿಯಮಗಳನ್ನು ಸಂಪೂರ್ಣವಾಗಿ ಪರಿಷ್ಕರಿಸಲು ಒಪ್ಪಿಕೊಳ್ಳಬೇಕು — ಅಥವಾ ಸಂಸ್ಥೆಯ ಹಣಕಾಸು ಕುಸಿತದ ನೈಜ ಅಪಾಯವನ್ನು ಒಪ್ಪಿಕೊಳ್ಳಬೇಕು.

ಪ್ರಶ್ನೆ: ಇತ್ತೀಚೆಗೆ ಅಬುಧಾಬಿಯಲ್ಲಿ ಉಕ್ರೇನ್, ರಷ್ಯಾ ಮತ್ತು ಅಮೆರಿಕ ನಡುವೆ ಮೊದಲ ತ್ರಿಪಕ್ಷೀಯ ಮಾತುಕತೆ ನಡೆಯಿತು. ಆದರೆ ಭದ್ರತಾ ಭರವಸೆಗಳಿಗೆ ಸಂಬಂಧಿಸಿದ ಷರತ್ತಾಗಿ ಉಕ್ರೇನ್ ತನ್ನ ಕೆಲವು ಭೂಪ್ರದೇಶಗಳನ್ನು ಬಿಟ್ಟುಕೊಡಬೇಕೆಂದು ಹೇಳಲಾಗಿದೆ. ನ್ಯಾಯಸಮ್ಮತ ಹಾಗೂ ಶಾಶ್ವತ ಶಾಂತಿಗಾಗಿ ಇದನ್ನು ಸ್ವೀಕಾರಾರ್ಹ ಪರಿಹಾರವೆಂದು ನೀವು ಪರಿಗಣಿಸುತ್ತೀರಾ?

ಶ್ರೀಯುತ ಅಂತೋನಿಯೊ ಗುಟೆರಸ್: ನ್ಯಾಯಸಮ್ಮತ ಹಾಗೂ ಒಳಗೊಳ್ಳುವ ಶಾಂತಿಯನ್ನು ಸಾಧಿಸುವ ಎಲ್ಲಾ ಪ್ರಯತ್ನಗಳನ್ನು ನಾನು ಸ್ವಾಗತಿಸುತ್ತೇನೆ, ಮತ್ತು ಅಂತಹ ಪ್ರಯತ್ನಗಳಿಗೆ ಬೆಂಬಲ ನೀಡಲು ವಿಶ್ವಸಂಸ್ಥೆ ಸಿದ್ಧವಾಗಿದೆ. ಆದರೆ, ಉಕ್ರೇನ್ ಕುರಿತು ಚರ್ಚಿಸುವಾಗ ಕೆಲವು ಮೂಲಭೂತ ತತ್ವಗಳನ್ನು ಮರೆಯಬಾರದು. ಮೊದಲನೆಯದಾಗಿ, ಉಕ್ರೇನ್ ಮೇಲೆ ದಾಳಿ ಮಾಡಿದ್ದು ರಷ್ಯಾ, ಉಕ್ರೇನ್ ಅಲ್ಲ. ಎರಡನೆಯದಾಗಿ, ಈ ಸಂಘರ್ಷ ಸೇರಿದಂತೆ ಯಾವುದೇ ಸಂಘರ್ಷದ ಸಾಧ್ಯ ಪರಿಹಾರಗಳು ಅಂತರರಾಷ್ಟ್ರೀಯ ಕಾನೂನು ಹಾಗೂ ವಿಶ್ವಸಂಸ್ಥೆ ಘೋಷಣಾಪತ್ರದ ತತ್ವಗಳ ಮೇಲೆ ಆಧಾರಿತವಾಗಿರಬೇಕು. ಈ ನಿಯಮಗಳ ಉಲ್ಲಂಘನೆ ಅತ್ಯಂತ ಅಪಾಯಕಾರಿ, ಏಕೆಂದರೆ ಅದು “ಅಂತರರಾಷ್ಟ್ರೀಯ ಕಾನೂನು ಇನ್ನು ಮಹತ್ವವಿಲ್ಲ” ಎಂಬ ಸಂದೇಶವನ್ನು ರವಾನಿಸಿ, ರಾಷ್ಟ್ರಗಳು ಪರಿಣಾಮಗಳ ಭಯವಿಲ್ಲದೆ ಕಾರ್ಯನಿರ್ವಹಿಸಬಹುದು ಎಂಬ ಭಾವನೆ ಮೂಡಿಸುತ್ತದೆ.

ಉಕ್ರೇನ್‌ನಲ್ಲಿ ಯಾವುದೇ ಶಾಂತಿ, ವಿಶ್ವಸಂಸ್ಥೆ ಘೋಷಣಾಪತ್ರ ಹಾಗೂ ಅಂತರರಾಷ್ಟ್ರೀಯ ಕಾನೂನಿನ ಪ್ರಕಾರ, ಅದರ ಅಂತಾರಾಷ್ಟ್ರೀಯವಾಗಿ ಮಾನ್ಯಗೊಂಡ ಗಡಿಗಳೊಳಗಿನ ಸಾರ್ವಭೌಮತ್ವ, ಸ್ವಾತಂತ್ರ್ಯ ಮತ್ತು ಭೌಗೋಳಿಕ ಸಮಗ್ರತೆಯನ್ನು ಕಾಪಾಡಬೇಕು. ಪಕ್ಷಗಳು ಒಪ್ಪಿಕೊಂಡು ನಮ್ಮನ್ನು ಕೇಳಿದರೆ, ಶಾಂತಿ ಪ್ರಕ್ರಿಯೆಗೆ ಬೆಂಬಲ ನೀಡಲು ವಿಶ್ವಸಂಸ್ಥೆ ಸಿದ್ಧವಾಗಿದೆ; ಆದರೆ ಅಂತಹ ನಿರ್ಧಾರಗಳು ವಿಶ್ವಸಂಸ್ಥೆಯ ಮೇಲೆ ಅವಲಂಬಿತವಲ್ಲ — ಅವು ಸಂಪೂರ್ಣವಾಗಿ ಸಂಬಂಧಿತ ಪಕ್ಷಗಳ ಮೇಲಿದೆ.

ಒಂದು ತಿಂಗಳೊಳಗೆ, ರಷ್ಯಾ ಒಕ್ಕೂಟ ಉಕ್ರೇನ್ ಮೇಲೆ ಪೂರ್ಣಪ್ರಮಾಣದ ಆಕ್ರಮಣ ಆರಂಭಿಸಿದ ನಾಲ್ಕು ವರ್ಷಗಳನ್ನು ನಾವು ಸ್ಮರಿಸಲಿದ್ದೇವೆ — ಈ ಯುದ್ಧವು ಅಪಾರ ಸಾವು-ನಾಶವನ್ನುಂಟುಮಾಡಿ, ಎರಡೂ ದೇಶಗಳಿಂದ ಅಸಂಖ್ಯಾತ ಜೀವಗಳನ್ನು ಕಸಿದುಕೊಂಡಿದೆ; ಇದು ಯುರೋಪಿನ ಶಾಂತಿ ಮತ್ತು ಭದ್ರತೆಗೆ ಮಾತ್ರವಲ್ಲ, ವಿಶ್ವಸಂಸ್ಥೆಯ ಮೂಲ ತತ್ವಗಳಿಗೂ ಗಂಭೀರ ಬೆದರಿಕೆಯಾಗಿದೆ.

ಇತ್ತೀಚಿನ ತಿಂಗಳುಗಳಲ್ಲಿ, ತಾಪಮಾನಗಳು ಶೂನ್ಯಕ್ಕಿಂತ ಬಹಳ ಕೆಳಗೆ ಇಳಿದಿರುವ ಸಂದರ್ಭದಲ್ಲಿಯೂ, ಉಕ್ರೇನ್‌ನ ಇಂಧನ ಮೂಲಸೌಕರ್ಯಗಳ ಮೇಲೆ ವ್ಯವಸ್ಥಿತ ಹಾಗೂ ತೀವ್ರ ದಾಳಿಗಳು ಹೆಚ್ಚಾಗಿವೆ; ಇದರ ಮಾನವೀಯ ಪರಿಣಾಮಗಳು ವಿನಾಶಕಾರಿ. ಈ ದಾಳಿಗಳಲ್ಲಿ ಅನೇಕ ನಾಗರಿಕರು ಸಾವನ್ನಪ್ಪಿದ್ದಾರೆ ಹಾಗೂ ಗಾಯಗೊಂಡಿದ್ದಾರೆ, ಮತ್ತು ಲಕ್ಷಾಂತರ ಉಕ್ರೇನಿಯನ್ನರು ವಿದ್ಯುತ್, ಉಷ್ಣತೆ ಹಾಗೂ ನೀರಿಲ್ಲದೆ ಉಳಿದಿದ್ದಾರೆ. ಎಲ್ಲಿ ನಡೆದರೂ, ನಾಗರಿಕರು ಹಾಗೂ ನಾಗರಿಕ ಮೂಲಸೌಕರ್ಯಗಳ ಮೇಲಿನ ದಾಳಿಗಳು ಸಂಪೂರ್ಣವಾಗಿ ಅಸ್ವೀಕಾರಾರ್ಹ ಮತ್ತು ನ್ಯಾಯಸಮ್ಮತವಲ್ಲ — ಅವು ತಕ್ಷಣ ನಿಲ್ಲಬೇಕು. ಎಂದಿಗೂ ಆರಂಭವಾಗಬಾರದಿದ್ದ ಈ ಯುದ್ಧವು ಈಗಲೇ ಕೊನೆಗಾಣಬೇಕು.

ನಮ್ಮ ಲೇಖನವನ್ನು ಓದಿದ್ದಕ್ಕಾಗಿ ಧನ್ಯವಾದಗಳು. ನಮ್ಮ ದೈನಂದಿನ ಸುದ್ದಿಪತ್ರಕ್ಕೆ ಚಂದಾದಾರರಾಗುವ ಮೂಲಕ ನೀವು ಸದಾ ಇತ್ತೀಚಿನ ಮಾಹಿತಿಯನ್ನು ಪಡೆದುಕೊಳ್ಳಬಹುದು.(ಇಲ್ಲಿ ಕ್ಲಿಕ್ ಮಾಡಿ).