ಗಾಜಾ: ವರ್ಷದ ಆರಂಭದಿಂದಲೇ 22 ಆಸ್ಪತ್ರೆಗಳ ಮೇಲೆ ದಾಳಿ
ವ್ಯಾಟಿಕನ್ ವರದಿ
ವಿಶ್ವಸಂಸ್ಥೆ ಮತ್ತು ವಿಶ್ವ ಆರೋಗ್ಯ ಸಂಸ್ಥೆ ಗಾಜಾ ಪಟ್ಟಿಯಲ್ಲಿ ಹದಗೆಡುತ್ತಿರುವ ಮಾನವೀಯ ಪರಿಸ್ಥಿತಿಯ ಕುರಿತು ಹೊಸ ಆತಂಕಗಳನ್ನು ವ್ಯಕ್ತಪಡಿಸಿವೆ. ಕಳೆದ ವರ್ಷದ ಅಕ್ಟೋಬರ್ನಲ್ಲಿ ಯುದ್ಧ ವಿರಾಮ ಜಾರಿಗೆ ಬಂದಿದ್ದರೂ, ಆರೋಗ್ಯ ವ್ಯವಸ್ಥೆ ಇನ್ನೂ ತೀವ್ರ ಒತ್ತಡದಲ್ಲಿಯೇ ಉಳಿದಿದೆ. ಅಂತರರಾಷ್ಟ್ರೀಯ ಸಂಸ್ಥೆಗಳ ಪ್ರಕಾರ, ಆಸ್ಪತ್ರೆಗಳು ಮತ್ತು ವೈದ್ಯಕೀಯ ಸೌಲಭ್ಯಗಳ ಮೇಲಿನ ದಾಳಿಗಳು ಮುಂದುವರಿಯುತ್ತಿವೆ. ಅದೇ ವೇಳೆ, ಅಗತ್ಯ ಔಷಧಿಗಳು ಮತ್ತು ಉಪಕರಣಗಳ ಕೊರತೆಯಿಂದ ಸಾವಿರಾರು ಜನರು ಸಮರ್ಪಕ ಚಿಕಿತ್ಸೆಯಿಂದ ವಂಚಿತರಾಗುತ್ತಿದ್ದಾರೆ.
ಕಾರ್ಯನಿರ್ವಹಿಸಲು ಹೋರಾಡುತ್ತಿರುವ ಆಸ್ಪತ್ರೆಗಳು
2026ರ ಆರಂಭದಿಂದಲೇ, ಗಾಜಾದಾದ್ಯಂತ ಆಸ್ಪತ್ರೆಗಳು ಮತ್ತು ಆರೋಗ್ಯ ಕೇಂದ್ರಗಳನ್ನು ಹಾನಿಗೊಳಪಡಿಸಿದ 22 ದಾಳಿಗಳನ್ನು ವಿಶ್ವ ಆರೋಗ್ಯ ಸಂಸ್ಥೆ ದಾಖಲಿಸಿದೆ. ವಿಶ್ವಸಂಸ್ಥೆಯ ಮಾನವೀಯ ವ್ಯವಹಾರಗಳ ಸಮನ್ವಯ ಕಚೇರಿ (OCHA) ವರದಿ ಮಾಡಿದ ಈ ಘಟನೆಗಳು ಸಾವುನೋವುಗಳಿಗೆ ಕಾರಣವಾಗಿದ್ದು, ಈಗಾಗಲೇ ದುರ್ಬಲಗೊಂಡಿರುವ ವೈದ್ಯಕೀಯ ಜಾಲವನ್ನು ಇನ್ನಷ್ಟು ಅಸ್ತವ್ಯಸ್ತಗೊಳಿಸಿವೆ. ಇದರಿಂದ ರೋಗಿಗಳ ಸ್ಥಳಾಂತರ ಪ್ರಕ್ರಿಯೆಗೂ ಅಡಚಣೆ ಉಂಟಾಗಿ, ಆಸ್ಪತ್ರೆಗಳ ಕಾರ್ಯಾಚರಣೆ ಸೀಮಿತಗೊಂಡಿದೆ.
ಪ್ರಸ್ತುತ, ಗಾಜಾದ ಆಸ್ಪತ್ರೆಗಳ ಅರ್ಧಕ್ಕಿಂತ ಸ್ವಲ್ಪ ಹೆಚ್ಚು ಮಾತ್ರ ಭಾಗಶಃ ಕಾರ್ಯನಿರ್ವಹಿಸುತ್ತಿವೆ. ಜೊತೆಗೆ, ಸುಮಾರು 58 ಪ್ರತಿಶತ ಪ್ರಾಥಮಿಕ ಆರೋಗ್ಯ ಕೇಂದ್ರಗಳು ಕಾರ್ಯನಿರ್ವಹಿಸುತ್ತಿವೆ. ಆದರೆ, ಈ ಸೌಲಭ್ಯಗಳಲ್ಲಿ ಒಂದೂ ಸಂಪೂರ್ಣ ಸಾಮರ್ಥ್ಯದಲ್ಲಿ ಕಾರ್ಯನಿರ್ವಹಿಸುತ್ತಿಲ್ಲ.
ನಾಗರಿಕರ ಮೇಲಿನ ಪರಿಣಾಮಗಳು ಇನ್ನೂ ಭೀಕರವಾಗಿಯೇ ಉಳಿದಿವೆ. 2025ರ ಅಕ್ಟೋಬರ್ನಿಂದ ಯುದ್ಧ ವಿರಾಮ ಜಾರಿಯಲ್ಲಿದ್ದರೂ, ಆ ಪ್ರದೇಶದ ವಿವಿಧ ಭಾಗಗಳಲ್ಲಿ ಹಿಂಸಾಚಾರ ಮುಂದುವರಿದಿದೆ. ಮಾನವೀಯ ಸಂಸ್ಥೆಗಳ ಪ್ರಕಾರ, ಯುದ್ಧ ವಿರಾಮದ ನಂತರದ ತಿಂಗಳುಗಳಲ್ಲಿ ಕನಿಷ್ಠ 880 ಮಂದಿ ಸಾವನ್ನಪ್ಪಿದ್ದು, ಸುಮಾರು 2,600 ಮಂದಿ ಗಾಯಗೊಂಡಿದ್ದಾರೆ.
ಮಾನವೀಯ ನೋವನ್ನು ಮತ್ತಷ್ಟು ಗಂಭೀರಗೊಳಿಸುತ್ತಿವ ಕೊರತೆಗಳು
ಸ್ಥಳದಲ್ಲಿರುವ ವೈದ್ಯಕೀಯ ಸಿಬ್ಬಂದಿ, ಆಮ್ಲಜನಕ ಸಾಂದ್ರಕಗಳು, ಪ್ರಯೋಗಾಲಯ ಸಾಮಗ್ರಿಗಳು, ಮೂಳೆಚಿಕಿತ್ಸಾ ಉಪಕರಣಗಳು ಮತ್ತು ಕೃತಕ ಅಂಗಗಳ ತೀವ್ರ ಕೊರತೆಯ ಬಗ್ಗೆ ವರದಿ ಮಾಡುತ್ತಿದ್ದಾರೆ. ಈ ಕೊರತೆಗಳು ವಿಶೇಷವಾಗಿ ಮಕ್ಕಳು ಮತ್ತು ಗಂಭೀರ ಗಾಯಗಳಿಂದ ಬಳಲುತ್ತಿರುವ ರೋಗಿಗಳನ್ನು ಒಳಗೊಂಡ ಅತೀ ದುರ್ಬಲ ರೋಗಿಗಳ ಮೇಲೆ ಹೆಚ್ಚಿನ ಪರಿಣಾಮ ಬೀರುತ್ತಿವೆ.
ವಿಶ್ವ ಆರೋಗ್ಯ ಸಂಸ್ಥೆಯ ಅಂದಾಜಿನ ಪ್ರಕಾರ, ಪ್ರಸ್ತುತ 43,000ಕ್ಕೂ ಹೆಚ್ಚು ಜನರು ದೀರ್ಘಕಾಲದ ಪುನರ್ವಸತಿ ಆರೈಕೆಯ ಅಗತ್ಯವನ್ನು ಹೊಂದಿದ್ದಾರೆ. ಅವರಲ್ಲಿ ಸುಮಾರು 10,000 ಮಕ್ಕಳು ಸೇರಿದ್ದಾರೆ. ಅನೇಕರು ಅಂಗಚ್ಛೇದನ, ಬೆನ್ನುಹುರಿ ಗಾಯಗಳು, ಸುಟ್ಟ ಗಾಯಗಳು ಅಥವಾ ಮೆದುಳಿನ ಗಂಭೀರ ಆಘಾತಗಳಿಂದ ಬದುಕುತ್ತಿದ್ದಾರೆ.
ಆದರೆ, ಪುನರ್ವಸತಿ ಸೇವೆಗಳು ಅತ್ಯಂತ ಸೀಮಿತವಾಗಿಯೇ ಉಳಿದಿವೆ, ಏಕೆಂದರೆ ಯಾವುದೇ ವಿಶೇಷ ಚಿಕಿತ್ಸಾ ಕೇಂದ್ರವೂ ಸಂಪೂರ್ಣವಾಗಿ ಕಾರ್ಯನಿರ್ವಹಿಸಲು ಸಾಧ್ಯವಾಗುತ್ತಿಲ್ಲ. 50,000ಕ್ಕೂ ಹೆಚ್ಚು ಜನರಿಗೆ ತುರ್ತುವಾಗಿ ದೀರ್ಘಕಾಲದ ಚೇತರಿಕೆ ಚಿಕಿತ್ಸೆ ಅಗತ್ಯವಿದೆ ಎಂದು ಮಾನವೀಯ ಸಂಸ್ಥೆಗಳು ಎಚ್ಚರಿಸುತ್ತಿವೆ. ಆದರೆ, ಲಭ್ಯವಿರುವ ಸೇವೆಗಳು ಈ ಬಿಕ್ಕಟ್ಟಿನ ಪ್ರಮಾಣದಿಂದ ಸಂಪೂರ್ಣವಾಗಿ ಒತ್ತಡಕ್ಕೆ ಒಳಗಾಗಿವೆ.
ನೆರವಿನ ಪ್ರವೇಶ ಇನ್ನೂ ಸೀಮಿತ
ಮಾನವೀಯ ನೆರವು ನೆರವು ತಲುಪಲು ಅಡಚಣೆ ಮಾಡುತ್ತಿರುವ ನಿರ್ಬಂಧಗಳನ್ನು ಅಂತರರಾಷ್ಟ್ರೀಯ ಸಂಸ್ಥೆಗಳು ಇನ್ನೂ ಖಂಡಿಸುತ್ತಿವೆ. ವಿಶ್ವ ಆರೋಗ್ಯ ಸಂಸ್ಥೆಯ ಪ್ರಕಾರ, ಕೆಲವು ವೈದ್ಯಕೀಯ ಸಾಮಗ್ರಿಗಳನ್ನು ಇಸ್ರಾಯೇಲಿ ಅಧಿಕಾರಿಗಳು ಇನ್ನೂ “ದ್ವಿ-ಬಳಕೆಯ ವಸ್ತುಗಳು” ಎಂದು ವರ್ಗೀಕರಿಸುತ್ತಿದ್ದು, ಇದರ ಪರಿಣಾಮವಾಗಿ ಗಡಿ ತಪಾಸಣಾ ಕೇಂದ್ರಗಳಲ್ಲಿ ವಿಳಂಬ ಅಥವಾ ನಿರ್ಬಂಧಗಳು ಎದುರಾಗುತ್ತಿವೆ.
ಇತ್ತೀಚಿನ ದಿನಗಳಲ್ಲಿ, ಕೆರೆಮ್ ಶಾಲೋಮ್ ಗಡಿ ತಪಾಸಣಾ ಕೇಂದ್ರದಲ್ಲಿ ಲಸಿಕೆಗಳು, ಶೀತೀಕೃತ ಔಷಧಿಗಳು ಮತ್ತು ಸ್ವಚ್ಛತಾ ಸಾಮಗ್ರಿಗಳನ್ನು ಒಳಗೊಂಡ 180ಕ್ಕೂ ಹೆಚ್ಚು ವೈದ್ಯಕೀಯ ಸಾಮಗ್ರಿಗಳ ಪ್ಯಾಲೆಟ್ಗಳನ್ನು ಮರುಪಡೆಯಲಾಗಿದೆ. ಆದಾಗ್ಯೂ, ಗಾಜಾದ ಆರೋಗ್ಯ ವ್ಯವಸ್ಥೆ ಇನ್ನೂ ಚೇತರಿಕೆಯಿಂದ ಬಹಳ ದೂರದಲ್ಲಿದೆ ಎಂದು ವಿಶ್ವಸಂಸ್ಥೆಯ ಅಧಿಕಾರಿಗಳು ಎಚ್ಚರಿಸಿದ್ದಾರೆ.
ನೀರಿನ ಬಿಕ್ಕಟ್ಟು ಮತ್ತು ಮಾನವೀಯ ಆತಂಕಗಳು
ಆರೋಗ್ಯ ತುರ್ತು ಪರಿಸ್ಥಿತಿಯ ಜೊತೆಗೆ, ಮಾನವೀಯ ಪರಿಸ್ಥಿತಿಯೂ ನಿರಂತರವಾಗಿ ಹದಗೆಡುತ್ತಿದೆ. ಕಳೆದ ವಾರದಲ್ಲಿ ಸುಮಾರು 1,16,000 ಜನರಿಗೆ ಸ್ವಚ್ಛತಾ ಕಿಟ್ಗಳು ಮತ್ತು ನೀರಿನ ಪಾತ್ರೆಗಳನ್ನು ವಿತರಿಸಲಾಗಿದೆ ಎಂದು UNICEF ವರದಿ ಮಾಡಿದೆ. ಆದರೂ, ಸುರಕ್ಷಿತ ಕುಡಿಯುವ ನೀರಿನ ಲಭ್ಯತೆ ಅತ್ಯಂತ ಸೀಮಿತವಾಗಿಯೇ ಉಳಿದಿದೆ.
OCHA ಅಂದಾಜಿನ ಪ್ರಕಾರ, ಗಾಜಾದಲ್ಲಿ ಲಭ್ಯವಿರುವ ನೀರಿನ 98 ಪ್ರತಿಶತ ಮಾನವ ಬಳಕೆಗೆ ಅಸುರಕ್ಷಿತವಾಗಿದೆ. ಜೊತೆಗೆ, ಆ ಪ್ರದೇಶದ ಸುಮಾರು 90 ಪ್ರತಿಶತ ನೀರಿನ ಮೂಲಸೌಕರ್ಯಗಳು ಹಾನಿಗೊಳಗಾಗಿವೆ ಅಥವಾ ಸಂಪೂರ್ಣವಾಗಿ ನಾಶವಾಗಿವೆ. ಈ ಕಾರಣಕ್ಕಾಗಿ, ವಿಶ್ವಸಂಸ್ಥೆ ಮತ್ತು ಮಾನವೀಯ ಸಂಸ್ಥೆಗಳು ಯಾವುದೇ ಅಡೆತಡೆಯಿಲ್ಲದ ಮಾನವೀಯ ನೆರವು ಪ್ರವೇಶ ಮತ್ತು ವೈದ್ಯಕೀಯ ಹಾಗೂ ಅಗತ್ಯ ಸಾಮಗ್ರಿಗಳ ನಿರಂತರ ಪೂರೈಕೆಗೆ ತಮ್ಮ ಮನವಿಯನ್ನು ಪುನರುಚ್ಚರಿಸುತ್ತಿವೆ.
ಮೂಲಸೌಕರ್ಯಗಳ ಪುನಃಸ್ಥಾಪನೆ, ನಿಯಮಿತ ಮಾನವೀಯ ದಾರಿಗಳ ಸ್ಥಾಪನೆ ಮತ್ತು ಸಮರ್ಪಕ ಭದ್ರತಾ ಪರಿಸ್ಥಿತಿಗಳ ಮೂಲಕ ಮಾತ್ರ, ಎರಡು ವರ್ಷಗಳಿಗಿಂತ ಹೆಚ್ಚು ಕಾಲದ ಸಂಘರ್ಷದ ಭಾರವನ್ನು ಇನ್ನೂ ಹೊರುತ್ತಿರುವ ಜನರ ಅಗತ್ಯಗಳಿಗೆ ಪರಿಣಾಮಕಾರಿಯಾಗಿ ಪ್ರತಿಕ್ರಿಯಿಸಲು ಸಾಧ್ಯವಾಗುತ್ತದೆ ಎಂದು ಈ ಸಂಸ್ಥೆಗಳು ಒತ್ತಿಹೇಳುತ್ತವೆ.
ನಮ್ಮ ಲೇಖನವನ್ನು ಓದಿದ್ದಕ್ಕಾಗಿ ಧನ್ಯವಾದಗಳು. ನಮ್ಮ ದೈನಂದಿನ ಸುದ್ದಿಪತ್ರಕ್ಕೆ ಚಂದಾದಾರರಾಗುವ ಮೂಲಕ ನೀವು ಸದಾ ಇತ್ತೀಚಿನ ಮಾಹಿತಿಯನ್ನು ಪಡೆದುಕೊಳ್ಳಬಹುದು.(ಇಲ್ಲಿ ಕ್ಲಿಕ್ ಮಾಡಿ).
