Episkopo ya lokúmu Parolin momemi ya nsango mókó ya boboto na Mozambiki

Vatican News

Mobémbo ya mikolo motóba eye episkopo ya lokúmu Parolin asáli na Mozambiki etalaki bosepeli mibú 30 ya boyokani pe, na ndenge ya losámbo, na bozali ya Secrétaire ya Letá ya Ngwendé ya Sántu-Petelo na milúlu bikolakisa bomoi ya Eklezia ya ekóló, mpenza na bosukisi mbala ya 3 ya mikolo ya ekóló po ya bolenge, pe na botáli bókó ya bobondi na engumba ezuaka pasi ya Cabo Delgado. Libosó ya bosuki ya mobémbo na ye, mokolo ya isáto 10 ya sánzá ya zómi na mibále, episkopo ya lokúmu Parolin atálaki esika ya lisangá Sant'Egidio pembeni ya Maputo, mboka-mokonzi.

Mibú 30 ya boyokani káti ya Mozambiki na Ngwendé ya Sántu-Petelo

Na mondimo (slogan) "Elongo po ya Mozambiki mókó ya bomoto pe bomókó koleka", Secrétaire ya Letá azalaki pembeni ya mokónzi ya ekóló, Daniel Chapo, na molúlu ya bosepeli mibú 30 ya boyokani káti ya bikóló mibále, na ndáko ya ntómá ya Papá na Maputo. Boyokani yangó bizui makasi na boluki boboto na Mozambiki. Yangó waná bokútani na bakambi civil ya ekóló, mokolo ya itáno 5 ya sánzá ya zómi na mibále, etálaki mingi lolengé ya kolendisa boyokani káti na bikóló mibále. Esálemaka na 1995, boyokani ena evandi likoló ya boyokani ya bikóló mibále, etiamaka mokoloto na 2012, ebongisama na bosáli elongo na boboto, na bosembo pe na botéyi.

Penepene na Eklezia libosó ya bozangi bobateli na nordi ya ekóló

Mobémbo ya episkopo ya lokúmu Parolin na Mozambiki emonani na Eklezia ya ekóló lokóla ekela yókó ya bobondi libosó ya mobúlú eye engúmba ya Cabo Delgado ezuaki likámá, na nordi ya ekóló. Úto 2017, mobúlú ya bituluku ya bato bazali na mandoki, mingi mpenza ba djihadiste, etinda na makási koleka bato milio 1,3 ya engúmba, káti na bango pembeni na bato 100 000 bakimaki kaka na póso mibále, elobaki HCR mokolo ya mibále 2 ya sánzá ya zómi na mibále.

Mokolo ya yambo 8 ya sánzá ya zómi na mibále, Secrétaire ya Letá ya Ngwendé ya Sántu-Petelo akendeki na mbóká-mokónzi ya engúmba, na Pemba, po ya kolakisa bosálisani na ye pe kosála misa mókó, na pókwa, na cathédrale Sántu-Polo. Na litéya na ye, alendisaki bandimi ya kozala na elikya na Kristu; alakaki bango penepene ya Papá Léon XIV pe ya Eklezia mobimba. Episkopo ya lokúmu Pietro Parolin akutanaki na sima na bayékoli na esika lyókó ya bozongisi (réinsertion) pembeni na Pemba. Abengaki bango ya kosála po ya Mozambiki mókó ya bomoto pe bomókó koleka pe, kotombola molimo ya lisolo pe ya bokutani. Na bosukisi, atikaki engúmba ya Cabo Delgado na bobateli ya Ngondo Azanga mbindo, na bosengi 'te boboto elonga mobúlú pe mabótá bizongela lokúmu na bango.

Bilenge ya Mozambiki babengami ya kozala basáli ya boboto

Bilenge ya Eklezia ya Mozambiki basálaki mikolo na bango úto 3 kinó 7 ya sánzá ya zómi na mibále. Na eyenga 7 ya sánzá ya zómi na mibále, basanganaki na Maputo po na misa ya bosukisi, ekambemaki na Secrétaire ya Letá oyo, na litéya na ye, alendisaki bango ya kozala "basali" ya boboto na ekóló na bango. Episkopo ya lokúmu Parolin alendisaki bango lokóla ya kokanga na bomoi elikya na bango pe bolingi na bango na Nzámbe na nzelá ya losámbo, bokumisi ukaristya pe likabo, pe ya "koyambela (contaminer)” baye bazali penepene na bango na esengo.

Matondo mingi na ndéngé otángi lisolo liye.