Отворени „Деновите на Света Мајка Тереза“ по повод 10 години од канонизацијата

Во среда, 26 август 2026 година, во „Порта Македонија“ свечено е отворена манифестацијата „Денови на Света Мајка Тереза“, со пригодното обраќање на Скопскиот бискуп и Струмичко-скопски епарх монсињор д-р Киро Стојанов, кој зборуваше на тема „Скопјанката од Калкута која го промени светот“.

На отворањето присуствуваа протојереј ставорофр отец д-р Зоран И. Стојанов, отец Томаш Бак, Карол Томашевски, реис-ул-улема Х. Хфз. Шаќир еф. Фетаи, поранешниот претседател на Македонија г-дин Ѓорге Иванов со неговата сопруга, директорката на Комисијата за односи со верските заедници и религиозни група Оливера Трајковска, директорката на НУ „Спомен куќа Мајка Тереза“ Соња Кузмановска, претставници од амбасадата на Република Хрватска и Словенија, претставници на други верски заедници, гости и почитувачи на нејзиното дело. Модератор беше Јадранка Чадиновска.

Во своето обраќање епископот Стојанов зборувајќи за животот и делото на светицата од Скопје меѓу другото истакна: „Не можеме и не ни е дозволено тесноградо да ја присвојуваме само за себе и не смееме да ѝ наметнуваме титули и да зборуваме за неа само како за хуманитарка, нешто што го одзема она што таа првенствено и навистина е: католичка монахиња која без нејзината духовност и повик во повик, без верата во Христос и неговиот глас „Жеден сум“, никогаш не би била тоа што сега е: светица на Црквата, а потоа доаѓа сè друго.“

За најзначајните моменти од животот и мисијата на светицата зборуваше Љерка Тот Наумова.

Манифестацијата е посветена на одбележувањето на 10 години од канонизацијата на Мајка Тереза, а е во организација на Католичката црква во Македонија и Заедницата на Хрвати во Република Македонија – огранок Скопје, со поддршка на Владата на Република Хрватска, а ќе заврши со свечена Литургија на 5 септември во катедралата „пресвето Срце Исусово“ во Скопје.