Папата Лав: Велигден нè отвора за надеж што никогаш не изневерува

Предводејќи ја светата Литургија, на плоштадот „Свети Петар“, во присуство на повеќе од педесет илјади верници, папата Лав XIV објасни дека денес целото создание „блеска со нова светлина“ и дека сите се радуваме додека „од земјата се издига победоносна песна… Христос воскресна од мртвите, и со Него и ние воскреснуваме за нов живот!“

Велигден носи полнота на радост

Велигденската објава „ја опфаќа тајната на нашиот живот и судбината на историјата“, објасни Папата, и продира дури и во длабочините на смртта, кога човек може да се почувствува совладан, отворајќи нè за „надеж што никогаш не изневерува, за светлина што никогаш не згаснува, за полнота на радост што ништо не може да ја одземе“, зашто „смртта е засекогаш победена“ и веќе нема власт над нас.

Повик да ја прифатиме надежта

Продолжувајќи ја својата проповед, Папата истакна дека велигденската порака на надеж и светлина не е секогаш лесно да се прифати, затоа што силата на смртта постојано ни се заканува и внатрешно и надворешно.

Во нас самите, тежината на гревовите може да нè спречи „да ги рашириме крилјата“ и да полетаме, а страдањето може да нè доведе до губење на надежта и да нè натера да се чувствуваме „како да сме завршиле во тунел без крај“.

Надвор од нас, смртта секојдневно стои пред нашите очи, „присутна во неправдите, во партиската себичност, во угнетувањето на сиромашните, во недостатокот на внимание кон најранливите“. Насилството во нашиот свет и раните што ги предизвикува се јасно видливи, продолжи тој, „во крикот на болката што се издига од секој крај поради злоупотребите што ги газат најслабите меѓу нас, поради идолопоклонството кон профитот што ги ограбува природните ресурси на земјата, поради насилството на војната што убива и уништува“.

Да го воздигнеме погледот, да ги отвориме срцата

Велигден нè повикува „да го воздигнеме погледот и да ги отвориме срцата“, објасни Папата, зашто „Господ е жив и останува со нас“.

„Преку пукнатините на воскресението што се отвораат во темнината, Тој им ја доверува на нашите срца надежта што нè одржува: силата на смртта не е последната судбина на нашиот живот. Сите ние сме еднаш засекогаш насочени кон патот на исполнувањето, зашто и ние воскреснавме во Христос.“

Цитирајќи ги зборовите од првиот Апостолски поттик на папата Фрањо, Evangelii Gaudium, папата Лав го повтори тврдењето дека Христовото воскресение „не е настан од минатото; тоа содржи животворна сила што го проникнала овој свет. Таму каде што сè изгледа мртво, одненадеж никнуваат знаци на воскресението. Тоа е неодолива сила. Често изгледа како Бог да не постои: насекаде околу нас гледаме постојана неправда, зло, рамнодушност и бруталност. Но исто така е вистина дека среде темнината секогаш никнува нешто ново и порано или подоцна донесува плод“ (бр. 276).

За човештвото изгрева нов живот

Воскреснатиот Христос ни дарува сигурна надеж, заклучи Папата, а Воскресението „објавува дека за човештвото сега изгрева нов живот, посилен од смртта“.

„Велигден е новото создание што го дарува Воскреснатиот Господ; тој е нов почеток; тој е живот што конечно станува вечен преку Божјата победа над древниот непријател. Денес ни е потребна оваа песна на надежта. Ние самите, воскреснати со Христос, треба да Го внесеме Него по улиците на светот. Затоа да потрчаме како Марија Магдалена, навестувајќи Го на сите, живеејќи ја радоста на воскресението, за таму каде што сè уште се задржува сенката на смртта, да засветли светлината на животот.“

Четириесет години холандско цвеќе

Велигденската прослава се одржа на плоштадот „Свети Петар“, украсен со повеќе од 65 илјади лалиња, нарциси и зумбули, 7.800 цвеќиња од различни видови, како и повеќе од 1.200 гранчиња.

Оваа година се одбележуваат 40 години откако Холандија му го дарува овој цветен дар на Папата за Велигден. Иницијативата ја поттикнуваат холандските цвеќари и доброволци, во соработка со Холандската бискупска конференција и фондацијата „Bloemenpracht Rome“.