Папата: Христијаните треба заедно да бараат заедништво и да го негуваат мирот

Папата Лав XIV во среда, 26 август 2026 година,  се сретна со неколку лутерански епископи од Норвешка, кои престојуваат во Рим на ходочестие.

Во своето обраќање, Папата ги покани да ги посетат различните свети места поврзани со првите христијани и маченици, чии животи и денес остануваат извор на вдахновение за современите христијани.

Нивниот пример, рече тој, нè охрабрува и нас „да го дадеме својот живот за слава Божја и за доброто на нашите браќа и сестри“.

Патот на помирувањето

Папата Лав XIV укажа на тешките предизвици што ги носи „особено турбулентниот период“ низ кој минува светот.

„Се чини дека расте непријателството меѓу народите, видливо не само во меѓународните конфликти и спорови“, рече тој, „туку и во рамките на поединечните земји, што се гледа во горчината која често го обележува политичкиот и општествениот говор“.

Папата истакна дека и христијаните се соочуваат со искушението да заземат непријателски став кон оние со кои не се согласуваат. Сепак, нагласи тој, христијаните се повикани да бараат патишта на помирување и братство.

„Исус ни покажува друг пат, откривајќи дека добрината и милосрдието имаат сила да разоружаат“, рече папата Лав XIV.

Заедничко сведоштво за Христос

Со својата посета на Рим, лутеранските епископи ја покажуваат желбата да градат заедништво, рече Папата, истакнувајќи дека дури и малите гестови „можат да нè вдахноват и водат по патот на помирувањето“.

Потоа Светиот Отец потсети на Исусовата молитва сите Негови ученици да бидат едно, за светот да поверува.

„Втемелени во нашето заедничко крштение и во нашата заедничка мисија во светот“, рече тој, „се молам секогаш да растеме заедно во нашата служба за унапредување на мирот и правдата“.

На крајот, папата Лав XIV ги покани лутеранските епископи од Норвешка да го земат примерот на првите маченици и светци како сведоштво за преобразувачката сила на милосрдието.

„Да го молиме Божјиот благослов“, рече тој, „за да ни помогне, во бесконечната Божја добрина и мудрост, сè поавтентично да живееме како браќа и сестри и така заеднички да сведочиме за нашиот Спасител, нашиот Господ Исус Христос.“