ആഗോള പ്രേഷിതദിനത്തിൽ പങ്കാളികളാകുവാൻ ഏവരെയും ആഹ്വാനം ചെയ്ത് ലിയോ പതിനാലാമൻ പാപ്പാ

വത്തിക്കാൻ ന്യൂസ്

സഭ മുഴുവൻ മിഷനറിമാർക്കുവേണ്ടിയും,  അവരുടെ അപ്പസ്തോലിക പ്രവർത്തനത്തിന്റെ ഫലത്തിനും വേണ്ടിയും  പ്രാർത്ഥനയിൽ ഒരുമിക്കുന്ന, ആഗോള പ്രേഷിത ദിനം ഒക്ടോബർ മാസം പത്തൊൻപതാം തീയതി ആഘോഷിക്കുകയാണ്. തദവസരത്തിൽ, ഈ ദിനത്തിൽ പങ്കാളികളാകുവാൻ ലിയോ പതിനാലാമൻ പാപ്പാ ഏവരെയും ആഹ്വാനം ചെയ്തു. തന്റെ വ്യക്തിപരമായ അനുഭവങ്ങളും ഉൾക്കൊള്ളിച്ചുകൊണ്ടുള്ള, വീഡിയോ സന്ദേശം വിശ്വാസികൾക്കായി പ്രസിദ്ധീകരിച്ചു.

താൻ പുരോഹിതനും, പിന്നീട് പെറുവിൽ മിഷനറി മെത്രാനും ആയിരുന്നപ്പോൾ, ഈ ദിനം വിശ്വാസത്തോടെയും, പ്രാർത്ഥനകളോടെയും, ദാനധർമ്മങ്ങളിലൂടെയും ആചരിക്കുന്നത്, സമൂഹത്തെ പരിവർത്തനം ചെയ്യുന്നതിനു താൻ സാക്ഷിയാണെന്നു പാപ്പാ സന്ദേശത്തിൽ പറഞ്ഞു.

ലോകത്തിലെ എല്ലാ കത്തോലിക്കാ ഇടവകകളെയും, ആഗോള പ്രേഷിത ഞായറാഴ്ച്ചയിൽ പങ്കെടുക്കുവാൻ പാപ്പാ ക്ഷണിച്ചു.

"നിങ്ങളുടെ പ്രാർത്ഥനകളും, സഹായങ്ങളും, പ്രേഷിതമേഖലകളിൽ ഉള്ള സഹോദരങ്ങൾക്കിടയിൽ സുവിശേഷം പ്രചരിപ്പിക്കുന്നതിനും, അജപാലന-മതബോധന പദ്ധതികളെ സഹായിക്കുന്നതിനും, പുതിയ പള്ളികൾ പണിയുന്നതിനും, ആതുര -വിദ്യാഭ്യാസ പ്രവർത്തനങ്ങളെ പിന്തുണയ്ക്കുന്നതിനും ഉതകും", പാപ്പാ അടിവരയിട്ടു പറഞ്ഞു.

"ഒക്ടോബർ 19 ന്, "ജനങ്ങൾക്കിടയിൽ പ്രത്യാശയുടെ മിഷനറിമാർ" ആകുവാൻ, ജ്ഞാനസ്നാനം വഴിയായി നമുക്ക് ലഭിച്ച  ആഹ്വാനത്തെക്കുറിച്ച് നാം ഒരുമിച്ച് ചിന്തിക്കുമ്പോൾ, നമ്മുടെ പ്രത്യാശയായ യേശുക്രിസ്തുവിനെ,  ഭൂമിയുടെ അതിരുകളിലേക്ക് കൊണ്ടുവരാനുള്ള നമ്മുടെ മധുരവും,  സന്തോഷകരവുമായ പ്രതിബദ്ധത നമുക്ക്  പുതുക്കാം.", പാപ്പാ ആഹ്വാനം ചെയ്തു.

ലോകമെമ്പാടുമുള്ള മിഷനറിമാരെ സഹായിക്കാനുള്ള പാപ്പായുടെ ഉദ്യമങ്ങളെ സഹായിക്കുന്ന ഏവർക്കും നന്ദിയർപ്പിച്ചതോടൊപ്പം, ദൈവാനുഗ്രഹങ്ങളും നേർന്നുകൊണ്ടാണ്, വീഡിയോ സന്ദേശം അവസാനിക്കുന്നത്.