ഗാസയിലെ കുട്ടികൾക്ക് പാപ്പായുടെ ഔഷധ സഹായം!

ജോയി കരിവേലി, വത്തിക്കാൻ സിറ്റി

പാപ്പാ ഗാസയിലെ കുട്ടികൾക്ക് അണുസംഹാരൗഷധമായ ആൻറിബയോട്ടിക്കുകൾ അയച്ചുകൊടുത്തു.

പാപ്പായുടെ ഉപവിപ്രവർത്തന കാര്യാലയമായ “എലെമൊസിനെറീയ അപ്പൊസ്തോലിക്ക” ('Elemosineria Apostolica') വഴിയാണ് ലിയൊ പതിനാലാമൻ പാപ്പാ ഈ മരുന്നുകൾ എത്തിച്ചത്.

ഗാസയിൽ രണ്ടുവർഷത്തെ സംഘർഷത്തിൻറെ തിക്തഫലങ്ങൾ അനുഭവിക്കുന്ന കുഞ്ഞുങ്ങൾക്കായിട്ടാണ് പാപ്പായുടെ കാരുണ്യത്തിൻറെ പ്രതീകാത്മക അടയാളമായി 5000 ഡോസ്  മരുന്നുകൾ എത്തിച്ചിരിക്കുന്നത്.

ജറുസലേമിലെ ലത്തീൻ പാത്രിയാർക്കേറ്റിൻറെ സഹായത്തോടെ ഈ മരുന്നുകൾ ആവശ്യക്കാരയ കുഞ്ഞുങ്ങൾക്ക് വിതരണം ചെയ്തുവെന്ന് പാപ്പായുടെ ഉപവിപ്രവർത്തന കാര്യാലയത്തിൻറെ ചുമതലയുള്ള കർദ്ദിനാൾ കൊൺറാഡ് ക്രയേവ്സ്ക്കി വെളിപ്പെടുത്തി.

സുവിശേഷ പ്രഘോഷണം വിശ്വാസയോഗ്യമാകണമെങ്കിൽ അത് സാമീപ്യത്തിൻറെയും സ്വീകരണത്തിൻറെയും പ്രവർത്തികളായി പരിണമിക്കണമെന്ന് ലിയൊ പതിനാലാമൻ പാപ്പാ, ഞാൻ നിന്നെ സ്നേഹിച്ചു എന്നർത്ഥം വരുന്ന “ദിലേക്സി തേ” എന്ന തൻറെ അപ്പൊസ്തോലിക പ്രബോധനത്തിൽ ഉദ്ബോധിപ്പിച്ചിട്ടുള്ളത് കർദ്ദിനാൾ ക്രയേവ്സ്ക്കി അനുസ്മരിക്കുന്നു. 

യുദ്ധം പിച്ചിച്ചീന്തിയിരിക്കുന്ന ഉക്രൈയിനും പാപ്പായുടെ മാനവികസഹായം തുടരുന്നു. ഇറച്ചി, പാസ്ത, പാചക എണ്ണ, തുടങ്ങിയ ഭക്ഷ്യവസ്തുക്കളും ശുചീകരണ പദാർത്ഥങ്ങളും ഈ സഹായത്തിൽ ഉൾപ്പെടുന്നു.