Bregu Perëndimor - OKB: situata keqësohet me shpejtësi
Vatican News
Situata humanitare në Bregun Perëndimor "po keqësohet me shpejtësi". Ky është alarmi i lëshuar nga zëdhënësi i OKB-së Stéphane Dujarric. Sipas tij, në veri të territorit të pushtuar, forcat izraelite urdhëruan një duzinë familjesh palestineze nga lagjja Jabal An Nasr e Tulkaremit të largoheshin nga shtëpitë e tyre për shtatë orë gjatë operacioneve ushtarake pranë kampit të refugjatëve Nur Shams.
Uji, në qendër të emergjencës
Buldozerët e ushtrisë gërmuan një pjesë të rrugës, duke dëmtuar sistemet e ujit dhe të kanalizimeve të cilat, pasi ushtria u tërhoq, u riparuan nga ekipet komunale. Uji është edhe në qendër të emergjencës në Kusra, pranë Nablusit, ku familjet Hasan dhe Ridi, të rrethuara për më shumë se një javë nga kolonët izraelitë dhe praktikisht të paafta të largohen nga shtëpitë e tyre, rrezikojnë të mbeten pa furnizime gjatë orëve në vijim e, për këtë arsye, flasin edhe për mungesë ilaçesh. Ndërkohë nga lokalitete të tjera, arrijnë raporte për dhunë të re: një ambulancë e Gjysmëhënës së Kuqe palestineze u sulmua nga kolonët në Tel Rumeida, ndërsa agjencia palestineze e lajmeve Wafa njofton për tokën e djegur në Turmus Aya, për dy të rinj të plagosur në Beita dhe një sulm kundër ujësjellësit në zonën Tubas.
Veprime izraelite kundër palestinezëve
Por, ata që shkaktuan tronditje të veçantë gjatë orëve të fundit, ishin sulmet e ushtrisë izraelite: në Qabatiyah, në jug të Jenin, IDF pranoi se gjatë një bastisjeje, disa palestinezë të ndaluar për t’u marrë në pyetje, u identifikuan duke shkruar numra në trupat ose ballin e tyre. E njoftoi këtë, Gazeta "Haaretz" duke botuar foton e një palestinezi me numrin "44" shkruar në ballin e tij dhe duke shpjeguar se ushtria izraelite konfirmoi se të dyshuarit e marrë në pyetje ishin të numëruar nga trupat. Ushtria izraelite e përshkroi incidentin si "serioz". Kryetari i Parlamentit të Ta'al, Ahmad Tibi, përshkroi në platformën sociale X se ishte "tronditëse dhe e neveritshme: ushtarët dhe oficerët po shkruajnë numra identifikimi në ballin e palestinezëve në Qabatiyah, para se t'i marrin në pyetje. Ja si duket dehumanizimi: fshirja e personit dhe shndërrimi i tij në numër! Një figurë që të kujton kohërat e errëta dhe që duhet t'i trondisë të gjithë".
Për më tepër, një krizë ekonomike në thellim rëndon frikshëm mbi Autoritetin Palestinez, duke e detyruar të ulë pagat si dhe shërbimet publike, ndërsa papunësia, kufizimet në lëvizje dhe mungesa e ilaçeve i keqësojnë rëndë kushtet e popullsisë.
Edhe Ambasadori i SHBA-së në Izrael, Mike Huckabee, e denoncoi dhunën e kolonëve, duke mbrojtur vendimin e tij disa ditë më parë për t'i etiketuar ata që janë përgjegjës në rrethimin e Kusrës si "terroristë izraelitë". Sipas diplomatit, këto veprime bien brenda përkufizimit të SHBA-së për terrorizmin kur synojnë t'i bëjnë njerëzit të kenë frikë për jetën e tyre dhe të ndryshojnë sjelljen. Huckabee sqaroi se ata përfaqësojnë një "minoritet tejet të vogël", duke i akuzuar se po dëmtojnë Izraelin dhe popullin hebraik.
Nga Gaza - në Siri
Ndërkohë, tensionet po shkallëzohen edhe në fronte të tjera rajonale. Në Rripin e Gazës, burimet palestineze raportojnë gjashtë vdekje, duke përfshirë edhe një fëmijë, në një bastisje izraelite në zonën Shati, pranë portit të Qytetit të Gazës; IDF pretendon se ka gjuajtur komandantët e Hamasit që po përgatitnin sulme kundër trupave izraelite. Më në veri, fronti sirian po nxehet rishtas: Damasku i denoncoi sulmet kundër aeroportit ushtarak Abu al-Duhur në provincën Idlib në Kombet e Bashkuara si "agresion izraelit".
Sipas një burimi izraelit të cituar nga Axios, edhe operacioni kishte për qëllim të parandalonte forcimin e pranisë ushtarake turke në Siri; Ankaraja mohon se forcat e saj ishin të pranishme në bazë dhe akuzon Izraelin se përdor pretekste për të sulmuar vendet fqinje. Por incidenti rrezikon të krijojë një pikë të re mosmarrëveshjeje ndërmjet Izraelit dhe Turqisë mbi të ardhmen e ekuilibrit ushtarak të pushtetit në Sirinë pas Asadit.
