Gaza, Atë Romanelli: “Faleminderit Papës për afërsinë dhe lutjet e tij”
Vatican News
Në një video-mesazh të publikuar nga famullia, Atë Romanelli bëri të ditur fjalët që Papa u dërgoi besimtarëve të Gazës: “Ditët kalojnë, ashtu si javët, por shoh se kushtet mbeten ende shumë të vështira.” Ati i Shenjtë i siguroi se nuk kalon asnjë ditë pa menduar dhe pa u lutur për ata që vuajnë, duke u drejtuar veçanërisht meshtarëve dhe rregulltarëve me këto fjalë: “Faleminderit që qëndroni pranë tyre. Zoti ju ndihmoftë dhe ju forcoftë. Bekime dhe një përqafim vëllazëror”.
Atë Romanelli falënderoi Papën edhe për thirrjen e tij publike, pas lutjes së Engjëllit të Tenzot, për t’i dhënë fund të gjitha konflikteve, veçanërisht atyre që po shkatërrojnë Lindjen e Mesme. Ai theksoi se situata në Gaza mbetet tragjike, por Papa vazhdon të jetë në kontakt të vazhdueshëm me komunitetin dhe të lutet për të.
Në sfond të videos dëgjohen këngë dhe valle, shenjë e një çasti gëzimi mes vuajtjeve. Atë Romanelli shpjegoi se besimtarët kremtuan dhjetëvjetorin e kushtimit të familjes rregulltare të Fjalës së Mishëruar Zemrës së Shenjtë të Jezusit. Në ditët e fundit u zhvillua edhe një nëntëditësh lutjeje, ndërsa pas Meshës u bë një akt riparimi për fyerjet ndaj Zemrës së Shenjtë të Jezusi dhe u ripërtëri kushtimi i botës, i Rripit të Gazës, i famullisë dhe i bashkësisë rregulltare ndaj Zemrës së Shenjtë të Jezusi.
Këto gjeste feje dhe lutjeje përfaqësojnë një shenjë shprese në një kohë kur lufta vazhdon të shkaktojë viktima dhe kriza humanitare po përkeqësohet. Sipas të dhënave të fundit ndërkombëtare, nëse ndihmat humanitare vazhdojnë të pakësohen, mbi 1,4 milion banorë të Gazës mund të përballen me pasiguri të rëndë ushqimore deri në fund të vitit 2026.
Pavarësisht vuajtjeve dhe pasigurisë, komuniteti katolik i Gazës vazhdon të mbajë gjallë shpresën për paqe, i mbështetur në lutje, solidaritet dhe afërsinë e Papës.
